ന്യൂഡല്ഹി: മുതിര്ന്ന നേതാക്കള്ക്കു സ്ഥാനാര്ഥിത്വം നിഷേധിച്ചതോടെ ബി.ജെ.പിയില് ഉടലെടുത്ത അസ്വസ്ഥത പൊട്ടിത്തെറിയിലേക്ക്. എല്.കെ. അദ്വാനിക്കും മുരളി മനോഹര് ജോഷിക്കും പിന്നാലെ, ലോക്സഭാ സ്പീക്കര് കൂടിയായ സുമിത്രാ മഹാജനും ഇടഞ്ഞു. മോഡിക്കെതിരേ വാരാണസിയില് ജോഷിയെ പൊതു സ്ഥാനാര്ഥിയാക്കാന് പ്രതിപക്ഷം ശ്രമിക്കുന്നതിനിടെ അദ്ദേഹം അദ്വാനിയെ കാണാനെത്തിയതു ബി.ജെ.പി. നേതൃത്വത്തെ ആശങ്കയിലാക്കി.
മറ്റൊരു മണ്ഡലത്തില് മത്സരിച്ച് ജോഷി ബി.ജെ.പിയെ വെല്ലുവിളിക്കുമെന്ന് അഭ്യൂഹം. പ്രശ്നപരിഹാരത്തിന് ആര്.എസ്.എസ്. ഇടപെട്ടു. മോഡി-ഷാ ദ്വയം സര്വാധികാരവും പിടിച്ചതോടെ അദ്വാനി, ജോഷി, യശ്വന്ത് സിന്ഹ അടക്കമുള്ള മുതിര്ന്ന നേതാക്കള്ക്കു മാര്ഗനിര്ദേശക മണ്ഡലിലായിരുന്നു സ്ഥാനം. സിന്ഹ പിന്നീടു വേറെ വഴി തേടി. വൃദ്ധസദനത്തിലെന്ന പരിഹാസത്തിനു മുന്നിലും സംയമനം പാലിച്ച അദ്വാനിയും ജോഷിയും ഇക്കുറി മത്സരിക്കേണ്ടെന്നു ദൂതന് വശം അറിയിപ്പു കിട്ടിയതോടെ ഞെട്ടിത്തരിച്ചു. മത്സരിക്കുന്നില്ലെന്നു പ്രഖ്യാപിക്കണമെന്ന ആവശ്യവുമായി സംഘടനാ ജനറല് സെക്രട്ടറി രാംലാലാണ് ഇരുവരെയും കണ്ടത്.
അദ്വാനി ആറു തവണ വിജയിച്ച ഗാന്ധിനഗറില് ഇക്കുറി അമിത് ഷായാണു സ്ഥാനാര്ഥി. 91 വയസായ അദ്വാനി മത്സരിക്കാന് താല്പര്യപ്പെട്ടിരുന്നില്ലെങ്കിലും അതു തന്റെ തീരുമാനമായി വരണമെന്ന് ആഗ്രഹിച്ചിരുന്നു. സിറ്റിങ് സീറ്റായിരുന്ന വാരാണസി കഴിഞ്ഞ തവണ മോഡിക്കായി ഒഴിഞ്ഞ് കാണ്പുരിലേക്കു പോയ ജോഷിക്ക് അതിന്റേതായ ആനുകൂല്യം പോലും കിട്ടിയില്ല. ഒരിടത്തുനിന്നും മത്സരിക്കരുതെന്നു രാംലാല് വന്നുപറഞ്ഞെന്ന് കാണ്പുരിലെ വോട്ടര്മാര്ക്കു തുറന്ന കത്തെഴുതി ജോഷി അതൃപ്തി പരസ്യമാക്കി.
''ആദ്യം രാജ്യം, പിന്നെ പാര്ട്ടി, അതിനു ശേഷം മാത്രം വ്യക്തി'' എന്ന അദ്വാനിയുടെ ലേഖനത്തെ ബി.ജെ.പിയുടെ സാരാംശമായി മോഡിയും ഷായും വാഴ്ത്തുമ്പോഴും ഇവരുടെ അധീശത്വത്തിനെതിരായ വിമര്ശനമാണ് അദ്വാനിയുടേതെന്ന വ്യാഖ്യാനം ശക്തം. രാഷ്ട്രീയമായി വിയോജിക്കുന്നവരെ എതിരാളികളായി മാത്രം കാണുന്നതാണു ബി.ജെ.പിയുടെ സംസ്കാരമെന്നും ശത്രുവായോ ദേശവിരുദ്ധരായോ കാണരുതെന്നും അദ്വാനി കുറിച്ചതിലെ സന്ദേശം വ്യക്തമാണെന്നും പ്രതിപക്ഷം ചൂണ്ടിക്കാട്ടുന്നു.
ഇന്ഡോറിലെ സ്ഥാനാര്ഥിത്വത്തിനു കാത്തിരുന്നിട്ടും തീരുമാനമാകാതിരുന്നതോടെയാണു മത്സരത്തിനില്ലെന്നു സുമിത്രാ മഹാജന് പ്രഖ്യാപിച്ചത്. 75 വയസ് കഴിഞ്ഞവര് മത്സരിക്കേണ്ടെന്ന് അമിത് ഷാ കഴിഞ്ഞ ദിവസം പ്രഖ്യാപിച്ചത് തന്നെ ഉദ്ദേശിച്ചാണെന്ന് സുമിത്ര കരുതുന്നു. എട്ടു തവണ ലോക്സഭാംഗമായ അവര്ക്ക് ഈ മാസം 12-ന് 76 വയസാകും.
ഭീകരരെ വെല്ലുവിളിച്ച് കശ്മീരിലെ ലാല്ചൗക്കില് ത്രിവര്ണപതാക ഉയര്ത്തിയ വീര്യം 85 വയസിലും ബി.ജെ.പിയുടെ മൂന്നാം അധ്യക്ഷനു െകെമോശം വന്നിട്ടില്ലെന്നു തിരിച്ചറിഞ്ഞാണ് അദ്ദേഹത്തെ മോഡിക്കെതിരേ മത്സരിപ്പിക്കാന് പ്രതിപക്ഷത്തിന്റെ കരുനീക്കം. വാരാണസിയില് താല്പര്യമില്ലെങ്കിലും മറ്റേതെങ്കിലും മണ്ഡലത്തില് ജോഷി മത്സരിച്ചേക്കുമെന്നാണു സൂചന. വാരാണസിയിലടക്കം ഇതു പ്രതിഫലിക്കുമെന്ന ആശങ്കയില് ബി.ജെ.പി. നേതൃത്വം ആര്.എസ്.എസിന്റെ സഹായം തേടി.
മുതിര്ന്ന ബി.ജെ.പി. നേതാക്കളുടെ പ്രതിഷേധം പ്രചാരണായുധമാക്കുകയാണ് പ്രതിപക്ഷം. പാര്ട്ടി ഗുരുവിനെ മറന്നെന്ന് കോണ്ഗ്രസ് അധ്യക്ഷന് രാഹു ല് ഗാന്ധിയും ബി.ജെ.പിയുടെ നെടുംതൂണായിരുന്ന അദ്വാനി ആരാധ്യനായ നേതാവാണെന്ന് റോബര്ട്ട് വാധ്രയും അഭിപ്രായപ്പെട്ടതു തുടക്കം മാത്രം.
