പൊട്ടിയ കയ്യുമായി ക്രീസില്‍, ഒറ്റകൈ കൊണ്ട് തടുത്തത് ബൗണ്‍സര്‍ ഉള്‍പ്പെടെ: ബംഗ്ലാ താരം തമീമിനെ പ്രശംസകൊണ്ട് മൂടി സോഷ്യല്‍മീഡിയ, വീഡിയോ

ദുബായ്: ഏഷ്യാകപ്പ് ക്രിക്കറ്റ് ടൂര്‍ണമെന്റിന്റെ ആദ്യ മത്സരം ബി ഗ്രൂപ്പ് ടീമുകളായ ബംഗ്ലാദേശും ശ്രീലങ്കയും തമ്മിലായിരുന്നു. ലങ്കയ്‌ക്കെതിരെ 137 റണ്‍സിന്റെ ആധികാരിക ജയത്തോടെ ബംഗ്ലാദേശ് ഏഷ്യാകപ്പില്‍ വിജയക്കുതിപ്പിന് തുടക്കമിടുകയും ചെയ്തു. ടോസ് നേടിയ ബംഗ്ലാദേശ് ആദ്യം ബാറ്റിങ്ങിന് ഇറങ്ങി. എന്നാല്‍ രണ്ടു റണ്‍സ് കൂട്ടിച്ചേര്‍ക്കുന്നതിനിടെ രണ്ടു വിക്കറ്റുകള്‍ നഷ്ടം. പിന്നാലെ പരിക്കേറ്റ് ഓപ്പണര്‍ തമീം ഇഖ്ബാലും റിട്ടയര്‍ ചെയ്തു. 150 പന്തില്‍ നിന്ന് 11 ഫോറും നാലു സിക്‌സുമായി 144 റണ്‍സെടുത്ത മുന്‍ ക്യാപ്റ്റന്‍ മുഷ്ഫിഖുര്‍ റഹീമിന്റെ കരുത്തന്‍ സെഞ്ചുറിയാണ്.

എന്നാല്‍ കഥയിലെ താരം സെഞ്ചുറികൊണ്ട് ബംഗ്ലാദേശിനെ രക്ഷിച്ച റഹിം അല്ല, അതുക്കുംമേലേ ആരാധകരുടെ മനസില്‍ ഇടംപിടിച്ചത് പരിക്കേറ്റ് പുറത്തുപോയ തമീം ആയിരുന്നു. രണ്ടു റണ്‍സെടുത്ത് നില്‍ക്കുമമ്പാള്‍ ആണ് സുരംഗ ലക്മലിന്റെ പന്തില്‍ ഷോട്ടിനു ശ്രമിക്കവെ ഇടംകൈയിന്റെ റിസ്റ്റില്‍ പന്തുകൊണ്ടത്. വേദനകൊണ്ട് പുളഞ്ഞ താരം ഗാലറിയിലേക്ക് മടങ്ങുകയും ചെയ്തു. തുടര്‍ന്ന് ആശുപത്രിയില്‍ എത്തിച്ച് കൈയ്ക്ക് പൊട്ടലുണ്ടെന്ന് കണ്ടെത്തുകയും ചെയ്തു.

ബംഗ്ലാദേശിന്റെ ബാറ്റിങ്ങ് അവസാനത്തോട് അടുക്കുമ്പോളാണ് 47-ാം ഓവറില്‍ ഒന്‍പതാം വിക്കറ്റില്‍ പൊട്ടിയ കൈയുമായി ഒറ്റക്കെയില്‍ ബാറ്റുമേന്തി തമീം വീണ്ടും ക്രീസിലെത്തി ക്രിക്കറ്റ് ലോകത്തെ ഞെട്ടിച്ചത്. മുഷ്ഫിഖറിനൊപ്പം ഒരറ്റം കാത്ത് 32 റണ്‍സാണ് അവസാന വിക്കറ്റില്‍ കൂട്ടിച്ചേര്‍ത്തത്. ഇതിനിടെ തനിക്കുനേരെ എത്തിയ ബൗണ്‍സര്‍ ഒരു കൈ കൊണ്ട് തട്ടിയകറ്റിയതും ആരാധകരുടെ ചങ്കിടിപ്പിച്ചു. ഒറ്റക്കെയ്യില്‍ ബാറ്റ് ഏന്തിയ തമീമിനെ പ്രശംസകള്‍ കൊണ്ട് പൊതിയുകയാണ് സോഷ്യല്‍ മീഡിയ.