ലോകകപ്പില് സെമിസാധ്യത ശക്തമാക്കിയിരിക്കുന്ന ഇന്ത്യയെ പരിക്കുകള് വിടാതെ പിടികൂടുന്നു. ഇന്ത്യയുടെ നാലാം നമ്പര് ബാറ്റ്സ്മാനും ഓള്റൗണ്ടറും ആയ വിജയ് ശങ്കറിനും പരിക്കേറ്റതായിട്ടാണ് പുതിയ റിപ്പോര്ട്ട്. പരിക്കേറ്റതിനെ തുടര്ന്ന് വിജയ് യ്ക്ക് ലോകകപ്പ് നഷ്ടമാകുമെന്നും പകരക്കാരനായി മായങ്ക് അഗര്വാളിനെ തിരിച്ചുവിളിച്ചിട്ടുണ്ടെന്നുമാണ് ഏറ്റവും പുതിയ വിവരം. ഇന്ത്യന് ടീമില് പരിക്കേറ്റ മൂന്നാമത്തെ താരമാണ് വിജയ്.
പരിക്കു മൂലം രണ്ടു പ്രധാന കളിക്കാരെയാണ് ഇന്ത്യയ്ക്ക് നഷ്ടമായിരിക്കുന്നത്. ലോകകപ്പിലെ ആദ്യ മത്സരത്തിന് പിന്നാലെ ഇന്ത്യയ്ക്ക് ഓപ്പണര് ശിഖര് ധവാനെ നഷ്ടമായിരുന്നു. കൈവിരലിന് പരിക്കേറ്റതിനെ തുടര്ന്ന് ടൂര്ണമെന്റ് മുഴുവനായും നഷ്ടമായ ധവാന് നാട്ടിലേക്ക് മടങ്ങി. പകരം എത്തിയത് ഋഷഭ് പന്തായിരുന്നു. പിന്നാലെ ബൗളര് ഭുവനേശ്വര് കുമാറിനാണ് പരിക്കുപറ്റിയത്. ഗുരതരമായ പരിക്ക് ഇല്ലെങ്കിലും ഭുവിക്ക് പകരം എത്തിയ ഷമി മികച്ച പ്രകടനം തുടരുന്ന സാഹചര്യത്തില് അദ്ദേഹത്തെ തുടര്ന്നുള്ള മത്സങ്ങളും കളിപ്പിച്ചു. പരിക്കേറ്റ ഇന്ത്യയുടെ മൂന്നാമനാണ് വിജയ് ശങ്കര്.
ജസ്പ്രീത് ബുംറയുടെ പന്ത് കാല്വിരലില് കൊണ്ടാണ് വിജയ്ക്ക് പരിക്കേറ്റത്. വിജയ് ശങ്കറിന് ഇനിയുള്ള മത്സരം കളിക്കാനാകില്ലെന്നും അദ്ദേഹം നാട്ടിലേക്ക് മടങ്ങുമെന്നും ബിസിസിഐ വക്താവ് മാധ്യമങ്ങളോട് പറഞ്ഞിരിക്കുകയാണ്. പകരക്കാരനായി മായങ്ക് അഗര്വാളിനോട് ഇംഗ്ലണ്ടിലേക്ക് എത്താന് ബിസിസിഐ ആവശ്യപ്പെട്ടിട്ടുണ്ട്. ഓപ്പണറായി മായങ്ക് എത്തുന്നതോടെ അദ്ദേഹത്തെ ഓപ്പണ് ചെയ്യിച്ച് കെ എല് രാഹുലിനെ നാലാം നമ്പറില് ഇറക്കാമെന്നാണ് ബിസിസിഐ പ്രതീക്ഷ. കഴിഞ്ഞ മത്സരത്തില് പന്തിനെയാണ് നാലാം നമ്പറില് ഇറക്കിയത്.
