കോട്ടയം: ബിഷപ്പ് ഫ്രാങ്കോ മുളയ്ക്കലിനെതിരായ ബലാത്സംഗക്കേസ് അട്ടിമറിക്കാന് ശ്രമം നടക്കുന്നതായി സേവ് സിസ്റ്റേഴ്സ് ആക്ഷന് കൗണ്സില്. കേസ് അട്ടിമറിക്കാനുള്ള ഗൂഢ നീക്കത്തില് പോലീസും സര്ക്കാരും ഒത്തുകളിക്കുന്നതായി സംശയിക്കുന്നുവെന്നും എസ്.ഒ.എസ് പത്രക്കുറിപ്പില് ആരോപിച്ചു. കേസിലെ സാക്ഷികള് കൂട്ടത്തോടെ മൊഴി മാറ്റുകയും ബിഷപ്പുമാരടക്കം സഭയുടെ ഉന്നതര് ഫ്രാങ്കോയെ ജയിലില് സന്ദര്ശിച്ച് പിന്തുണ പ്രഖ്യാപിക്കുകയും ചെയ്യുന്ന സാഹചര്യത്തിലാണ് എസ്.ഒ.എസിന്റെ പ്രതിഷേധം.
ബിഷപ്പിനെതിരെ മൊഴി കൊടുത്ത രണ്ട് പ്രധാന സാക്ഷികള് ഇതിനകം കുറുമാറിക്കഴിഞ്ഞു. ബിഷപ്പിനെതിരെ മൊഴി കൊടുത്ത ഫോട്ടോഗ്രാഫര് ഷിജോയും കഴിഞ്ഞ ദിവസം കൂറുമാറിയതായാണ് പുതിയ വിവരം. ഇടവക വികാരി ഫാ. നിക്കോളാസ് മണിപ്പറമ്പില് കഴിഞ്ഞ ദിവസം കുറുവിലങ്ങാട് മഠത്തില് എത്തി ഇരയായ കന്യാസ്ത്രീയെ സ്വാധീനിക്കാന് ശ്രമിച്ചത് ഗുരുതരമായ നിയമലംഘനമാണെന്നും വാര്ത്താക്കുറിപ്പ് ചൂണ്ടിക്കാട്ടുന്നു. വികാരിക്കൊപ്പം കൊലക്കേസ് പ്രതി എത്തിയത് ഗൗരവത്തിന്റെ തോത് വര്ധിപ്പിക്കുന്നുവെന്നും വാര്ത്താക്കുറിപ്പ് ചൂണ്ടിക്കാട്ടുന്നു.
സാക്ഷിയായ ഷിജോ എറണാകുളം റേഞ്ച് ഐജിയുടെ ഓഫീസില് എത്തിച്ച സി.ഡി, പെന്ഡ്രൈവ്, ഫോട്ടോ എന്നിവ അടങ്ങിയ കവറാണ് പി.സി ജോര്ജ് എം.എല്.എ വാര്ത്താസമ്മേളനത്തില് ഉയര്ത്തിക്കാട്ടിയതെന്ന ഗുരുതര ആരോപണവും സേവ് സിസ്റ്റേഴ്സ് ആക്ഷന് കൗണ്സില് ഉന്നയിക്കുന്നു. ഐജി ഓഫീസില് മാത്രം കൊടുത്ത ഫോട്ടോ പി.സി ജോര്ജിന്റെ കയ്യില് എത്തിയത് ദുരൂഹമാണ്. വീണ്ടും ഇരയെ അപമാനിക്കുന്ന പി.സി ജോര്ജിന് തന്നെ ആര്ക്കും ഒന്നും ചെയ്യാനാകില്ലെന്ന ധാര്ഷ്ട്യമാണെന്നും എസ്.ഒ.എസ് ആരോപിക്കുന്നു.
