ക്യാമ്പ് ന്യൂ: ക്രിസ്ത്യാനോ റൊണാള്ഡോ ഇറ്റലിയിലേക്ക് ചേക്കേറിയതോടെ ലാലിഗയില് വൈരം അവസാനിച്ചെങ്കിലും യുവേഫാ ചാമ്പ്യന്സ് ലീഗില് മെസ്സിയോ റൊണാള്ഡോ മികച്ച താരമെന്ന ചോദ്യം ഇപ്പോഴും പ്രസക്തമാണ്. കഴിഞ്ഞ മത്സരത്തില് മെസ്സി ഹാട്രിക് നേടിയതോടെ ചാമ്പ്യന്സ് ലീഗ് ഫുട്ബോളില് ഇരുവരും തമ്മില് ഒരു കളിയില് നേടുന്ന മൂന്നു ഗോളുകളുടെ കാര്യത്തില് മത്സരം വീണ്ടും തുടങ്ങി.
ഇന്നലെ പിഎസ്വി ഏന്തോവനെതിരേ ഹാട്രിക് നേടിയതോടെ മെസ്സി ചാമ്പ്യന്സ് ലീഗിലെ ഹാട്രിക്കുകളുടെ കാര്യത്തില് ക്രിസ്ത്യാനോയെ പിന്നിലാക്കി. ഇന്നലത്തെ മത്സരത്തോടെ ക്രിസ്ത്യാനോയേക്കാള് ഒരു ഹാട്രിക് കൂടുതല് നേടാനാണ് മെസ്സിക്ക് കഴിഞ്ഞത്. എന്നാല് അടുത്ത ദിവസം ഇറ്റാലിയന് ചാമ്പ്യന്മാരായ യുവന്റസ് കളത്തില് എത്തുന്നതോടെ ക്രിസ്ത്യാനോ ഒപ്പമെത്തുമോ എന്നാണ് ആരാധകര് നോക്കുന്നത്.
ഡച്ച് ക്ളബ്ബിനെതിരേയുള്ള ഈ സീസണിലെ ആദ്യ മത്സരം 4-0 നായിരുന്നു മെസ്സിയുടെ ബാഴ്സിലോണ സ്വന്തമാക്കിയത്. കളിയിലെ രണ്ടാം ഗോള് പക്ഷേ ഫ്രഞ്ച് താരം ഡംബലേയായിരുന്നു നേടിയത്. ആദ്യ പകുതിയില് ഫ്രീകിക്കില് നിന്നും ആദ്യ ഗോള് കുറിച്ച മെസ്സി രണ്ടാം പകുതിയില് അതിസുന്ദരമായി രണ്ടു ഗോളുകള് കൂടി നേടിയതോടെ ഹാട്രിക്കുകളുടെ എണ്ണം എട്ടായി.
പക്ഷേ ഏഴു ഹാട്രിക് നേടിയ ക്രിസ്ത്യാനോ റൊണാള്ഡോ തൊട്ടു പിന്നിലുണ്ടെന്ന് മാത്രം. തുടര്ച്ചയായി 14 ാം ചാമ്പ്യന്സ്ലീഗ് മത്സരങ്ങള്ക്ക് ഇറങ്ങുന്ന മെസ്സി അക്കാര്യത്തില് റയലിന്റെ മുന് താരം റൗള് ഗോണ്സാലസിന് തൊട്ടു പിന്നില് എത്തിയിരിക്കുകയാണ്.
