മാഡ്രിഡ്: ലോകഫുട്ബോളില് പത്തു വര്ഷത്തിനപ്പുറവും സ്ഥിരത നിലനിര്ത്തുന്ന കളിക്കാരുടെ പേരു പറയാന് ആവശ്യപ്പെട്ടാല് ഒരാള് ആദ്യം പറയുന്ന രണ്ടു പേരുകള് ക്രിസ്ത്യാനോ റൊണാള്ഡോയെന്നും ലയണേല് മെസ്സിയെന്നുമാണ്. സ്പെയിനില് തങ്ങളുടെ ക്ളബ്ബിന് വേണ്ടി ഗോളടിച്ചുകൂട്ടുന്ന രണ്ടുപേരും ചേര്ന്ന് ഇതുവരെ അടിച്ചുകൂട്ടിയത് 1000 ഗോളുകള്. ലോകം മുഴുവന് ഉറ്റുനോക്കുന്ന എല് ക്ളാസ്സിക്കോ പോരാട്ടങ്ങളില് ഇന്നലെയും ഇരുവരും റയല് മാഡ്രിഡിനും ബാഴ്സിലോണയ്ക്കും സ്കോര് ചെയ്തു.
കരിയറില് അര്ജന്റീന കഴിഞ്ഞാല് പിന്നെ ബാഴ്സിലോണയ്ക്കായി മാത്രം കളിച്ചിട്ടുള്ള മെസ്സി 551 ഗോളുകളാണ് ഇതുവരെ ടീമിനായി നേടിയിട്ടുള്ളത്. 14 വര്ഷമായി സീസണില് 40 ഗോളെന്ന ശരാശരി മെസ്സി നിലനിര്ത്തുകയും ചെയ്യുന്നു. 2009 ല് റെക്കോഡ് തുകയ്ക്ക് ഇംഗ്ളാണ്ടിലെ മാഞ്ചസ്റ്റര് യുണൈറ്റഡില് നിന്നും റയലില് എത്തിയ ക്രിസ്ത്യാനോ റൊണാള്ഡോയും ഒമ്പതു വര്ഷമായി സ്ഥിരത നില നിര്ത്തുന്ന പ്രകടനമാണ് നടത്തുന്നത്. സീസണില് ശരാശരി 50 ഗോളുകള് റയലിനായി നേടുന്ന ക്രിസ്ത്യാനോ 449 ഗോളുകളും സ്പെയിനില് നേടിക്കഴിഞ്ഞു.
ഇന്ത്യാ പാക് ക്രിക്കറ്റ് പോലെ എപ്പോഴും ആവേശവും മത്സരബുദ്ധിയും പ്രകടമാകുന്ന മത്സരത്തില് അവസാന എല് ക്ളാസ്സിക്കോയില് 2-2 നാണ് ഇരു ടീമും പിരിഞ്ഞത്. മത്സരവുമായി ബന്ധപ്പെട്ട് പിന്നെയുമുണ്ട് ഒട്ടേറെ രസകരമായ വസ്തുതകള്. കളിയുടെ പകുതി സമയത്ത് തന്നെ ബാഴ്സിലോണയെ പത്തു പേരാക്കി ചുരുക്കി വാല്വെര്ദെയെ ഫൗള് ചെയ്തതിന് സെര്ജിയോ റോബര്ട്ടോ കണ്ടു ചുവപ്പ് കാര്ഡ് ബാഴ്സയുടെ സല്പ്പേരിന് കളങ്കം ചാര്ത്തുന്നതായി. സാധാരണഗതിയില് എതിരാളികളെ കളിച്ചു മാത്രം തോല്പ്പിക്കാറുള്ള ബാഴ്സിലോണയ്ക്ക് തങ്ങളുടെ കളിക്കാരില് ഒരാള് ചുവപ്പു കാര്ഡ് കണ്ടത് മൂന്ന് വര്ഷത്തിന് ശേഷമായിരുന്നു. 2015 ല് എയ്ബറിനെതിരേ കളിക്കുമ്പോള് അര്ജന്റീന താരം ഹാവിയര് മഷറാനോ കണ്ട ചുവപ്പുകാര്ഡാണ് ഇതിന് മുമ്പ് ബാഴ്സയ്ക്ക് വന്നിട്ടുള്ള ഏക കളങ്കം.
കളിയുടെ അമ്പത്തിരണ്ടാം മിനിറ്റില് സുവാരസ് നല്കിയ പന്തില് മെസ്സി രണ്ടു പ്രതിരോധക്കാരെ വെട്ടിയൊഴിഞ്ഞ് നേടിയ ഗോള് എല് ക്ളാസ്സിക്കോകളില് ഏറ്റവും കൂടുതല് ഗോള് നേടിയ താരമാക്കി മെസ്സിയെ മാറ്റി. മറുവശത്ത് 14 ാം മിനിറ്റില് റയലിനെ ആദ്യം സമനിലയില് എത്തിച്ച ഗോളിലൂടെ ക്രിസ്ത്യാനോ ഡിസ്റ്റിഫാനോയ്ക്ക് ശേഷം റയലിനായി എല്ക്ളാസ്സിക്കോയില് ഏറ്റവും കൂടുതല് ഗോള് നേടിയതാരം എന്ന പദവിയിലേക്കാണ് എത്തിച്ചത്. 18 ഗോളുകളാണ് താരം നേടിയത്. 13 വര്ഷമായി റയലിന്റെ പ്രതിരോധം ഭദ്രമാക്കുന്ന റാമോസിനും ചരിത്ര നിമിഷമായിരുന്നു. റയലിനായി കരിയറിലെ 561 ാം മത്സരം കളിക്കുന്ന നായകന് മുന് താരങ്ങളായ റൗളിനും(741) ഇകോര് കസീയസിനും (725) തൊട്ടുപിന്നിലെത്തി.
