തിരുവനന്തപുരം: മുഖ്യമന്ത്രി പിണറായി വിജയനെതിരെ ബിജെപി സംസ്ഥാന ജനറല് സെക്രട്ടറി എഎന് രാധാകൃഷ്ണന്. പിണറായി വിജയന് നാലു കേസുകളില് പ്രതിയാണെന്നും, അദ്ദേഹത്തെ ഉടന് കസ്റ്റഡിയില് എടുക്കണമെന്നും രാധാകൃഷ്ണന് പറഞ്ഞു.
കേസുകളും വാറന്റുകളും ഉള്ളതുകൊണ്ടാണ് ബിജെപി നേതാവ് കെ സുരേന്ദ്രനെ അറസ്റ്റ് ചെയ്ത് അനിശ്ചിതകാലത്തേക്ക് തടവില് പാര്പ്പിച്ചിരിക്കുന്നതെന്നാണ് മുഖ്യമന്ത്രിയുടെ വിശദീകരണം. അങ്ങനെയെങ്കില് മുഖ്യമന്ത്രിയുടെ പേരില് എറണാകുളം കോടതിയില് നാലു കേസുകള് ഉണ്ട്. രണ്ടെണ്ണത്തിനു വാറന്റും പുറപ്പെടുവിച്ചിട്ടുണ്ട്. മുഖ്യമന്ത്രിയുടെ ന്യായമനുസരിച്ചു അദ്ദേഹത്തെ അറസ്റ്റ് ചെയ്യേണ്ടതാണ്. അതിന് ഡിജിപിക്ക് ധൈര്യമില്ലെങ്കില് അദ്ദേഹം കുപ്പായമൂരി എകെജി സെന്ററില് പണി എടുക്കണം.- എ എന് രാധാകൃഷ്ണന് പറഞ്ഞു. സെക്രട്ടേറിയറ്റിനു മുന്നില് നടത്തുന്ന അനിശ്ചിതകാല നിരാഹാര സമരത്തിനിടെ മാധ്യമങ്ങളോട് സംസാരിക്കുകയായിരുന്നു അദ്ദേഹം.
മന്ത്രി കടകംപള്ളി സുരേന്ദ്രന്റെ പേരില് 27 കേസുകളാണ് നിലവിലുള്ളത്. 12 എണ്ണത്തിന് വാറന്റുണ്ട്. മന്ത്രി ഇ.പി ജയരാജന്റെ പേരിലും കേസുകള് നിലവിലുണ്ട്. കൂടാതെ എംഎല്എമാരായ എം.സ്വരാജ്, സി.ദിവാകരന് എന്നിവരൊക്കെ വിവിധ കേസുകളില് പ്രതികളാണ്. എന്തുകൊണ്ട് ഇവരെയൊന്നും അറസ്റ്റ് ചെയ്യുന്നില്ലെന്ന് രാധാകൃഷ്ണന് ചോദിച്ചു.
