കോട്ടയം: കോട്ടയം വെമ്പള്ളിയില് അപകടത്തില്പ്പെട്ടയാള് രക്തം വാര്ന്ന് മരിച്ച സംഭവത്തില് മുഖ്യമന്ത്രിയുടെ ഓഫീസ് റിപ്പോര്ട്ട് തേടി. പരിക്കേറ്റയാളെ ആശുപത്രിയില് എത്തിക്കുന്നതില് പോലീസ് അനാസ്ഥകാട്ടിയെന്ന പരാതിയിലാണ് മുഖ്യമന്ത്രിയുടെ ഓഫീസിന്റെ ഇടപെടല് ഉണ്ടായിരിക്കുന്നത്. സംഭവത്തില് വിശദമായ അന്വേഷണത്തിനും മുഖ്യമന്ത്രിയുടെ ഓഫീസ് നിര്ദേശം നല്കി. കോട്ടയം ജില്ലാ പോലീസ് മേധാവിക്കാണ് നിര്ദേശം നല്കിയിരിക്കുന്നത്.
വെമ്പള്ളിയില് ഞായറാഴ്ച വൈകുന്നേരമായിരുന്നു ദാരുണ സംഭവം. കുറവിലങ്ങാട് സ്വദേശിയായ റോണി ജോയും മകന് ഫിലിപ്പും സഞ്ചരിച്ചിരുന്ന ബൈക്കില് മറ്റൊരു വാഹനം ഇടിക്കുകയായിരുന്നു. ഈ സമയത്ത് തൃശൂര് എ.ആര് ക്യാമ്പിലെ പോലീസ് വാഹനം അതുവഴി കടന്നുപോയെങ്കിലും പരിക്കേറ്റവരെ ആശുപത്രിയില് എത്തിക്കാന് തയാറായില്ല. പരിക്കേറ്റവരെ പോലീസ് വാഹനത്തില് കയറ്റണമെന്ന് നാട്ടുകാര് ആവശ്യപ്പെട്ടെങ്കിലും സംഘം അത് വിസമ്മതിച്ചു.
അരമണിക്കൂറോളം റോഡില് രക്തം വാര്ന്നു കിടന്നതിനു ശേഷമാണ് പോലീസ് വാഹനം എത്തി പരിക്കേറ്റവരെ ആശുപത്രിയില് എത്തിച്ചത്. റോണിയെ ആശുപത്രിയില് എത്തിച്ചപ്പോഴേയ്ക്കും മരണം സംഭവിക്കുകയായിരുന്നു.
