ബാഗ്ദാദ്: സാമൂഹ്യമാധ്യമങ്ങളില് ദശലക്ഷക്കണക്കിന് ഫോളോവേഴ്സുള്ള ഇറാഖിമോഡലും സാമൂഹ്യമാധ്യമ താരവുമായ ടാറാ ഫറേസ് വെടിയേറ്റു മരിച്ചു. ബാഗ്ദാദില് സ്വന്തം പോര്ഷേ കാറില് വെടിയേറ്റ നിലയില് 22 കാരിയെ കണ്ടെത്തുകയായിരുന്നു. വ്യാഴാഴ്ച ഉച്ചയ്ക്ക് ശേഷം കാംസാറയില് ഇവര്ക്ക് നേരെ ഒരു കൂട്ടം തോക്കുധാരികള് ചുറ്റും നിന്ന് വെടി ഉതിര്ക്കുകയായിരുന്നു. ഇന്സ്റ്റാഗ്രാമില് സ്ഥിരം ഫാഷന്ഫോട്ടോകള് പോസ്റ്റ് ചെയ്യാറുള്ള ഇവര്ക്ക് അനേകം ഫോളോവേഴ്സാണ് ഉള്ളത്. മരണത്തിന് പിന്നാലെ അവരുടെ പേജില് ''അള്ളാഹു അവളോട് ക്ഷമിച്ച് ദയ കാട്ടട്ടെ'' എന്ന അറബിയിലെ ഒരു പോസ്റ്റും പ്രത്യക്ഷപ്പെട്ടിരുന്നു.
മൂന്ന് തവണ വെടിയേറ്റ ഇവരെ പ്രാദേശികസമയം വൈകിട്ട് 5.45 ന് ഷെയ്ഖ് സെയ്ദ് ആശുപത്രിയില് എത്തിച്ചിരുന്നു. നാലു വര്ഷം മുമ്പ് ബാഗ്ദാദിലെ സൗന്ദര്യറാണിയായി തെരഞ്ഞെടുക്കപ്പെട്ടയാളാണ് ടാറാ ഫെറെസ്. ഇവരുടെ കൊലപാതകത്തില് അന്വേഷണം ആരംഭിച്ചിട്ടുണ്ട്. മരണവിവരം പുറത്തു വന്നതിന് പിന്നാലെ ഇവര്ക്ക് ആദരാഞ്ജലി അര്പ്പിച്ചുകൊണ്ട് പേജില് ആരാധകരുടെ തള്ളിക്കയറ്റമാണ്. 2014 ല് മിസ് ബാഗ്ദാദായി മത്സരിച്ചതിന് പിന്നാലെയാണ് ടാറാ താരമായി ഉദിച്ചുയര്ന്നത്. സാമൂഹ്യമാധ്യമ താരത്തിനായി ഇറാഖില് നടന്ന വോട്ടെടുപ്പില് തെരഞ്ഞെടുക്കപ്പെട്ടതിന് തൊട്ടു പിന്നാലെയാണ് ടാറാ വെടിയേറ്റു മരിച്ചത്.
പിന്നീട് ലൈഫ് സ്റ്റൈലിലൂടെ ഇന്സ്റ്റാഗ്രാമില് സെന്സേഷനായി മാറിയ ടാറായ്ക്ക് 2.6 ദശലക്ഷം ഫോളോവേഴ്സാണ് ഉണ്ടായത്. കുര്ദ്ദുകള്ക്ക് ഭൂരിപക്ഷമുള്ള എര്ബിലിലായിരുന്നു ഇവര് താമസിച്ചിരുന്നത്. അവിടെ നിന്നും ബാഗ്ദാദിലേക്ക് മാറിയിരുന്നു. ഏതാനും ദിവസം മുമ്പായിരുന്നു ഇറാഖി വനിതാവിമോചന പ്രവര്ത്തക സൗദ് അല് അലി ബസ്രയില് വെടിയേറ്റ് മരിച്ചത്. അതിന് മുമ്പായിരുന്നു ബാര്ബി ബ്യൂട്ടി സെന്ററായ ബാര്ബിയുടെ ഉടമ നിഗൂഡമായ സാഹചര്യത്തില് മരണപ്പെട്ടത്. ടാറായുടെ മരണം വിവേചനത്തിന്റെയും അവകാശങ്ങളുടെയും സ്വാതന്ത്ര്യത്തിന്റെയും ലംഘനങ്ങളുടെ അലര്ച്ചയാണെന്നും അതിന് സഹതാപം മതിയാകില്ലെന്നായിരുന്നു ഒരു ആരാധക കുറിച്ചത്.
