ഇന്ത്യന് വിപണി പ്രവേശനം യാതാര്ത്ഥ്യമാക്കി ഐക്കണിക് ബ്രിട്ടീഷ് ബ്രാന്ഡായ എംജി (മോറിസ് ഗാരേജസ്). ചൈനയിലെ മുന്നിര വാഹന നിര്മ്മാതാക്കളായ ഷാന്ഹായ് ഓട്ടോമോട്ടീവ് ഇന്ഡസ്ട്രി കോര്പറേഷന്റെ ഉടമസ്ഥതയിലുള്ള ഈ കമ്പനിയുടെ ഇന്ത്യയിലെ ആദ്യവാഹനം ഹെക്ടറിന്റെ ആദ്യപ്രദര്ശനം കഴിഞ്ഞ ദിവസം നടന്നു.
മുംബൈയില് നടന്ന പ്രത്യേക ചടങ്ങിലാണ് അഞ്ചു സീറ്റര് ഹെക്ടറിനെ എംജി മോട്ടോര് ഇന്ത്യ പ്രദര്ശിപ്പിച്ചത്. വാഹനത്തിനു 16 ലക്ഷം മുതല് 20 ലക്ഷം വരെയായിരിക്കും വിലയെന്നാണ് റിപ്പോര്ട്ടുകള്. അതേസമയം എം ജി മോട്ടോര് ഇന്ത്യയുടെ ആദ്യ ഡീലര്ഷിപ് ഡല്ഹിയില് ജൂണ് 4-ന് ഔപചാരികമായി പ്രവര്ത്തനം ആരംഭിക്കും.
മൈക്രോസോഫ്റ്റ്, അഡോബി, സാപ്, സിസ്കോ തുടങ്ങിയ ആഗോള ടെക്നോളജി കമ്പനികളുടെ പിന്തുണയോടെ 'ഐ-സ്മാര്ട്' സാങ്കേതിക വിദ്യയോടെയാണ് ഇന്റര്നെറ്റ് കാര് അവതരിപ്പിക്കുന്നത്.
കാറിലുള്ള 10.4 ഇഞ്ച് ഹെഡ് യൂണിറ്റ്, മൊബൈല് ഫോണ് എന്നിവയിലൂടെ കാറിന് നിര്ദേങ്ങള് നല്കാം. 5ജി അധിഷ്ഠിത സിം ആയിരിക്കും കാറില്. രാജ്യത്തെ വിവിധ എം ജി മോട്ടോര് ഇന്ത്യ ഡീലര്ഷിപ്പുകള് 51,000 രൂപ അഡ്വാന്സ് സ്വീകരിച്ച് ഹെക്ടര് ബുക്കിംഗ് തുടങ്ങിയെന്നാണ് റിപ്പോര്ട്ടുകള്. എന്നാല് എം ജി മോട്ടോര് ഇന്ത്യ ഔദ്യോഗികമായി ഹെക്ടര് ബുക്കിങ് ആരംഭിച്ചിട്ടില്ല.
സ്റ്റൈല്, സൂപ്പര്, സ്മാര്ട്ട്, ഷാര്പ്പ് എന്നിങ്ങനെ നാലു വകഭേദങ്ങളിലാണ് ഇന്ത്യയിലെ ആദ്യ ഇന്റര്നെറ്റ് അധിഷ്ഠിത കാറായ ഹെക്ടറിനെ എംജി അവതരിപ്പിക്കുന്നത്. പ്രാരംഭ മോഡലാണ് സ്റ്റൈല്. ഷാര്പ്പ് ഏറ്റവും ഉയര്ന്ന മോഡലായിരിക്കും. 1.5 ലിറ്റര് പെട്രോള് മാനുവല്, 1.5 ലിറ്റര് പെട്രോള് ഓട്ടോമാറ്റിക്, 2.0 ലിറ്റര് ഡീസല് മാനുവല് പതിപ്പുകള് ഹെക്ടറിലുണ്ട്.
ആറു സ്പീഡ് മാനുവല് ഗിയര്ബോക്സാണ് ട്രാന്സ്മിഷന്. ആറു സ്പീഡ് ഇരട്ട ക്ലച്ച് ഓട്ടോമാറ്റിക് ഗിയര്ബോക്സ് 1.5 ലിറ്റര് പെട്രോള് പതിപ്പില് മാത്രമായിരിക്കും. പെട്രോള് പതിപ്പുകളില് ഹൈബ്രിഡ് ടെക്നോളജി പിന്തുണയുമുണ്ടാകും. മുന് വീല് ഡ്രൈവായാണ് ഹെക്ടര് മോഡലുകള് വിപണിയിലെത്തുക.
