കോട്ടയം : കെവിന്റെ ഭാര്യ നീനു മാനസികരോഗിയാണെന്ന് തെളിയിക്കാനുള്ള പ്രതിയും നീനുവിന്റെ അച്ഛനുമായ ചാക്കോയുടെ ശ്രമം പൊളിഞ്ഞു. നീനു മാനസികരോഗിയാണെന്ന് തെളിയിക്കാനുള്ള രേഖകള് വീട്ടിലുണ്ടെന്നും അത് എടുക്കാന് അനുവദിക്കണമെന്നുമുള്ള പ്രതിയുടെ ആവശ്യം പരിഗണിച്ച് ചാക്കോയുമൊത്ത് തെന്മലയിലെ ഒറ്റക്കല് വീട്ടില് എത്തിയ അന്വേഷണ സംഘം വീടുമുഴുവന് അരിച്ചുപെറുക്കിയിട്ടും നീനുവിന് മാനസിക രോഗമാണെന്ന് തെളിയിക്കുന്നതിനുള്ള ഒരു രേഖയും കണ്ടെത്താനായില്ല.
രേഖകള് എടുക്കാന് കോടതി അനുവദിച്ചതിനെത്തുടര്ന്നായിരുന്നു ചാക്കോയുമൊത്ത് പൊലീസ് തെന്മലയിലെ വീട്ടിലെത്തിയത്. നാല് മണിയോടെ ഒറ്റക്കല്ലിലെത്തിയ സംഘം വീട് മുഴുവന് തിരഞ്ഞിട്ടും രേഖകളൊന്നും കിട്ടിയില്ല. ചാക്കോയുടെ അഭിഭാഷകനും പോലീസുകാരും ഒപ്പമുണ്ടായിരുന്നു. ഹൃദ്രോഗിയാണെന്ന് അവകാശപ്പെടുന്ന ചാക്കോയുടെ ചികിത്സാ സംബന്ധമായ രേഖകളും കണ്ടെടുക്കാനായില്ല.
അതേസമയം, തിരുവനന്തപുരത്തെ സ്വകാര്യ ആശുപത്രിയില് ചികിത്സാ രേഖകള് ഉണ്ടെന്നും അത് എത്രയും വേഗം കോടതിയിലെത്തിക്കുമെന്നും ചാക്കോയുടെ അഭിഭാഷകന് വ്യക്തമാക്കി. ചാക്കോയെ വീട്ടില് കൊണ്ടുവരുന്നതറിഞ്ഞ് സ്ഥലത്ത് തടിച്ചു കൂടിയ ജനക്കൂട്ടം കൂകി വിളിച്ചുകൊണ്ടാണ് പ്രതിയെ സ്വീകരിച്ചത്.
