നെടുങ്കണ്ടം: ഏറെ വിവാദം ഉണ്ടാക്കിയ നെടുങ്കണ്ടം കസ്റ്റഡിമരണ കേസില് അറസ്റ്റിലായ നെടുങ്കണ്ടം എസ് ഐ സാബു കുഴഞ്ഞുവീണതിനെ തുടര്ന്ന് മെഡിക്കല് കോളേജ് ആശുപത്രിയില് പ്രവേശിപ്പിച്ചു. സാബുവും സ്റ്റേഷന് ഓഫീസറായ സജീവ് ആന്റണിയുമാണ് അറസ്റ്റിലായിരിക്കുന്നത്. രാജ്കുമാറിന് മര്ദ്ദനമേല്ക്കുന്ന സമയത്ത് ഇരുവരും സ്റ്റേഷനില് ഉണ്ടായിരുന്നതായി കണ്ടെത്തി.
കസ്റ്റഡിയില് വെച്ച് ക്രൂരമായി മര്ദ്ദിച്ചു എന്ന കുറ്റമാണ് ഇവര്ക്കെതിരേ ചുമത്തിയിരിക്കുന്നത്. പ്രതിയെ പിടികൂടിയിട്ടും ദിവസങ്ങളോളം അറസ്റ്റ് രേഖപ്പെടുത്താതെ ക്രൂരമായി മര്ദ്ദിച്ചെന്നും കൃത്യവിലോപം കാട്ടിയെന്നുമാണ് കേസ്. രാജ്കുമാറിന്റെ മരണത്തിന് കാരണം ന്യൂമോണിയ ബാധയാണെന്നാണ് പ്രാഥമിക പോസ്റ്റുമാര്ട്ടം റിപ്പോര്ട്ടെങ്കിലും പനി പിടിക്കാനും അസുഖം ബാധിക്കാരും കാരണം കസ്റ്റഡി മര്ദ്ദനമാണോ എന്ന് വ്യക്തമാക്കേണ്ടതുണ്ട്. അറസ്റ്റ് ചെയ്തവരെ ഇന്നു തന്നെ പോലീസ് കോടതിയില് ഹാജരാക്കാനാണ് ഉദ്ദേശിച്ചിരുന്നത്. അതിനിടയിലാണ് സാബു കുഴഞ്ഞുവീണത്. കോട്ടയത്ത് ആശുപത്രിയില് ഇയാളുടെ ഇ സിജിയില് വേരിയേഷന് കാണുകയും രക്തസമ്മര്ദ്ദം കുറയുകയും ചെയ്തിട്ടുണ്ട്.
വിദഗ്ദ്ധ പരിശോധന നടത്തി കൂടുതല് ചികിത്സ ആവശ്യമുണ്ട് എന്ന് ഡോക്ടര്മാര് പറഞ്ഞാല് മാത്രം ആശുപത്രിയില് കിടത്തും. കുഴപ്പങ്ങളില്ലെങ്കില് ഇന്ന് തന്നെ റിമാന്റ് ചെയ്യും. അതേസമയം കൂട്ടുപ്രതി സജീവിനെ ഇന്ന് കോടതിയില് ഹാജരാക്കുമെന്നാണ് സൂചനകള്. സംഭവത്തില് പിന്നീട് കൂടുതല് അറസ്റ്റുകള് നടക്കുമെന്നും വിവരമുണ്ട്. കേസില് ആദ്യത്തെ അറസ്റ്റാണ് രേഖപ്പെടുത്തിയത്. സംഭവത്തില് എട്ടു പോലീസുകാരെ സസ്പെന്റു ചെയ്യുകയും അഞ്ചു പേരെ സ്ഥലം മാറ്റുകയും ചെയ്തിരുന്നു. അതേസമയം കേസില് ഉന്നത പോലീസുകാരെ വിട്ടുകളഞ്ഞെന്ന ആക്ഷേപമുണ്ട്.
