കൊച്ചി: പ്രധാനമന്ത്രിയും കോണ്ഗ്രസ് അദ്ധ്യക്ഷന് രാഹുല്ഗാന്ധിയും ഇന്ന് കേരളത്തില് എത്തും. നാളെ ഗുരുവായൂര് ക്ഷേത്ര ദര്ശനവും ബിജെപിയുടെ പരിപാടികള്ക്കുമായി പ്രധാനമന്ത്രി എത്തുമ്പോള് വയനാട്ടില് തന്നെ വിജയിപ്പിച്ച വോട്ടര്മാര്ക്ക് നന്ദി പറയാനാണ് രാഹുല് കേരളത്തില് എത്തുന്നത്. ഇരുവരുടെയും സന്ദര്ശനം പ്രമാണിച്ച് കനത്ത സുരക്ഷയാണ് ഏര്പ്പെടുത്തിയിട്ടുള്ളത്.
ഇന്ന് വൈകിട്ട് കൊച്ചിയില് എത്തുന്ന പ്രധാനമന്ത്രി അവിടെ നിന്നും നാളെ രാവിലെ ഹെലികോപ്റ്ററില് തൃശൂരിലേക്ക് പോകും. വയനാട്ടില് മൂന്ന് ദിന സന്ദര്ശനത്തിനായി ഉച്ചയോടെയെത്തുന്ന രാഹുല് റോഡ്മാര്ഗ്ഗമാണ് കാളികാവിലേക്ക് പോകുന്നത്. 7,8 തീയതികളിലായിരുന്നു രാഹുല് സന്ദര്ശനം ഉദ്ദേശിച്ചിരുന്നതെങ്കിലും രാത്രിയുള്ള പരിപാടികള്ക്ക് സുരക്ഷാവിഭാഗം അനുമതി നിഷേധിച്ചതോടെ ഒരു ദിവസം കൂടി നീട്ടി.
നാളെ രാവിലെ ഗുരുവായൂര് ക്ഷേത്ര ദര്ശനം നടത്തുന്ന മോഡി തുലാഭാരം,കളഭച്ചാര്ത്ത് ഉള്പ്പെടെയുളള വഴിപാടുകള് നടത്താന് ദേവസ്വം അധികൃതര്ക്ക് നിര്ദേശം നല്കിയിട്ടുണ്ട്. താമരപ്പൂവ് കൊണ്ടാണ് തുലാഭാരം. അതിന് ശേഷം രണ്ടാം തവണ പ്രധാനമന്ത്രിയായ ശേഷം ആദ്യമായി നടക്കുന്ന പൊതുപരിപാടിയില് പങ്കെടുക്കും. ബിജെപി സംഘടിപ്പിക്കുന്ന 'അഭിനന്ദന് സമ്മേളനം' നടക്കുന്നത് ശ്രീകൃഷ്ണ ഹൈസ്കൂള് ഗ്രൗണ്ടിലാണ്. പരിപാടികള്ക്ക് ശേഷം ഉച്ചയോടെ തിരിച്ചു പോകും.
പ്രധാനമന്ത്രിയുടെ സന്ദര്ശനത്തിന്റ ഭാഗമായി കൊച്ചി നാവിക വിമാനത്താവളം, കൊച്ചി രാജ്യാന്തര വിമാനത്താവളം, താമസിക്കുന്ന എറണാകുളം ഗസ്റ്റ്ഹൗസ് എന്നിവിടങ്ങള് എസ്പിജിയുടെ കര്ശന സുരക്ഷാ നിയന്ത്രണത്തിന് കീഴിലാകും. നാളെ നടക്കുന്ന ഗുരുവായൂരിലെ പരിപാടിയില് 10,000 പേര്ക്കാണ് പ്രവേശനം. പ്രധാനമന്ത്രിയുടെ ദര്ശനത്തോടനുബന്ധിച്ച് ഗുരുവായൂരിലും പരിസരത്തും കര്ശന സുരക്ഷാക്രമീകരണങ്ങളാണ് പൊലീസ് ഒരുക്കിയിരിക്കുന്നത്.ഗുരുവായൂരില് ലോഡ്ജുകളില് മുറിയെടുക്കുന്നവരുടെ എല്ലാ വിവരങ്ങളും ശേഖരിക്കണമെന്ന് ഉടമകള്ക്ക് നിര്ദേശം നല്കിയിട്ടുണ്ട്. 2008ല് ഗുജറാത്ത് മുഖ്യമന്ത്രിയായിരിക്കെയാണ് മോദി ഇതിനു മുമ്പ് ഗുരുവായൂരില് ദര്ശനത്തിനെത്തിയത്.
മണ്ഡലത്തിലൂടെ റോഡ്ഷോ നടത്തിയ ശേഷം കല്പ്പറ്റ റെസ്റ്റ്ഹൗസിലാണ് താമസം ഒരുക്കിയിരിക്കുന്നത്. കാളികാവ്, നിലമ്പൂര്, എടവണ്ണ, അരീക്കോട് എന്നിവിടങ്ങളിലെ റോഡ്ഷോ വൈകിട്ട ആറു മണിയോടെ അവസാനിപ്പിച്ച് റോഡ് മാര്ഗം കല്പറ്റയിലേക്കു തിരിക്കും. കല്പറ്റ റെസ്റ്റ് ഹൗസിലാണ് താമസസൗകര്യം ഒരുക്കിയിരിക്കുന്നത്. കാളികാവില് പഞ്ചായത്ത് ഓഫിസ് മുതല് ടൗണ് വരെയും എടവണ്ണയില് സീതിഹാജി പാലം മുതല് ജമാലങ്ങാടി വരെയും നിലമ്പൂരില് ചന്തക്കുന്ന് മുതല് ഗവ. മോഡല് യുപി സ്കൂള് വരെയും അരീക്കോട് പുത്തലം മുതല് പത്തനാപുരം പാലംവരെയുമാണ് രാഹുല്ഗാന്ധിയുടെ റോഡ് ഷോ.
ഉച്ചയ്ക്ക് കോഴിക്കോട് വിമാനത്താവളത്തില് കെപിസിസി അധ്യക്ഷന് മുല്ലപ്പള്ളി രാമചന്ദ്രന്റെയും പ്രതിപക്ഷ നേതാവ് രമേശ് ചെന്നിത്തലയുടെയും നേതൃത്വത്തില് രാഹുലിനെ സ്വീകരിക്കും. നാളെ വയനാട് കലക്ടറേറ്റിലെ എംപി ഫെസിലിറ്റേഷന് സെന്റര്, കല്പറ്റ ടൗണ്, കമ്പളക്കാട്, പനമരം, മാനന്തവാടി, പുല്പള്ളി, ബത്തേരി എന്നിവിടങ്ങളില് പര്യടനം. ഞായറാഴ്ച ഈങ്ങാപ്പുഴയിലും മുക്കത്തും പര്യടനം നടത്തി ഉച്ചയോടെ തിരിച്ചുപോകും. പ്രത്യേകം തയാറാക്കിയ വാഹനത്തിലാണ് വോട്ടര്മാരെ കാണാനെത്തുന്നത് മൈക്കും പ്രസംഗ പീഠവുമുണ്ടാകുമെങ്കിലും പൊതുയോഗമോ പ്രസംഗ പരിപാടിയോ തീരുമാനിച്ചിട്ടില്ല.
