ഗുവാഹത്തി: ഗുവാഹത്തിക്കു സമീപം ബ്രഹ്മപുത്രയില് 40 പേര് സഞ്ചരിച്ച ബോട്ടു മുങ്ങി രണ്ടു മരണം. സ്ത്രീകളും കുട്ടികളുമുള്പ്പെടെ നിരവധി പേരെ കാണാതായി. ബുധനാഴ്ച ഉച്ചകഴിഞ്ഞ് ഒന്നരയോടെയാണ് അപകടമുണ്ടായത്.
മുങ്ങിയ ബോട്ടില് നിന്ന് ഒന്പതു പേരെ ഇതുവരെ രക്ഷപ്പെടുത്തിയതായാണ് വിവരം. രണ്ടു പേരുടെ മൃതദേഹവും കണ്ടെത്തിയിട്ടുണ്ട്. സംസ്ഥാന ദുരന്ത നിവാരണ അതോറിറ്റിയുടെയും പോലീസിന്റെയും നേതൃത്വത്തില് അന്വേഷണം പുരോഗമിക്കുകയാണ്. കരയില് നിന്ന് 200 മീറ്റര് അകലെ വെച്ച് എന്ജിന് കേടായതിനെ തുടര്ന്നാണ് ബോട്ട് മുങ്ങിയതെന്നാണ് പ്രാഥമിക നിഗമനം. 40 യാത്രക്കാരും എട്ട് ഇരുചക്ര വാഹനങ്ങളുമാണ് ബോട്ടിലുണ്ടായിരുന്നത്.
ബോട്ടില് സഞ്ചരിക്കാന് 22 പേര്ക്കാണ് ടിക്കറ്റ് നല്കിയതെന്ന് അധികൃതര് അറിയിച്ചു. അതേസമയം ബോട്ടിനുള്ളില് അതിലേറെ ആളുകള് ഉണ്ടായിരുന്നതായി രക്ഷപ്പെട്ട യാത്രക്കാര് പറയുന്നു. അസം ഇന്ലന്ഡ് വാട്ടര് ട്രാന്സ്പോര്ട്ട് ഡിപ്പാര്ട്മെന്റിന്റെ അനുമതിയോടെ സര്വീസ് നടത്തിയിരുന്ന സ്വകാര്യ യാത്രബോട്ടാണ് അപകടത്തില്പ്പെട്ടത്.
