അക്ഷരലക്ഷം പരീക്ഷയില് 98 ശതമാനം മാര്ക്കു നേടി വിജയിച്ച കാര്ത്ത്യായനി അമ്മയെ ആനുമോദിച്ചശേഷം ആലപ്പുഴ ജില്ലാ കളക്ടര് എസ് സുഹാസിന്റെ ഹൃദയസ്പര്ശിയായ ഫേസ്ബുക്ക് പോസ്റ്റ് ശ്രദ്ധേയമാകുന്നു. ആ അമ്മയുടെ കണ്ണുകളിലെ തിളക്കം എന്നില് ഉളവാക്കിയ പോസിറ്റിവ് എനര്ജി ചെറുതല്ല. നേട്ടങ്ങള് കൈവരിക്കാന് പ്രായം ഒരു തടസമല്ലെന്ന് നമുക്ക് കാണിച്ചുതന്ന കാര്ത്യായനി അമ്മ ഏത് ചെറിയ പരാജയത്തില് പോലും മനസിടറി പോകുകയും ആത്മഹത്യയില് വരെ ചെന്നെത്തുകയും ചെയ്യുന്ന ഇന്നത്തെ തലമുറയ്ക്ക് മാതൃകയാണെന്ന് കളക്ടര് കുറിക്കുന്നു.
ഫേസ്ബുക്ക് പോസ്റ്റിന്റെ പൂര്ണ്ണരൂപം:
യഥാര്ഥ ജീവിതത്തിലെ ഒരു സൂപ്പര്താരത്തെ കണ്ട സന്തോഷത്തിലാണ് ഈ പോസ്റ്റിടുന്നത്. അക്ഷരലക്ഷം പരീക്ഷയില് 98 ശതമാനം മാര്ക്കോടെ ഒന്നാം റാങ്ക് നേടിയ 96 കാരി കാര്ത്യായനി അമ്മയെ മുട്ടത്തെ അവരുടെ വീട്ടില് ചെന്ന് കണ്ടു. ആ അമ്മയുടെ കണ്ണുകളിലെ തിളക്കം എന്നില് ഉളവാക്കിയ പോസിറ്റിവ് എനര്ജി ചെറുതല്ല. നേട്ടങ്ങള് കൈവരിക്കാന് പ്രായം ഒരു തടസമല്ലെന്ന് നമുക്ക് കാണിച്ചുതന്ന കാര്ത്യായനി അമ്മ ഏത് ചെറിയ പരാജയത്തില് പോലും മനസിടറി പോകുകയും ആത്മഹത്യയില് വരെ ചെന്നെത്തുകയും ചെയ്യുന്ന ഇന്നത്തെ തലമുറയ്ക്ക് മാതൃകയാണ്. സമ്മാനമായി ഒരു പേന നല്കിയപ്പോള് ആ മുഖത്ത് കുഞ്ഞുങ്ങളുടേതിന് സമാനമായ ജിജ്ഞാസ കാണാനായി. അമ്മ അത് തിരിച്ചുമറിച്ചും നോക്കി എന്നിട്ട് സന്തോഷത്തോടെ തലയാട്ടി. ആ പേന ഉപയോഗിച്ച് അമ്മ ആദ്യത്തെ നിവേദനം എഴുതി. ചേപ്പാട് പഞ്ചായത്തിലെ കുടിവെള്ള ക്ഷാമം പരിഹരിക്കണം. ഉടന് തന്നെ K-W-A E-E A-L-P-Y ഫോണില് വിളിച്ചു രണ്ടു ദിവസത്തിനകം പ്രശ്നം പരിഹരിക്കണമെന്ന് നിര്ദ്ദേശിച്ചു. യാത്ര പറഞ്ഞിറങ്ങുമ്പോള് മനസ് നിറഞ്ഞിരുന്നു. അമ്മയ്ക്ക് ഒരു ബിഗ് സല്യൂട്ട്...
