ലണ്ടന്: ജയം തേടി പരമ്പര സമനിലയിലേക്ക് എത്തിക്കാനായി ഇറങ്ങിയ ഇന്ത്യയ്ക്ക് നാലാം ടെസ്റ്റില് മികച്ച തുടക്കം. ടോസ് നേടി ബാറ്റിങ്ങ് തിരഞ്ഞെടുത്ത ആതിഥേയര്ക്ക് 36 റണ്സ് കൂട്ടിച്ചേര്ക്കുന്നതിനിടെ നാലു വിക്കറ്റുകള് നഷ്ടമായി. ഒരു റണ് മാത്രമുള്ളപ്പോള് ഓപ്പണര് കീറ്റന് ജെന്നിങ്സനെ ജസ്പ്രീത് ബുംമ്ര ആണ് പറിച്ചത്.
നാലു പന്തില് റണ്ണൊന്നും എടുക്കാതെ ബുംമ്രയുടെ പന്തില് എല്ബിയില് കുരുങ്ങിയാണ് ജെന്നിങ്സ് പുറത്തായത്. ഏഴാം ഓവറില് ഇഷാന്ത് ശര്മ്മയുടെ ആദ്യ പന്തില് എല്ബിയില് കുരുങ്ങിയാണ് ക്യാപ്റ്റന് ജോ റൂട്ടും പുറത്തായത്. 14 പന്തില് നാലു റണ്സ് മാത്രമാണ് റൂട്ടിന് സ്കോര്ബോര്ഡില് കൂട്ടിച്ചേര്ക്കാനായത്. രണ്ടു വിക്കറ്റ് നഷ്ടമായതോടെ ആതിഥേയര്ക്കായുള്ള കുക്കിന്റെ പ്രതിരോധം ഹാര്ദിക് പാണ്ഡ്യയാണ് തകര്ത്തത്. 55 പന്തില് മൂന്നു ബൗണ്ടറി ഉള്പ്പെടെ 17 റണ്സെടുത്ത കുക്കിനെ പാണ്ഡ്യ കോഹ്ലിയുടെ കൈകളില് എത്തിച്ചാണ് മടക്കിയത്. 16 പന്തില് ആറു റണ്സ് എടുത്ത ജോണി ബെയര്സ്റ്റോയുടെ വിക്കറ്റ് ബുംമ്രയാണ് പറിച്ചത്. ലഞ്ച് ബ്രേക്കിനു മത്സരം നിര്ത്തിയപ്പോള് 15 പന്തില് 13 റണ്സുമായി ജോസ് ബട്ലറും 41 പന്തില് 12 റണ്സുമായി ബെന് സ്റ്റോക്സുമാണ് ക്രീസില്. ഇംഗ്ലണ്ട് നാലു വിക്കറ്റ് നഷ്ടത്തില് 54 റണ്െസന്ന നിലയിലാണ്.
ജോ റൂട്ടിന്റെ വിക്കറ്റ് വീഴ്ത്തിയതോടെ 250 വിക്കറ്റ് നേട്ടമെന്ന ബഹുമതിയും ഇഷാന്ത് ശര്മ്മ സ്വന്തമാക്കി. 86 ടെസ്റ്റില് നിന്നാണ് ഇഷാന്ത് 250 വിക്കറ്റുകള് നേടിയത്. ഏറ്റവും പതിയെ 250 ല് എത്തിയ ബൗളര്മാരില് ഇഷാന്ത് ശര്മ്മ രണ്ടാമനായി. 127 ടെസ്റ്റില് നിന്ന് 250 വിക്കറ്റ് സ്വന്തമാക്കിയ ദക്ഷിണാഫ്രിക്കയുടെ ജാക്ക് കാലീസാണ് മുന്നില്. 81 ടെസ്റ്റുകളില് നിന്ന് പതിയെയുള്ള വിക്കറ്റ് നേട്ടം സ്വന്തമാക്കിയതില് ന്യൂസിലാന്ഡിന്റെ ഡാനിയേല് വെട്ടോറിയാണ് മൂന്നാമത്.
