കൊച്ചിയില്‍ മൂന്ന് ബോഡോ തീവ്രവാദികള്‍ അറസ്റ്റില്‍, ബഹളത്തെ തുടര്‍ന്ന് സഭ ഇന്നത്തേയ്ക്ക് പിരിഞ്ഞു.. അറിയാം പ്രധാന വാര്‍ത്തകള്‍

കൊച്ചി : കൊച്ചി മണ്ണൂരില്‍ മൂന്ന് ബോഡോ തീവ്രവാദികള്‍ അറസ്റ്റില്‍. ആസാം സ്വദേശികളാണ് അറസ്റ്റിലായിരിക്കുന്നത്. ഇന്റലിജന്‍സ് വിവരത്തെ തുടര്‍ന്ന് നടത്തിയ പരിശോധനയിലാണ് ഇവര്‍ പിടിയിലായത്.

ആസാമില്‍ നിന്നെത്തിയ ഇവര്‍ കൊച്ചിയില്‍ ഒളിവില്‍ കഴിയുകയായിരുന്നു. ആസാം പോലീസിന് നല്‍കിയ വിവരത്തെ തുടര്‍ന്നാണ് പോലീസ് അന്വേഷണം തുടങ്ങിയത്. ആസാമില്‍ കൊലപാതക കേസുകളില്‍ അടക്കം പ്രതികളാണ് ഇവരെന്നാണ് പുറത്തു വരുന്ന വിവരം.

ന്യൂഡല്‍ഹി: നോട്ട് നിരോധനത്തെ തള്ളിപ്പറഞ്ഞ് പ്രധാനമന്ത്രി മോഡിയുടെ മുന്‍ സാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യന്‍. നോട്ട് നിരോധനം സമ്പദ്ഘടനയ്ക്ക് കനത്ത ആഘാതമായെന്ന് അരവിന്ദ് സുബ്രഹ്മണ്യന്‍ വിമര്‍ശിച്ചു. നോട്ട് നിരോധനത്തിന് മുമ്പ് സാമ്പത്തിക വളര്‍ച്ചാ നിരക്ക് 8 ശതമാനമായിരുന്നത്, നോട്ട് നിരോധനത്തിന് ശേഷം ഏഴ് പാദങ്ങളില്‍ 6.8 ശതമാനമായി താഴ്ന്നുവെന്ന് അദ്ദേഹം പറയുന്നു.

മലപ്പുറം: സുപ്രീംകോടതി വിധിയുടെ പശ്ചാത്തലത്തില്‍ ശബരിമല ദര്‍ശനത്തിന് തയ്യാറായി കൊച്ചിയില്‍ വാര്‍ത്താസമ്മേളനം നടത്തിയ യുവതികള്‍ക്കൊപ്പമുണ്ടായിരുന്ന യുവാവിന് നേരെ ആക്രമണം. മലപ്പുറം വഴിക്കടവ് സ്വദേശി സംഗീതിനെയാണ് ആക്രമിച്ചത്. പരിക്കേറ്റ സംഗീതിനെ നിലമ്പൂര്‍ താലൂക്ക് ആശുപത്രിയില്‍ പ്രവേശിപ്പിച്ചു.

തിരുവനന്തപുരം: ശബരിമല വിഷയം ചര്‍ച്ച ചെയ്യണമെന്ന് ആവശ്യപ്പെട്ട് പ്രതിപക്ഷം സഭ സ്തംഭിപ്പിച്ചു. പ്രതിപക്ഷ ബഹളത്തെ തുടര്‍ന്ന് സഭ ഇന്നത്തേയ്ക്ക് പിരിഞ്ഞു. ബഹളം തുടര്‍ന്നതോടെ സഭാ നടപടികള്‍ വേഗത്തിലാക്കി പിരിയുകയായിരുന്നു.

ശബരിമല വരുമാനത്തില്‍ 25 കോടിയുടെ കുറവ്. മണ്ഡലകാലം തുടങ്ങി 11 ദിവസത്തെ വരുമാന കണക്കില്‍ മുന്‍ വര്‍ഷത്തെ അപേക്ഷിച്ച് 60 ശതമാനത്തിന്റെ കുറവുണ്ടായതായാണ് റിപ്പോര്‍ട്ട്.

കഴിഞ്ഞ മണ്ഡല കാലത്ത് 11 ദിവസം കൊണ്ട് 41.7 കോടി രൂപ ലഭിച്ചപ്പോള്‍ ഇക്കുറി 16.24 കോടി രൂപ മാത്രമാണ് കിട്ടിയത്. കാണിയ്ക്ക വരുമാനം പകുതിയായി കുറഞ്ഞു. അപ്പം അരവണ വില്‍പനയിലാണ് വലിയ കുറവുണ്ടായത്. അപ്പം വില്‍പന അഞ്ചില്‍ ഒന്നായും അരവണ വില്‍പന മൂന്നിലൊന്നായും കുറഞ്ഞു. അരവണ വരുമാനത്തില്‍ 12 കോടിയുടെ കുറവുണ്ടായി. 3.07 കോടി രൂപയുടെ അപ്പം വിറ്റ സ്ഥാനത്ത് ഇക്കുറി 61 ലക്ഷത്തിന്റെ വില്‍പന മാത്രമാണ് നടന്നത്.