തിരുവനന്തപുരം: സംസ്ഥാന വൈറോളജി ഇന്സ്റ്റിറ്റിയൂട്ട് മുഖ്യമന്ത്രി പിണറായി വിജയന് നാടിന് സമര്പ്പിച്ചു. സംസ്ഥാന വ്യവസായ വികസന കോര്പ്പറേഷന്റെ കീഴിലാണ് വൈറോളജി ഇന്സ്റ്റിറ്റിയുട്ട്. പ്രഖ്യാപിച്ച് മാസങ്ങള് പിന്നിടുമ്പോള് തന്നെ വൈറോളജി ഇന്സ്റ്റിറ്റിയുട്ട് യാഥാര്ത്ഥ്യമായിരിക്കുകയാണ്. ഉദ്യോഗസ്ഥരുടെ തടസം കൊണ്ട് സംസ്ഥാനത്ത് ഒരു പദ്ധതിയും മുടങ്ങില്ലെന്ന് ഉദ്ഘാടന ചടങ്ങില് മുഖ്യമന്ത്രി പിണറായി വിജയന് പറഞ്ഞു.
വൈറോളജി ഇന്സ്റ്റിയുട്ട് തുടങ്ങാന് ആലോചിച്ചുവെങ്കിലും ഉദ്യോഗസ്ഥരുടെ തടസം കാരണം പദ്ധതി മുടങ്ങിപ്പോയെന്ന് പ്രമുഖ പത്രം മുഖപ്രസംഗം എഴുതിയിരുന്നു. ഉദ്യോഗസ്ഥരുടെ തടസം കൊണ്ട് ഒരു പദ്ധതിയും മുടങ്ങിയിട്ടില്ലെന്നും അക്കാര്യത്തിലുള്ള വിയോജിപ്പ് വ്യക്തമാക്കാന് താന് ആഗ്രഹിക്കുകയാണെന്നും മുഖ്യമന്ത്രി പറഞ്ഞു.
ഉദ്യോഗസ്ഥരുടെ തടസം കൊണ്ട് ഒരു പദ്ധതി നടക്കാതാകുമോ ഉദ്യോഗസ്ഥന്മാരുടെ തടസം മറികടക്കാനല്ലേ സര്ക്കാരും മന്ത്രിസഭയുമൊക്കെ നില്ക്കുന്നത്. എന്തെങ്കിലും തടസം പറഞ്ഞാല് അവിടെ ഇട്ടേക്കേണ്ട കാര്യമില്ല. തന്റെ അനുഭവം പറഞ്ഞാല് വൈറോളജി ഇന്സ്റ്റിറ്റിയൂട്ടിന്റെ നിര്ദ്ദേശം വന്നപ്പോള് ഒരു ഭാഗത്ത് നിന്നും ഒരു തടസവും വന്നില്ല. എല്ലാവരും അംഗീകരിക്കുകയും ചെയ്തുവെന്നും മുഖ്യമന്ത്രി വെളിപ്പെടുത്തി.
