ഇടുക്കി : വണ്ടിപ്പെരിയാര് ടൗണ് ഹാളില് തീപിടുത്തം. മൂന്ന് മണിക്കൂര് നീണ്ട് നിന്ന പരിശ്രമത്തിനൊടുവിലാണ് തീ അണക്കാനായത്. പീരുമേട് നിന്നുള്ള ഫയര്ഫോഴ്സ് യൂണിറ്റെത്തി തീയണക്കാന് ശ്രമിച്ചെങ്കിലും കഴിയാതെ വന്നതോടെ കട്ടപ്പനയില് നിന്ന് രണ്ട് യൂണിറ്റ് കൂടിയെത്തിയാണ് തീ അണച്ചത്.
ഇന്നുച്ചക്ക് ഒന്നരയോടെയാണ് ടൗണ്ഹാളിന്റെ രണ്ടാം നിലയില് തീപിടുത്തം ഉണ്ടായത്. തീപിടുത്തത്തിന് കാരണം ഷോര്ട്ട് സര്ക്യൂട്ടാണെന്നാണ് വിവരം. ടൗണ്ഹാളിന്റെ ഒന്നാം നിലയില് വിവാഹ ചടങ്ങ് നടക്കുന്നതിനിടെയാണ് രണ്ടാം നിലയില് തീപിടിത്തമുണ്ടായത്.ഇവിടെ മറ്റ് കടകളില് നിന്നും ശേഖരിച്ച പ്ലാസ്റ്റിക് കവറുകള് സൂക്ഷിച്ചിരുന്നു.
തീപിടിച്ചത് ശ്രദ്ധയില്പ്പെട്ട ഉടന് തന്നെ വിവാഹ ചടങ്ങിനെത്തിയ ആളുകളെ മാറ്റിയതിനാല് വന് ദുരന്തം ഒഴിവാകുകയായിരുന്നു. 1500 ഓളം ആളുകള് വിവാഹ പരിപാടിയില് പങ്കെടുക്കാന് എത്തിയെന്നാണ് വിവരം.
