തൊടുപുഴ: നെടുങ്കണ്ടം കസ്റ്റഡി മരണവുമായി ബന്ധപ്പെട്ട് പോലീസിനെ കുരുക്കി കൂടുതല് വെളിപ്പെടുത്തലുകളുമായി രാജ്കുമാറിന്റെ കൂട്ട് പ്രതി ശാലിനി. പോലീസ് അതിക്രൂരമായി തന്നെയും രാജ്കുമാറിനെയും മര്ദ്ദിച്ചുവെന്ന് ശാലിനി പറഞ്ഞു. രാജ്കുമാറിനെ മര്ദ്ദിക്കാന് എസ് ഐ നിര്ദ്ദേശം നല്കി. പോലീസില് ഏല്പ്പിക്കുന്നതിന് മുമ്പ് നാട്ടുകാരുടെയും മര്ദ്ദനമേറ്റിരുന്നു. പോലീസ് തനിക്കെതിരെ മുളക് പ്രയോഗം നടത്തിയെന്നും ശാലിനി പറഞ്ഞു
വായ്പ വാങ്ങുന്നതിനായാണ് രാജ്കുമാറിനെ പരിചയപ്പെട്ടത്. സംഘത്തില് അംഗങ്ങളെ ചേര്ത്തത് കൊണ്ട് പിന്നീട് തന്നെ എംഡി ആക്കി. കോടികളുടെ ബിസിനസ് നടന്നിട്ടില്ല. പതിനഞ്ച് ലക്ഷം രൂപയാണ് ഇടപാടുകാരില് നിന്നും പിരിച്ചെടുത്തത്. താനറിയാതെ രാജ്കുമാര് പണപ്പിരിവ് നടത്തിയിട്ടുണ്ടോ എന്ന് അറിയില്ല. പണം മലപ്പുറത്തേക്ക് കൊണ്ടുപോകുന്നു എന്നാണ് രാജ്കുമാര് പറഞ്ഞതെന്നും ശാലിനി പറഞ്ഞു.
നാസറാണ് പണം മുടക്കുന്നതെന്ന് രാജ്കുമാര് തന്നോട് പറഞ്ഞിരുന്നു. എന്നാല് ഇടനിലക്കാരന് നാസറിനെ തനിക്ക് നേരിട്ട് അറിയില്ല. പോലീസ് സ്റ്റേഷനില് എത്തിച്ച് ഷര്ട്ട് ഊരിച്ച് രാജ്കുമാറിനെ പോലീസ് ഉദ്യോഗസ്ഥര് ക്രൂരമായി മര്ദ്ദിച്ചു. തനിക്കും മര്ദ്ദനമേറ്റു. രാജ്കുമാറിന്റെ ബാഗില് ഉണ്ടായിരുന്ന 2.30 ലക്ഷം രൂപയും പോലീസ് വാങ്ങിയെടുത്തു. അതേസമയം നാട്ടുകാരില് നിന്നും പിരിച്ച് വാങ്ങിയ പണം തിരികെ കൊടുക്കാനാണെങ്കില് 24 മണിക്കൂര് സമയം നല്കണമെന്ന് എസ് ഐയോട് രാജ്കുമാര് പറഞ്ഞുവെന്നും ശാലിനി വെളിപ്പെടുത്തി. തന്നെ അപകടപ്പെടുത്തുമെന്ന് ഭയമുണ്ടെന്നും അവര് വ്യക്തമാക്കി.
