ജലന്ധര് : ബിഷപ്പ് ഫ്രാങ്കോ മുളയ്ക്കലിനെതിരെ സമരം നടത്തി ബിഷപ്പ് അറസ്റ്റിലാകാന് കാരണക്കാരായ കന്യാസ്ത്രീകളെ കൂട്ടത്തോടെ സ്ഥലം മാറ്റി. സിസ്റ്റര് ആല്ഫി, അനുപമ, ജോസഫൈന്, നീന റോസ് ആന്സറ്റ് എന്നിവരെയാണ് സ്ഥലം മാറ്റിയിരിക്കുന്നത്. കേസില് നിര്ണ്ണായക സാക്ഷികളാണ് ഇവര്. സുപ്പീരിയര് ജനറല് സിസ്റ്റര് റെജീനയാണ് ഇത്തരമൊരു കത്ത് അയച്ചിരിക്കുന്നത്.
കന്യാസ്ത്രീകളെ അഞ്ചുപേരെയും വെവ്വേറെ സ്ഥലങ്ങളിലേയ്ക്കാണ് മാറ്റിയിരിക്കുന്നത്. സമരനേതാവ് സിസ്റ്റര് അനുപമയെ പഞ്ചാബിലേയ്ക്കാണ് മാറ്റിയിരിക്കുന്നത്. ആല്ഫിയെ ബീഹാറിലേയ്ക്കും ആന്സിറ്റയെയും ജോസഫൈനെയും ജാര്ഖണ്ഡിലേയ്ക്കുമാണ് മാറ്റിയിരിക്കുന്നത്. പരാതിക്കാരിയായ കന്യാസ്ത്രീയെ മാറ്റിയിട്ടില്ല. അവരെ കുറവിലങ്ങാട് മഠത്തില് തന്നെ നില്ക്കാന് അനുവദിച്ചിട്ടുണ്ടെങ്കിലും മാറ്റപ്പെട്ടേക്കും.
സ്ഥലം മാറ്റം പ്രതികാര നടപടിയെന്ന് കന്യാസ്ത്രീകള് പ്രതികരിച്ചു. എന്നാല്, സ്ഥലം മാറ്റം അനുസരിച്ച് പോകില്ലെന്നും അച്ചടക്ക നടപടിയെ നേരിടുമെന്നും സിസ്റ്റര് അനുപമ പറഞ്ഞു. മേയ് 2017 നാണ് ഇത്തരിലൊരു സ്ഥലം മാറ്റ ഉത്തരവ് സഭയുടെ ഭാഗത്തു നിന്നും ഉണ്ടായത്. എന്നാല്, കന്യാസ്ത്രീകള് ഇവിടെ തുടരുകയായിരുന്നു. പിന്നീട് ഇപ്പോള് സഭയുടെ ഭാഗത്തു നിന്നും വീണ്ടുമൊരു നീക്കം ഉണ്ടായിരിക്കുന്നത് പ്രതികാര നടപടിയാണെന്നാണ് കന്യാസ്ത്രീകളുടെ വാദം.
