കൊച്ചി: മഹാരാജാസ് കോളേജില് എസ്എഫ്ഐ നേതാവ് അഭിമന്യൂ കൊല്ലപ്പെട്ട കേസില് കുത്തിവീഴ്ത്തിയയാളും പിടിയിലായതായി റിപ്പോര്ട്ട്. കേസില് ഒടുവില് പിടിയിലായിരിക്കുന്നത് പള്ളുരുത്തി ബത്തേരി സ്വദേശി അനീഷ് (28) ആണ്. കേസില് ഇന്നലെ കാമ്പസ് ഫ്രണ്ട് സംസ്ഥാന സെക്രട്ടറി മുഹമ്മദ് റിഫ പിടിയിലായിരുന്നു. ഇതിന് പിന്നാലെയാണ് അനീഷിനെയും പിടികൂടിയത്. എസ്ഡിപിഐ യുടെ തൊഴിലാളി സംഘടനായ നേതാവായ അനീഷാണോ അഭിമന്യുവിനെ കുത്തിവീഴ്ത്തിയത് എന്ന സംശയത്തിലാണ് പോലീസ്.
മറ്റുള്ളവരില് നിന്നും ഇയാളെ മാറ്റിയിരുത്തിയാണ് ചോദ്യം ചെയ്യുന്നത്. കേസില് ഇതോടെ പിടിയിലായവരുടെ എണ്ണം 14 ആയി. കേസിലെ മുഖ്യപ്രതി ആലപ്പുഴ അരക്കുറ്റി സ്വദേശി മുഹമ്മദാണ് ഇയാളാണ് അക്രമിസംഘത്തെ പുറത്ത് നിന്നും വിളിച്ചു വരുത്തിയത്. കൊച്ചിയില് നിയമവിദ്യാര്ത്ഥിയായ മുഹമ്മദ് റിഫയെ കഴിഞ്ഞ ദിവസം ബംഗലുരുവില് നിന്നും പോലീസ് പിടികൂടിയിരുന്നു. കൊലപാതകത്തില് നേരിട്ടു പങ്കാളിയായിട്ടുള്ള പ്രധാന കണ്ണി കൂടിയാണ് തലശ്ശേരി സ്വദേശിയായ മുഹമ്മദ് റിഫ. കൊലപാതകത്തിന്റെ മുഖ്യ സൂത്രധാരനും കൊലയാളി സംഘത്തെ വിളിച്ചു വരുത്തിയതിലും ഇയാള്ക്ക് പങ്കുണ്ടെന്ന പോലീസ് കണ്ടെത്തിയിരുന്നു.
അക്രമിസംഘത്തില് ഉണ്ടായിരുന്ന റിയാസിനെ പിടികൂടിയതാണ് അനീഷിലേക്ക് അന്വേഷണ സംഘത്തെ എത്തിച്ചത്. അഭിമന്യൂവിനെ കുത്തിയ മുഖ്യപ്രതി അടക്കം എല്ലാവരും അറസ്റ്റിലായതായിട്ടാണ് സൂചനകള്. എന്നാല് ആരെല്ലാമാണ് കസ്റ്റഡിയില് ഉള്ളതെന്നോ ഇവരുടെ പേരു വിവരങ്ങളോ പോലീസ് പുറത്തു വിടാന് കൂട്ടാക്കിയിട്ടില്ല. നേരത്തേ ഹാദിയ കേസില് ഹൈക്കോടതി മാര്ച്ചിനിടയില് പോലീസിനെ ആക്രമിച്ച കേസില് ജയിലിലായ അനീഷ് അടുത്തിടെയാണ് ജാമ്യത്തില് പുറത്തു വന്നത്. കേസിലെ മുഖ്യപ്രതി കാമ്പസ് ഫ്രണ്ട് ആലപ്പുഴ ജില്ലാ പ്രസിഡന്റും മഹാരാജാസ് കോളേജ് യൂണിറ്റ് സെക്രട്ടറിയുമായ ജെ.എ. മുഹമ്മദിനെ കഴിഞ്ഞ ദിവസം ആലപ്പുഴയില് എത്തിച്ച് തെളിവെടുപ്പ് നടത്തിയിരുന്നു.
