ബങ്കിപുരിൽ പ്രശാന്ത് കിഷോറിന് ചരിത്രജയം; ഉപതിരഞ്ഞെടുപ്പിൽ ബിജെപിക്ക് തിരിച്ചടി

ന്യൂഡൽഹി: ബിഹാർ, മധ്യപ്രദേശ് എന്നിവിടങ്ങളിലായി നടന്ന നിയമസഭാ ഉപതിരഞ്ഞെടുപ്പുകളിൽ ബിജെപിക്ക് തിരിച്ചടി. ബിഹാറിലെ ബങ്കിപുരിൽ ജൻ സുരാജ് പാർട്ടി സ്ഥാനാർഥിയും പ്രമുഖ തിരഞ്ഞെടുപ്പ് തന്ത്രജ്ഞനുമായ പ്രശാന്ത് കിഷോർ വിജയിച്ച് രാഷ്ട്രീയ അരങ്ങേറ്റം കുറിച്ചു. മധ്യപ്രദേശിലെ ദാതിയയിൽ കോൺഗ്രസ് സ്ഥാനാർഥി ഘനശ്യാം സിങ് വിജയിച്ചപ്പോൾ, ഗുജറാത്തിലെ മഞ്ജൽപുരിൽ ബിജെപിയുടെ സതേന്ദ്രഭായ് പട്ടേൽ സീറ്റ് നിലനിർത്തി.

ബങ്കിപുരിൽ ബിജെപി സ്ഥാനാർഥി നീരജ് കുമാറിനെ 19,000-ത്തിലധികം വോട്ടുകൾക്ക് പരാജയപ്പെടുത്തിയാണ് പ്രശാന്ത് കിഷോറിന്റെ വിജയം. ആർജെഡിയുടെ രേഖാ കുമാരി മൂന്നാം സ്ഥാനത്തായി.

മധ്യപ്രദേശിലെ ദാതിയയിൽ ബിജെപിയുടെ അശുതോഷ് തിവാരിയെ പരാജയപ്പെടുത്തി കോൺഗ്രസിന്റെ ഘനശ്യാം സിങ് മണ്ഡലം നിലനിർത്തി. ഗുജറാത്തിലെ മഞ്ജൽപുരിൽ ബിജെപിയുടെ സതേന്ദ്രഭായ് പട്ടേൽ 55,481 വോട്ടുകൾ നേടി 30,630 വോട്ടിന്റെ ഭൂരിപക്ഷത്തിൽ വിജയിച്ചു. കോൺഗ്രസിന്റെ ഭിക്കാഭായ് റബാരിക്ക് 24,851 വോട്ടുകൾ ലഭിച്ചു.

ബിഹാറിലെ സിറ്റിങ് എംഎൽഎ നിതിൻ നബിൻ രാജ്യസഭയിലേക്ക് തിരഞ്ഞെടുക്കപ്പെടുകയും പിന്നീട് ബിജെപി ദേശീയ അധ്യക്ഷനായി ചുമതലയേൽക്കുകയും ചെയ്തതോടെയാണ് ബങ്കിപുർ സീറ്റ് ഒഴിവായത്. ഇതോടെയാണ് ഉപതിരഞ്ഞെടുപ്പ് നടന്നത്. പ്രശാന്ത് കിഷോർ രൂപീകരിച്ച ജൻ സുരാജ് പാർട്ടിയുടെ സ്ഥാനാർഥിയായി അദ്ദേഹം നേരിട്ട് മത്സരിച്ചതോടെ തിരഞ്ഞെടുപ്പ് ദേശീയ ശ്രദ്ധ നേടിയിരുന്നു. 1995 മുതൽ ബിജെപി തുടർച്ചയായി വിജയിച്ചുവരുന്ന, നിതിൻ നബിൻ അഞ്ചുതവണ തുടർച്ചയായി പ്രതിനിധീകരിച്ച മണ്ഡലമാണ് ബങ്കിപുർ.