ഹൈദരാബാദ്: അധികാരം ഏറ്റെടുത്ത് ദിവസങ്ങള് പിന്നിടും മുമ്പ് ആന്ധ്രയിലെ രാഷ്ട്രീയ എതിരാളികളായ ചന്ദ്രബാബു നായിഡുവിന്റെ ടിഡിപിയ്ക്ക് വൈഎസ്ആര്സിപി യുടെ പുതിയ മുഖ്യമന്ത്രി ജഗ്മോഹന്റെ ആദ്യ പ്രഹരം. എട്ടു കോടി രൂപ മുടക്കി ചന്ദ്രബാബു നായിഡു പണിത കെട്ടിടം 'പ്രജാ വേദിക' ഇടിച്ചു നിരത്താന് നിര്ദേശം നല്കി. പ്രതിപക്ഷ നേതാവും മുന് മുഖ്യമന്ത്രിയുമായ ചന്ദ്രബാബു നായിഡുവിന്റെ വസതിക്ക് അടുത്താണ് കെട്ടിടം. തിങ്കളാഴ്ച ഇക്കാര്യത്തില് നിര്ദേശവും പുറത്തിറക്കി.
''സാധാരണക്കാരന് അനുമതി ഇല്ലാതെ കെട്ടിടം നിര്മ്മിച്ചാല് ഉദ്യോഗസ്ഥര് അത് തകര്ക്കാറുണ്ടെന്നും തന്റെ സര്ക്കാര് നിയമത്തെ ബഹുമാനിക്കാനും പിന്തുടരാനും ആഗ്രഹിക്കുന്നവരാണെന്നും പറഞ്ഞു കൊണ്ടാണ് പൊളിക്കാനുള്ള തീരുമാനം പ്രഖ്യാപിച്ചത്. മുഖ്യമന്ത്രിയായിരിക്കെ ജനങ്ങളുടെ പ്രശ്നങ്ങള് പരിഹരിക്കാനും പാര്ട്ടി യോഗങ്ങള് നടത്താനും ലക്ഷ്യമിട്ട് എട്ടുകോടി രൂപ മുടക്കി തന്റെ വസതിയോട് ചേര്ത്ത് ചന്ദ്രബാബു നായിഡുവിന് വേണ്ടി ആന്ധ്രാപ്രദേശ് കാപിറ്റല് റീജിയണ് ഡവലപ്മെന്റ് അതോറിറ്റി നിര്മ്മിച്ചതാണ് കെട്ടിടം. എന്നാല് കോണ്ഫറന്സ് ഹാളിന്റെ അവകാശം ശനിയാഴ്ച വൈഎസ്ആര് സര്ക്കാര് പിടിച്ചെടുത്തിരുന്നു. ഇതിന് പിന്നാലെയാണ് പൊളിച്ചുമാറ്റാനുള്ള തീരുമാനവും വന്നിരിക്കുന്നത്.
അതേസമയം പ്രതികാര രാഷ്ട്രീയമെന്നാണ് ടിഡിപി നടപടിയോട് പ്രതികരിച്ചിരിക്കുന്നത്. സര്കകാര് മുന് മുഖ്യമന്ത്രിയോടും അദ്ദേഹത്തിന്റെ വസ്തു വകകളോടും മര്യാദ കാട്ടിയില്ലെന്നും എല്ലാം വെളിയിലേക്ക് വലിച്ചെറിഞ്ഞെന്നും ആരോപിച്ചു. ആന്ധ്രാ ഭരണം ഹൈദരാബാദില് നിന്നും ഇപ്പോഴത്തെ തെലുങ്കാനയുടെ തലസ്ഥാനം അമരാവതിയിലേക്ക് മാറ്റിയ 2016 മുതല് കൃഷ്ണാ നദിയുടെ തീരമായ ഉണ്ടാവല്ലിയിലെ വീട്ടിലാണ് ചന്ദ്രബാബു നായിഡു ഇപ്പോഴും താമസിക്കുന്നത്. എന്നിരുന്നാലും പ്രജാ വേദിക യോഗങ്ങള് പോലെയുള്ള കാര്യങ്ങള്ക്കായി ഉപയോഗിക്കാന് അനുമതി ആവശ്യപ്പെട്ടു ഈ മാസം ആദ്യം നായ്ഡു ജഗ്മോഹന് കത്തെഴുതിയിരുന്നു. ഈ കെട്ടിടം പ്രതിപക്ഷ നേതാവിന്റെ വസതിയില് പെടുന്ന വസ്തുവാണെന്ന് പ്രഖ്യാപിക്കണമെന്നും ആവശ്യപ്പെട്ടു.
എന്നാല് നായിഡു പുറത്ത് അവധിക്കാലത്തിനായി പോയിരിക്കുന്ന സമയം നോക്കി കെട്ടിടം ഏറ്റെടുക്കാന് വെള്ളിയാഴ്ച സര്ക്കാര് തീരുമാനമെടുക്കുകയായിരുന്നു. തുടര്ന്ന് വൈഎസ്ആര് സിപി സര്ക്കാരിന്റെ ആദ്യ യോഗത്തില് പങ്കെടുക്കാന് കളക്ടര്മാര്ക്ക് അവിടെ എത്തിച്ചേരാന് നിര്ദേശം നല്കി. പിന്നാലെ കെട്ടിടം പൊളിക്കുന്ന കാര്യം പ്രഖ്യാപിക്കുകയുമായിരുന്നു. അതിനിടയില് നദീ തീരത്തു നായിഡു പണിതിരിക്കുന്ന വീടും അനധികൃതമാണെന്ന വാദം ഉയര്ന്നിട്ടുണ്ട്.
