തിരുവനന്തപുരം: കൊച്ചിയില് നടി ലീന മരിയ പോളിന്റെ ബ്യൂട്ടി പാര്ലറിനുനേരേ വെടിവയ്പ്പുണ്ടായ കേസില് മുംബൈ അധോലോകത്തലവന് രവി പൂജാര പിടിയിലായതായി സൂചന. ആഫ്രിക്കന് രാജ്യമായ സെനഗലില്നിന്നു പൂജാരയെ ഇന്റര്പോള് അറസ്റ്റ് ചെയ്തതെന്നാണു രാത്രി വൈകി ലഭിച്ച വിവരം.
പൂജാരയെത്തേടി ക്രൈംബ്രാഞ്ച് സംഘം വിദേശത്തേക്കു പോയതായി കഴിഞ്ഞ 18-നു മംഗളം റിപ്പോര്ട്ട് ചെയ്തിരുന്നു. കടവന്ത്രയിലെ 'നെയ്ല് ആര്ട്ടിസ്ട്രി' ബ്യൂട്ടി പാര്ലറിനുനേരേ കഴിഞ്ഞ ഡിസംബര് 15-ന് ഉച്ചകഴിഞ്ഞ് 3.45-നാണ് ബൈക്കിലെത്തിയ അജ്ഞാതര് വെടിയുതിര്ത്തത്.
പൂജാര ആവശ്യപ്പെട്ട രണ്ടുകോടി രൂപ നടി നല്കാത്തതിന്റെ പേരിലായിരുന്നു ബൈക്കിലെത്തിയ രണ്ടംഗസംഘത്തിന്റെ ആക്രമണം. 25 കോടി രൂപയാണു പൂജാര ഇവരോട് ആദ്യമാവശ്യപ്പെട്ടത്. കൊച്ചി വെടിവയ്പ്പിനു പിന്നില് താനാണെന്നും ഇനിയും അതാവര്ത്തിക്കുമെന്നും അവകാശപ്പെട്ട് പൂജാര ടെലിവിഷന് ചാനലുകള്ക്കു സന്ദേശമയച്ചിരുന്നു.
ഇതോടെ, ഇത്തരം വെല്ലുവിളികള് വച്ചുപൊറുപ്പിക്കരുതെന്നു മുഖ്യമന്ത്രി പിണറായി വിജയന് സംസ്ഥാന പോലീസ് മേധാവിക്കു കര്ശനനിര്ദേശം നല്കിയിരുന്നു. കേസ് ഒത്തുതീര്ക്കാന് ശ്രമം നടക്കുന്നതായി ആരോപണം ഉയര്ന്നതിനു പിന്നാലെയാണു കേരളാ പോലീസിനെ വെല്ലുവിളിച്ച പൂജാരയെത്തേടി അന്വേഷണസംഘം വിദേശത്തേക്കു പോയത്.
