തിരുവനന്തപുരം: ആഴ്ചകൾ നീണ്ട ആവേശകരമായ പ്രചാരണങ്ങൾക്കും വാദപ്രതിവാദങ്ങൾക്കും ഒടുവിൽ കേരളം പോളിങ് ബൂത്തിലെത്തി വിധി രേഖപ്പെടുത്തി. കഠിനമായ ചൂടിനെ അവഗണിച്ചും വോട്ടർമാർ കൂട്ടത്തോടെ എത്തിയതോടെ സംസ്ഥാനത്ത് മികച്ച പോളിങ്ങാണ് രേഖപ്പെടുത്തിയത്. ഏറ്റവും പുതിയ വിവരങ്ങൾ പ്രകാരം 78.24 ശതമാനം പേർ വോട്ട് രേഖപ്പെടുത്തിക്കഴിഞ്ഞു. വോട്ടെടുപ്പിന്റെ അന്തിമ കണക്കുകൾ വരുമ്പോൾ ഇത് ഇനിയും വർധിക്കാൻ സാധ്യതയുണ്ട്. കഴിഞ്ഞ 2021-ലെ നിയമസഭാ തിരഞ്ഞെടുപ്പിനേക്കാൾ ഉയർന്ന പോളിങ് ശതമാനമാണിത്.
ഔദ്യോഗികമായി ആറു മണിക്ക് വോട്ടെടുപ്പ് അവസാനിച്ചെങ്കിലും പലയിടത്തും വോട്ടർമാരുടെ വലിയ നിര തന്നെ ദൃശ്യമായിരുന്നു. ഇതുവരെയുള്ള കണക്കുകൾ പ്രകാരം കോഴിക്കോട് ജില്ലയിലാണ് ഏറ്റവും കൂടുതൽ പോളിങ് നടന്നത് (81.32%). പാലക്കാടും 80 ശതമാനത്തിന് മുകളിൽ വോട്ട് രേഖപ്പെടുത്തിയിട്ടുണ്ട്. എന്നാൽ പത്തനംതിട്ടയിലാണ് ഏറ്റവും കുറഞ്ഞ പോളിങ് (70.76%) രേഖപ്പെടുത്തിയത്. വോട്ടർ പട്ടിക കൃത്യമായി പരിഷ്കരിച്ചതിനാൽ ഇത്തവണത്തെ വർധനവ് സ്വാഭാവികമാണെന്നാണ് വിലയിരുത്തൽ. ഇനി മെയ് നാലിന് വോട്ടെണ്ണുന്നത് വരെയുള്ള 25 ദിവസങ്ങൾ മുന്നണികൾക്ക് കണക്കുകൂട്ടലുകളുടേതാണ്. ഇതേസമയം വോട്ടെടുപ്പ് നടന്ന അസമിലും (85.61%) പുതുച്ചേരിയിലും (89.87%) റെക്കോർഡ് പോളിങ്ങാണ് രേഖപ്പെടുത്തിയത്.
തിരഞ്ഞെടുപ്പിനിടെ ചിലയിടങ്ങളിൽ കള്ളവോട്ട് ആരോപണങ്ങളും സംഘർഷങ്ങളുമുണ്ടായി. നാദാപുരത്ത് മറ്റൊരാളുടെ ഐഡി കാർഡുമായി വോട്ട് ചെയ്യാനെത്തിയ പ്രായപൂർത്തിയാകാത്ത ആൺകുട്ടിയെ പിടികൂടി. പാലക്കാട് ചിറ്റൂരിൽ എൻഡിഎ സ്ഥാനാർത്ഥിയുടെ ഫേസ്ബുക്ക് പേജിൽ എൽഡിഎഫ് സ്ഥാനാർത്ഥിക്കായി വോട്ട് അഭ്യർത്ഥിച്ചുള്ള പോസ്റ്റ് പ്രത്യക്ഷപ്പെട്ടത് വലിയ വിവാദത്തിന് വഴിവെച്ചു. ഇത് തന്റെ അറിവോടെയല്ലെന്ന് സ്ഥാനാർത്ഥി വിശദീകരിക്കുകയും പോസ്റ്റ് പിൻവലിക്കുകയും ചെയ്തു. കാസർകോട് തൃക്കരിപ്പൂരിൽ വോട്ടെടുപ്പിനിടെ യുഡിഎഫിന്റെ വനിതാ ബൂത്ത് ഏജന്റിന് നേരെ നായ്ക്കുരണപ്പൊടി എറിഞ്ഞതായും പരാതി ഉയർന്നിട്ടുണ്ട്.
ഉതിരനൂർ ഗവൺമെന്റ് ഹയർ സെക്കണ്ടറി സ്കൂളിലെ ബൂത്തിലാണ് മുൻ ബ്ലോക്ക് പഞ്ചായത്ത് അംഗം കൂടിയായ രതിലയ്ക്ക് നേരെ ഈ ആക്രമണമുണ്ടായത്. ശാരീരിക അസ്വസ്ഥതകൾ അനുഭവപ്പെട്ടതിനെ തുടർന്ന് ഇവരെ ഉടൻ തന്നെ തൃക്കരിപ്പൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. സംസ്ഥാനത്തിന്റെ വിവിധ ഭാഗങ്ങളിൽ ഒറ്റപ്പെട്ട ഇത്തരം അനിഷ്ട സംഭവങ്ങൾ ഒഴിച്ചുനിർത്തിയാൽ വോട്ടെടുപ്പ് പൊതുവെ സമാധാനപരമായിരുന്നു. വോട്ടിങ് യന്ത്രങ്ങളിലെ തകരാറുകൾ മൂലം ചിലയിടങ്ങളിൽ വോട്ടെടുപ്പ് വൈകിയെങ്കിലും പിന്നീട് അത് പരിഹരിക്കപ്പെട്ടു.
