കോഴിക്കോട്: ബന്ധുനിയമന വിവാദത്തില് കുടുങ്ങി മന്ത്രി കെ.ടി. ജലീലിന്റെ ബന്ധു കെ.ടി. അദീബ് രാജിവെച്ചു. ന്യൂനപക്ഷ വികസന ധനകാര്യ കോര്പ്പറേഷന് ജനറല് മാനേജര് സ്ഥാനത്തു നിന്നാണ് വിവാദമായതിനെ തുടര്ന്ന് രാജിവെച്ചൊഴിഞ്ഞത്. രാജി അനുവദിക്കണമെന്ന് ആവശ്യപ്പെട്ട് കോര്പ്പറേഷന് എംഡിക്ക് അയച്ച കത്തിലെ വിവരങ്ങള് പുറത്തായി.
ആത്മാഭിമാനത്തിന് മുറിവേറ്റു..സ്ഥാനത്തു നിന്ന് ഒഴിയാണ് അനുവദിക്കണം... എന്നാണ് കത്തില് എഴുതിയിരിക്കുന്നത്. സൗത്ത് ഇന്ത്യന് ബാങ്ക് സീനിയര് മാനേജര് പദവിയിലേക്ക് തിരികെ പോകാന് അനുവദിക്കണമെന്നാണ് കത്തിലെ ആവശ്യം. അദീബിന്റെ രാജിക്കത്ത് നാളെ ചേരുന്ന കോര്പറേഷന് ഡയറക്ടര് ബോര്ഡ് യോഗം ചര്ച്ച ചെയ്യും.
ന്യൂനപക്ഷ ധനകാര്യ വികസന കോര്പ്പറേഷനിലെ ജനറല് മാനേജര് സ്ഥാനത്തു കഴിഞ്ഞ മാസമാണ് കെ.ടി. അദീബ് നിയമിതനാകുന്നത്. 2016 ഓഗസ്റ്റില് നടന്ന അഭിമുഖത്തില് പങ്കെടുക്കാതെ, എന്നാല് അഭിമുഖത്തില് പങ്കെടുത്തവര്ക്ക് മതിയായ യോഗ്യത ഇല്ലെന്ന് കാരണം ചൂണ്ടിക്കാട്ടിയാണ് മന്ത്രിയുടെ ബന്ധുവായ അദീബിനെ നിയമിച്ചത്. ഇതു പിന്നാലെ വിവാദമാകുകയായിരുന്നു.
