കണ്ണൂര്: പ്രവാസി വ്യവസായി ആത്മഹത്യ ചെയ്ത സംഭവത്തില് വിവാദനായികയായി മാറിയിരിക്കുന്ന ആന്തൂര് നഗരസഭാ അദ്ധ്യക്ഷ പി കെ ശ്യാമളയ്ക്കെതിരേ കുടുതല് പരാതികള്. പാര്ട്ടിക്ക് 10,000 രൂപ പിരിവ് കൊടുക്കാത്തതിന്റെ പേരില് തന്റെ ഇക്കോ ടൂറിസ്റ്റ പദ്ധതി തകര്ത്തെന്ന ആരോപണവുമായി എത്തിയിരിക്കുന്നത് ഒരു വനിതാ സംരംഭകയാണ്. ടൂറിസം വകുപ്പിന്റെ അംഗീകാരം കിട്ടിയ പദ്ധതി ആന്തൂര് നഗരസഭ അനുമതി നല്കാതെ അവസാനിപ്പിക്കേണ്ടി വന്നതായും അരക്കോടിയോളം കടമായതായും ഇവര് പറയുന്നു.
കണ്ണൂര് സ്വദേശിനിയായ സുഗീല എന്ന യുവതിയാണ് ആരോപണം ഉന്നയിച്ചിരിക്കുന്നത്. 71,000 രുപ മാസവാടകയ്ക്ക് മൂന്ന് വര്ഷത്തേക്ക് കരാര് ഒപ്പിട്ടു. കിയോസ്ക്കുകള് എടുക്കാന് ആള്ക്കാര് വന്നെങ്കിലും കെട്ടിടത്തിനും വൈദ്യുതിക്കും വെള്ളത്തിനും നഗരസഭ അനുമതി നല്കിയില്ല. പരിമിതമായ സാഹചര്യം ഉപയോഗിച്ച് സംരംഭം തുടര്ന്നപ്പോള് കെട്ടിടം അനധികൃതമാണെന്ന് ന്യായം പറഞ്ഞ് വാടകക്കാരെ പറഞ്ഞുവിട്ടു. പാര്ട്ടിക്ക് പിരിവ് കൊടുക്കാത്തതിന്റെ പേരിലായിരുന്നു നഗരസഭയുടെ ഈ പ്രവര്ത്തി. 10,000 രൂപ ചോദിച്ചു. പണം നേരത്തേ കൊടുത്തിരുന്നു എന്നും ഇപ്പോള് തല്ക്കാലം 3000 രൂപ കൊടുക്കാമെന്നും പറഞ്ഞെങ്കിലും അത് അവര്ക്ക് കൂടുതല് പ്രശ്നമായി.
പാര്ട്ടിക്കുള്ളില് ശ്യാമളടീച്ചര് പണം വാങ്ങുന്നു എന്നാരോപിച്ച് ചര്ച്ച വന്നെന്നും അതിന് കാരണം താനാണെന്നും ആരോപിച്ചു. താനിവിടെ ഇരിക്കുന്നിടത്തോളം കാലം ഇതൊന്നും അനുവദിച്ചു തരാനാകില്ല എന്ന രീതിയിലാണ് ടീച്ചര് പ്രതികരിച്ചത്. പ്രശ്നം പരിഹരിക്കാന് സ്ഥലത്തെ പാര്ട്ടിക്കാരെ കൊണ്ടു ചര്ച്ച നടത്തിച്ചപ്പോള് തനിക്ക അഹങ്കാരമാണെന്ന് ശ്യാമള പറഞ്ഞെന്നായി പരാതി.
തന്നോടുള്ള എതിര്പ്പ് കാരണം പിറ്റേവര്ഷം സംരംഭ നടത്തിപ്പ് അനുമതി ഭര്ത്താവ് വിനോദിന്റെ പേരില് ആക്കിയെങ്കിലൂം നഗരസഭ അനുമതി നല്കാന് കൂട്ടാക്കിയിട്ടില്ല. വാടക നല്കാതെയും വരുമാനം നിലച്ചും വായ്പാത്തുക വര്ദ്ധിച്ചും നഷ്ടം അരക്കോടി രൂപയോളമായി. കെട്ടിടങ്ങളും മറ്റു നിര്മ്മാണങ്ങള്ക്കും നമ്പര് അനുവദിച്ചു നല്കേണ്ടത് ഉദ്യോഗസ്ഥര് ആണെന്നും ഇക്കാര്യത്തില് നഗരസഭാ അദ്ധ്യക്ഷയായ തനിക്ക യാതൊരു അധികാരവുമില്ലെന്നുമാണ് ഇപ്പോഴത്തെ വിശദീകരണമെന്നും പറയുന്നു.
