തിരുവനന്തപുരം: കേന്ദ്ര സര്ക്കാരിന്റെ പദ്ധതിയുടെ സംസ്ഥാനതല ഉദ്ഘാടനം കൃഷിമന്ത്രി വി.എസ്. സുനില് കുമാര് കോട്ടയത്തു നിര്വഹിച്ചു. തിരുവനന്തപുരത്ത് കേന്ദ്രമന്ത്രി അല്ഫോണ്സ് കണ്ണന്താനത്തിന്റെ വക സമാന്തര ഉദ്ഘാടനം. ''പ്രധാനമന്ത്രി കിസാന് സമ്മാന് നിധി'' യിലാണ് സംസ്ഥാനത്ത് ബിജെപി എല്ഡിഎഫ് പോര് കണ്ടത്.
സംസ്ഥാന സര്ക്കാരിനെ അറിയിക്കാതെയുള്ള കേന്ദ്രമന്ത്രിയുടെ നടപടി അല്പ്പത്തരമെന്നും രാഷ്ട്രീയ പക്വതയില്ലായ്മയുമെന്നു സുനില് കുമാറിന്റെ വിമര്ശനത്തിന് ഗോരഖ്പുരില് പ്രധാനമന്ത്രി നരേന്ദ്ര മോഡി നടത്തിയ ഉദ്ഘാടനത്തിന്റെ സാക്ഷ്യം വഹിക്കല് മാത്രമാണു നടത്തിയതെന്നു കണ്ണന്താനത്തിന്റെ വിശദീകരണം. പദ്ധതിയുടെ പ്രയോജനം സംസ്ഥാനത്തെ പരമാവധി കര്ഷകര്ക്കു വാങ്ങിക്കൊടുക്കാന് ശ്രമിക്കാതെ, പദ്ധതിയുടെ ക്രെഡിറ്റിനായാണു പോര്. നേരത്തേ തുടങ്ങിയ പ്രസ്താവനാ യുദ്ധമാണ് ഇന്നലെ വ്യത്യസ്ത വേദികളിലെ ചടങ്ങുകളില് കലാശിച്ചത്.
പൊതു തെരഞ്ഞെടുപ്പ് അടുത്തിരിക്കെ കര്ഷകരോഷം തണുപ്പിക്കാനുള്ള ബി.ജെ.പി. നീക്കത്തിന്റെ ഫലമാണ് ചെറുകിട കര്ഷകര്ക്കു പ്രതിവര്ഷം 6,000 രൂപ ബാങ്ക് അക്കൗണ്ടിലെത്തിക്കുന്ന കേന്ദ്രപദ്ധതി. ഗോരഖ്പുരിലെ ഉദ്ഘാടനത്തിനു പിന്നാലെ ഒരു കോടിയോളം കര്ഷകരുടെ അക്കൗണ്ടിലേക്ക് ആദ്യഗഡുവായ 2,000 രൂപ ഡിജിറ്റലായി നിക്ഷേപിച്ചു. ബി.ജെ.പി രാഷ്ട്രീയ നേട്ടമുണ്ടാക്കുമെന്നു ശങ്കിച്ച് സംസ്ഥാന സര്ക്കാരിന്റേതു മെല്ലെപ്പോക്കായിരുന്നു.
പദ്ധതിയില്നിന്നു സംസ്ഥാനത്തെ കര്ഷകര് ഒഴിവാക്കപ്പെടുമെന്ന ഘട്ടത്തിലാണ് ഉണര്ന്നത്. അര്ഹതയുള്ള കര്ഷകരുടെ പേരുവിവരങ്ങള് ആവശ്യപ്പെട്ട് പദ്ധതിയുടെ ചീഫ് എക്സിക്യൂട്ടീവ് ഓഫീസര് വിവേക് അഗര്വാള് കഴിഞ്ഞ 14-നു സംസ്ഥാന സര്ക്കാരുകള്ക്ക് അടിയന്തര സന്ദേശം നല്കിയിരുന്നു. എന്നാല് 18-നു മാത്രമാണ് കൃഷി വകുപ്പില്നിന്നു കൃഷി ഓഫീസുകളിലേക്ക് ഇ-മെയില് സന്ദേശമയച്ചത്. 20-നകം കര്ഷകരുടെ വിവരങ്ങള് നല്കാനായിരുന്നു നിര്ദേശം.
പിറ്റേന്നു മുതല് കൃഷി ഓഫീസുകളില് വന് തിരക്കായി. കരമടച്ചതിന്റെ രസീത് നല്കേണ്ടതിനാല് ക്യൂ വില്ലേജ് ഓഫീസുകളിലേക്കുമെത്തി. എല്ലാ കൃഷിഭവനുകളിലെയും ഉദ്യോഗസ്ഥര് ഒരേസമയം വിവരങ്ങള് ചേര്ക്കാര് ശ്രമിച്ചതോടെ വെബ്െസെറ്റ് തകരാറിലായി. തുടര്ന്നാണ് അപേക്ഷ സമര്പ്പിക്കാന് കേന്ദ്ര സര്ക്കാര് സമയം നീട്ടിക്കൊടുത്തത്. സംസ്ഥാന സര്ക്കാര് പുലര്ത്തിയ ഉദാസീനത മൂലം സംസ്ഥാനത്തെ ഒട്ടനവധി കര്ഷകര് പിന്തള്ളപ്പെടുമെന്ന ആശങ്കയുണ്ട്.
