ന്യൂഡല്ഹി: എറണാകുളം-അങ്കമാലി അതിരൂപത ഭൂമി ഇടപാട് കേസില് കര്ദ്ദിനാള് മാര് ജോര്ജ് ആലഞ്ചേരിക്ക് ആശ്വാസം. ഇടപാടില് കേസെടുത്ത് അന്വേഷണം നടത്താനുള്ള ഹൈക്കോടതി സിംഗിള് ബെഞ്ച് ഉത്തരവ് റദ്ദാക്കിയ ഡിവിഷന് ബെഞ്ച് വിധി ചോദ്യം ചെയ്തുള്ള ഹര്ജികള് സുപ്രീം കോടതി തള്ളി. ഡിവിഷന് ബെഞ്ചിന്റെ ഉത്തരവ് ശരിവച്ചു. ഹര്ജിക്കാര്ക്ക് വേണമെങ്കില് മജിസ്ട്രേറ്റ് കോടതിയെ സമീപിക്കാമെന്നും ജസ്റ്റീസ് നരിമാന്റെ ബെഞ്ച് വ്യക്തമാക്കി.
മാര്ട്ടിന് പയ്യപ്പള്ളി, ഷൈന് വര്ഗീസ് എന്നിവരാണ് സുപ്രീം കോടതിയെ സമീപിച്ചത്. ഭൂമി ഇടപാട് ഗൗരവമായ വിഷയമാണെന്നും വലിയ അഴിമതിയാണെന്നും ഹര്ജിക്കാര് ചൂണ്ടിക്കാട്ടിയെങ്കിലും അതെല്ലാം മജിസ്ട്രേറ്റ് കോടതിയില് ഉന്നയിക്കാമെന്നാണ് സുപ്രീം കോടതി വ്യക്തമാക്കിയത്. കര്ദ്ദിനാളും ഇടനിലക്കാരനും തടസ്സഹര്ജിയും നല്കിയിരുന്നു.
