തിരുവനന്തപുരം: സനല്കുമാര് വധക്കേസില് ക്രൈംബ്രാഞ്ച് സംഘം അരിച്ചുപെറുക്കിയ ഡി.വൈ.എസ്.പി ബി.ഹരികുമാര് ആത്മഹത്യ നിലയില്. തിരുവനന്തപുരം കല്ലമ്പലത്തെ വീടിന്റെ ചായ്പില് തൂങ്ങിമരിച്ച നിലയിലാണ് മൃതദേഹം കണ്ടെത്തിയത് എന്ന് ആറ്റിങ്ങല് പോലീസ് അറിയിച്ചു. സനലിന്റെ കൊലപാതകത്തിനു ശേഷം കഴിഞ്ഞ ഒമ്പതു ദിവസമായി ഹരികുമാര് ഒളിവിലായിരുന്നു.
ഹരികുമാര് ഇന്നലെ നാലു മണിയോടെ കല്ലമ്പലത്ത് എത്തിയിരുന്നു. ക്രൈംബ്രാഞ്ച് അന്വേഷണം ഊര്ജിതമാക്കിയതോടെ കീഴടങ്ങാനായി വീട്ടില് എത്തിയതാണെന്ന് സൂചനയുണ്ടായിരുന്നു. ഡി.വൈ.എസ്.പി കര്ണാടകയില് ഒളിവിലായിരുന്നു. ഇന്നലെ വൈകിട്ട് വീട്ടില് എത്തിയ ഹരികുമാര് രാത്രിയോടെ കീഴടങ്ങിയേക്കുമെന്ന് സൂചനയുണ്ടായിരുന്നു. എന്നാല് പോലീസിനെ തെറ്റിദ്ധരിപ്പിച്ച ശേഷം ജീവനൊടുക്കുകയായിരുന്നുവെന്നാണ് കരുതുന്നത്.
മുന്കൂര് ജാമ്യാപേക്ഷ നാളെ തിരുവനന്തപുരം സി.ജെ.എം കോടതിയില് പരിഗണിക്കാനിരിക്കേയാണ് ജീവനൊടുക്കിയത്. ജാമ്യത്തിനുള്ള സാധ്യത കുറവാണെന്നും കീഴടങ്ങാനുള്ള സമ്മര്ദ്ദം ശക്തമാകുകയും ചെയ്തതോടെയാണ് ജീവനൊടുക്കിയതെന്ന് കരുതിയത്. ഹരികുമാറിനൊപ്പം ഒളിവില് പോയ ബിനുവിന്റെ മകനെ അറസ്റ്റു ചെയ്തതോടെ സമ്മര്ദ്ദം ശക്തമാകുകയും കീഴടങ്ങുമെന്ന പ്രതീതി ജനിപ്പിച്ച ശേഷം വീട്ടിലെത്തി രാത്രി ആത്മഹത്യ ചെയ്യുകയുമായിരുന്നു കരുതുന്നു. പോലീസിന് ഒരിക്കലും പിടികൊടുക്കില്ലെന്ന നിലപാടിലായിരുന്നു ഹരികുമാര്.
കര്ണാടക വന അതിര്ത്തിയില് ഒളിവില് ആയിരുന്ന ഹരികുമാര് അറസ്റ്റിനു വേണ്ടി കേരളത്തില് നടക്കുന്ന സമരങ്ങളൊന്നും ഒരുപക്ഷേ അറിഞ്ഞുകാണില്ല. നാട്ടില് തിരിച്ചെത്തിയതോടെയാണ് എല്ലാം കൈവിട്ടുപോയെന്ന് മനസ്സിലാക്കുകയും മാനസിക സമ്മര്ദ്ദം ശക്തമായതോടെ ജീവനൊടുക്കുകയുമായിരുന്നുവെന്ന് കരുതുന്നു. രാവിലെ 10 മണി കഴിഞ്ഞതോടെ കല്ലമ്പലം തോട്ടയ്ക്കാട്ടെ വീടിന്റെ ചായ്പില് ഒരാള് തൂങ്ങിനില്ക്കുന്ന വിവരം നാട്ടുകാര് പോലീസിനെ അറിയിച്ചത്. സ്പെഷ്യല് ബ്രാഞ്ച് അടക്കമുള്ളവര് എത്തി പരിശോധിച്ച ശേഷമാണ് ഹരികുമാര് ആണ് മരിച്ചതെന്ന് സ്ഥിരീകരിച്ചത്.
ദൈവം ദൈവത്തിന്റെ വിധി നടപ്പാക്കിയെന്ന് സനല്കുമാറിന്റെ ഭാര്യ വിജി ഡി.വൈ.എസ്.പിയുടെ മരണവാര്ത്തയോട് പ്രതികരിച്ചു. ഡി.വൈ.എസ്.പി നിയമത്തിന് വിധേയനായി അര്ഹിക്കുന്ന ശിക്ഷ കിട്ടണമെന്നായിരുന്നു തങ്ങളുടെ ആഗ്രഹം എന്നാല് ദൈവം ദൈവത്തിന്റെ നീതി നടപ്പാക്കിയെന്ന് സനല്കുമാറിന്റെ സഹോദരി പറഞ്ഞു. കൂട്ടുപ്രതികളെ അറസ്റ്റു ചെയ്യുന്നതുവരെ സമരവുമായി മുന്നോട്ടുപോകുമെന്നും സഹോദരി പറഞ്ഞു.
ഡി.വൈ.എസ്.പി അറസ്റ്റു ചെയ്യണമെന്ന് ആവശ്യപ്പെട്ടാണ് സമരം തുടങ്ങിയത്. അപ്പോള് തന്നെ ഡി.വൈ.എസ്.പിയുടെ മരണവാര്ത്ത അറിയുന്നത്. സര്ക്കാരിന്റെ ഭാഗത്തുനിന്ന് കുടുംബത്തിന് സഹായം പ്രതീക്ഷിക്കുന്നുണ്ട്. സര്ക്കാര് നീതി നടപ്പാക്കിയില്ലെങ്കില് സമരവുമായി മുന്നോട്ടുപോകും. സനല്കുമാറിന് നീതി തേടി ഭാര്യ വിജിയും കുട്ടികളും മറ്റ് കുടുംബാംഗങ്ങളും സനല്കുമാര് മരിച്ചുവീണ സ്ഥലത്ത് ഇന്ന് നിരാഹാര സമരം നടത്തുകയായിരുന്നു. ഹരികുമാര് ജീവനൊടുക്കിയ വാര്ത്ത അറിഞ്ഞതോടെ കുടുംബം സമരം അവസാനിപ്പിച്ചു.
ഡിവൈഎസ്.പി മരിച്ചുവെങ്കിലും സമരത്തില് നിന്ന് പിന്മാറില്ലെന്ന് വിഎസ്ഡിപി നേതാവ് വിഷ്ണുപുരം ചന്ദ്രശേഖരന് അറിയിച്ചു. ഹരികുമാര് മരിച്ചുവെങ്കിലും അദ്ദേഹത്തെ ഇതുവരെ ഒളിവില് കഴിയാന് സഹായിച്ച എല്ലാവരേയും അറസ്റ്റു ചെയ്യണം. ഡി.ജി.പി അടക്കമുള്ളവര് ഡി.വൈ.എസ്.പിയെ സഹായിച്ചിട്ടുണ്ട്. അവര്ക്കെതിരെ നടപടി എടുക്കുന്നതുവരെ സമരവുമായി മുന്നോട്ടുപോകുമെന്നും വിഷ്ണുപുരം ചന്ദ്രശേഖരന് അറിയിച്ചു.
