തിരുവനന്തപുരം : കമിതാക്കളുടെ സംരക്ഷണം ഏറ്റെടുക്കാനായി കേരളത്തില് പ്രണയ സംരക്ഷണ സേന പിറവിയെടുക്കാനൊരുങ്ങുന്നു. ഡല്ഹി ആസ്ഥാനമായി പ്രവര്ത്തിക്കുന്ന 'ലവ് കമാന്ഡോസി'ന്റെ ചുവടു പിടിച്ചായിരിക്കും പ്രണയസേനയുടെ പ്രവര്ത്തനം.
കെവിന്റെയും നീനുവിന്റെയും അവസ്ഥ ഇനിയൊരു കമിതാക്കള്ക്കും ഉണ്ടാകരുത് എന്ന ലക്ഷ്യത്തോടെയാണ് ലവ് കമാന്റോസ് കേരളത്തിലേയ്ക്കും എത്തുന്നത്. സംസ്ഥാനത്തെ ഓരോ വാര്ഡിലും 10 പേരെ ഉള്പ്പെടുത്തിയാകും സേനയുണ്ടാക്കുക. കോഴിക്കോട് വെസ്റ്റ് ഹില് പോളിടെക്നിക് ഹാളില് ഈ മാസം 22 ന് ആദ്യ കൂട്ടായ്മയും സംഘടിപ്പിക്കും. സേനാംഗങ്ങള്ക്ക് പ്രത്യേക പരിശീലനം നല്കും. ഒരു വര്ഷത്തിനുള്ളില് ഒരു ലക്ഷം പേര്ക്ക് പരിശീലനം നല്കുന്നതിലൂടെ പ്രണയിക്കുന്നവര്ക്ക് കാവലാകുക എന്നതാണ് സംഘടന ലക്ഷ്യം വെക്കുന്നത്.
പ്രണയത്തിലായവര്ക്ക് ആവശ്യമായ മാര്ഗ നിര്ദേശങ്ങള് നല്കാനും സംഘത്തില് വിദഗ്ധരുണ്ടാകും. രാജ്യത്താകെ ഇതുവരെയും 52,000 പ്രണയ വിവാഹങ്ങള് ഈ സംഘടനയുടെ നേതൃത്വത്തില് നടത്തിയിട്ടുണ്ട്. സംസ്ഥാനത്ത് ദുരഭിമാനക്കൊലകള് ആവര്ത്തിക്കപ്പെടാതിരിക്കാനും ആത്മാര്ത്ഥമായി പ്രണയിക്കുന്നവരെ ഒന്നിപ്പിക്കാനുമാണ് ഈ യത്നമെന്ന് ലവ് കമാന്ഡോസ് കേരളാ ചീഫ് കോ-ഓര്ഡിനേറ്റര് അനില് ജോസ് വിശദീകരിക്കുന്നു.
