കൊല്ലം: കോഴിയെ മോഷ്ടിച്ചെന്ന് ആരോപിച്ച് അന്യസംസ്ഥാന തൊഴിലാളിയെ നടത്തിയ ആള്ക്കൂട്ട കൊലപാതകത്തില് രണ്ടാംപ്രതിയും പിടിയില്. കൊല്ലത്ത് നടന്ന സംഭവത്തില് ഒന്നാംപ്രതി അഞ്ചല് സ്വദേശി ശശിധരന് പിന്നാലെ രണ്ടാം പ്രതി ആസിഫും പിടിയിലായി. രണ്ടു പ്രതികളും കുറ്റം സമ്മതിച്ചു. സംഭവത്തില് കൂടുതല് അറസ്റ്റിന് സാധ്യതയുണ്ടെന്നും പോലീസ് വ്യക്തമാക്കി.
പശ്ചിമബംഗാള് സ്വദേശി മാണിക് റോയി(32)യാണ് അഞ്ചലിലെ സ്വകാര്യാശുപത്രിയില് മരിച്ചത്. സംഭവവുമായി ബന്ധപ്പെട്ടു പനയഞ്ചേരി സ്വദേശി ശശിധരക്കുറുപ്പി(48)നെയാണ് പോലീസ് ആദ്യം അറസ്റ്റ് ചെയ്തത്. ഇതിന് പിന്നാലെ ഇന്ന് രാവിലെ അഞ്ചല് സ്വദേശി ആസിഫും പിടിയിലാകുകയായിരുന്നു. ഇയാള് കോണ്ഗ്രസ് പ്രവര്ത്തകനാണ്. മാണിക് റോയിയെ ഇയാളാണ് പിടിച്ചു തള്ളിയത്.
അഞ്ചലിനു സമീപം പനയഞ്ചേരിയില് രണ്ടാഴ്ച മുമ്പാണു സംഭവം. സുന്ദരനാചാരി എന്നയാളുടെ കോഴി മോഷണം പോയിരുന്നു. െവെകിട്ട് ആറോടെ സമീപത്തെ വീട്ടില്നിന്നു കോഴിയെ വാങ്ങി മാണിക് താമസസ്ഥലത്തേക്കു പോകവേ കലുങ്കില് ഇരുന്ന നാട്ടുകാരായ മൂന്നുപേര് തടഞ്ഞുനിര്ത്തി. കോഴിയെ മോഷ്ടിച്ചെന്നാരോപിച്ചു. തുടര്ന്ന് വാക്കേറ്റം മര്ദ്ദനത്തിലേക്ക് നീളുകയായിരുന്നു. സംഭവത്തില് മറ്റ് ചിലരുടെ പങ്കിനെക്കുറിച്ചും പോലീസ് സംശയിക്കുന്നുണ്ട്. അക്രമം തടയാതിരുന്നു, പോലീസിനെ അറിയിച്ചില്ല എന്നീ കുറ്റങ്ങളാണ് ചുമത്തിയിരിക്കുന്നത്.
രക്തം വാര്ന്നു ബോധരഹിതനായ മാണിക്കിനെ മറ്റു നാട്ടുകാരാണ് ആശുപത്രിയിലെത്തിച്ചത്. ഏതാനും ദിവസത്തെ ചികിത്സയ്ക്കുശേഷം മാണിക് കൂലിപ്പണിക്കു പോയിത്തുടങ്ങിയിരുന്നു. കഴിഞ്ഞദിവസം രാവിലെ പത്തോടെ ജോലിസ്ഥലത്തു കുഴഞ്ഞുവീണ മാണിക്കിനെ സഹപ്രവര്ത്തകര് അഞ്ചലിലെ ആശുപത്രിയില് എത്തിച്ചെങ്കിലും രക്ഷിക്കാനായില്ല. മരണത്തില് ബന്ധുക്കള് സംശയം പ്രകടിപ്പിച്ചതിനാല് തിരുവനന്തപുരം മെഡിക്കല് കോളജ് ആശുപത്രിയില് പോസ്റ്റ്മോര്ട്ടം നടത്തി. തലയ്ക്കു പിന്നിലേറ്റ ക്ഷതമാണു മരണകാരണമെന്നാണു പോസ്റ്റ്മോര്ട്ടം റിപ്പോര്ട്ട്. മൃതദേഹം ഇന്നലെ െവെകിട്ടു ബംഗാളിലേക്കു കൊണ്ടുപോയി.
