ആലപ്പുഴ: മുന് മന്ത്രി തോമസ് ചാണ്ടി എം.എല്.എയുടെ ലേക്ക് പാലസ് റിസോര്ട്ടിലെ അനധികൃത നിര്മാണത്തിന് സംസ്ഥാന സര്ക്കാരിന്റെ ഔദാര്യം. ലേക്ക് റിസോര്ട്ടിന് ആലപ്പുഴ നഗരസഭ ചുമത്തിയ 1.17 കോടി രൂപയുടെ പിഴ സര്ക്കാര് ഇടപെട്ട് 34 ലക്ഷമാക്കി ചുരുക്കി. നഗരസഭയുടെ നിര്ദേശം തള്ളിക്കൊണ്ടാണ് സര്ക്കാരിന്റെ പുതിയ ഉത്തരവ്.
ലേക്ക് പാലസിന് നഗരസഭ ഈടാക്കാന് നിര്ദേശിച്ച പിഴ ഈടാക്കാന് കഴിയില്ലെന്നും പകരം 34 ലക്ഷം മാത്രം പിഴ ചുമത്തിയാല് മതിയെന്നും കാണിച്ച് അഡീഷണല് ചീഫ് സെക്രട്ടറി ഉത്തരവിറക്കുകയും ചെയ്തു. ആലപ്പുഴ നഗരസഭാ സെക്രട്ടറിക്കാണ് ഇതുസംബന്ധിച്ച് നിര്ദേശം നല്കിയിരിക്കുന്നത്. തോമസ് ചാണ്ടിയുടെ അപ്പീലിലാണ് സര്ക്കാരിന്റെ തീരുമാനം.
റിസോര്ട്ടിലെ 22 കെട്ടിടങ്ങളില് കൂട്ടിച്ചേര്ക്കല് നടത്തിയതായും പത്തു കെട്ടിടങ്ങള് പുതിയതായി നിര്മ്മിച്ചതായും ആലപ്പുഴ നഗരസഭ നടത്തിയ പരിശോധനയില് കണ്ടെത്തിയിരുന്നു. 22 കെട്ടിടങ്ങളുടെ വിസ്തീര്ണം 5020.11 ചതുരശ്ര മീറ്ററില് നിന്ന് 6287 ചതുരശ്ര മീറ്ററായി വര്ധിപ്പിച്ചതായാണ് കണ്ടെത്തിയത്. അനധികൃത നിര്മ്മാണങ്ങള് ക്രമകപ്പെടുത്തുന്നതിന്റെ ഭാഗമായി 2.73 കോടി രൂപ പിഴ ചുമത്തിയിരുന്നു. പിന്നീട് റീജണല് ജോയിന്റ് ഡയറക്ടര് നടത്തിയ പരിശോധനയില് പിഴ തുക കൂടുതലാണെന്ന് കണ്ടെത്തി 1.17 കോടി രൂപയായി കുറച്ചിരുന്നു. ഇത് കുറക്കണമെന്ന് ആവശ്യപ്പെട്ടാണ് തോമസ് ചാണ്ടി സര്ക്കാരിനെ സമീപിച്ചത്.
പിഴതുക 34 ലക്ഷമാക്കി കുറച്ച സര്ക്കാര് നിലപാട് അംഗീകരിക്കാനാവില്ലെന്ന് നഗരസഭാ കൗണ്സില് സര്ക്കാരിനെ അറിയിച്ചിരുന്നു. ഇതോടെയാണ് സര്ക്കാര് തീരുമാനം നടപ്പാക്കണമെന്ന് ആവശ്യപ്പെട്ട് അഡീഷണല് ചീഫ് സെക്രട്ടറി വീണ്ടും ഉത്തരവിറക്കിയത്. വസ്തുനടപടികള് പരിശോധിക്കാന് സര്ക്കാരിന് അധികാരമുണ്ടെന്നും സര്ക്കാര് തീരുമാനം നടപ്പാക്കാന് നഗരസഭാ സെക്രട്ടറി ബാധ്യസ്ഥനാണെന്നും പുതിയ ഉത്തരവില് പറയുന്നു.
