ഭോപ്പാല് : ഇരു ചക്ര വാഹന യാത്രക്കാര് ഹെല്മെറ്റ് ധരിക്കാന് മടിക്കുന്ന സാഹചര്യത്തില് ഇതിനെ മറികടക്കാന് കടുത്ത നിലപാടിലേക്ക് കടക്കുകയാണ് മധ്യപ്രദേശിലെ മോട്ടോര് വാഹന വകുപ്പ്. പുതിയ ഇരുചക്ര വാഹനം രജിസ്റ്റര് ചെയ്യാന് മധ്യപ്രദേശില് രണ്ട് ഹെല്മെറ്റ് നിര്ബന്ധമാക്കിയിരിക്കുകയാണ്. വാഹനം രജിസ്റ്റര് ചെയ്യാന് വരുമ്പോള് രണ്ട് ഹെല്മറ്റ് വാങ്ങിയ രസീത് കൂടി നിര്ബന്ധമായും കാണിക്കണം. എന്നാല് മാത്രമെ ട്രാന്സ്പോര്ട്ട് വാഹന വകുപ്പ് വാഹനം രജിസ്റ്റര് ചെയ്ത് നല്കുകയുള്ളൂ.
ഡ്രൈവറുടേയും സഹയാത്രികന്റേയും സുരക്ഷ കണക്കിലെടുത്താണ് ഈ നിബന്ധന കര്ശനമാക്കിയിരിക്കുന്നതെന്നാണ് ദേശീയ മാധ്യമങ്ങള് റിപ്പോര്ട്ട് ചെയ്യുന്നത്. ഇരു ചക്ര വാഹനം പുതിയതായി വാങ്ങുന്നവര്ക്ക് രണ്ടു ഹെല്മെറ്റുകൂടി വില്ക്കാന് സര്ക്കാര് വാഹന ഡീലര്മാരോട് ആവശ്യപ്പെട്ടിട്ടുണ്ടെന്നു ട്രാന്സ്പോര്ട്ട് കമ്മീഷ്ണര് ശൈലേന്ദ്ര ശ്രീവാസ്തവ പറഞ്ഞു.
ഇരുചക്ര വാഹന യാത്രികര്ക്ക് ഹെല്മെറ്റ് നിര്ബന്ധമാക്കിയുള്ള കോടതി ഉത്തരവ് പൂര്ണ്ണമായി നടപ്പിലാക്കാന് ഗതാഗത വകുപ്പിനു സാധിക്കാത്ത സാഹചര്യത്തിലാണ് കൂടുതല് ശക്തമായ നടപടികളുമായി ഗതാഗതവകുപ്പ് രംഗത്തെത്തിയിരിക്കുന്നത്.
