ന്യൂഡല്ഹി: ലോകകപ്പിന് പിന്നാലെ നടക്കുന്ന വെസ്റ്റിന്ഡീസ് പര്യടനത്തിനുള്ള ക്രിക്കറ്റ് ടീമില് മുന് നായകന് മഹേന്ദ്രസിംഗ് ധോനി ഉണ്ടാകുമോ ഇല്ലയോ എന്ന അഭ്യൂഹത്തിന് വിരാമമാകുന്നു. അടുത്ത ദിവസം ടീമിനെ പ്രഖ്യാപിക്കാനിരിക്കെ താന് വെസ്റ്റിന്ഡീസ് പര്യടനത്തിന് ഇല്ലെന്ന് ധോനി തന്നെ അറിയിച്ചതായിട്ടാണ് വിവരം. അതേസമയം തന്നെ താരം ക്രിക്കറ്റില് നിന്നും വിരമിക്കില്ലെന്നും അറിയിച്ചു.
വിന്ഡീസ് ടൂറില് നിന്നും വിട്ടു നില്ക്കുന്ന ധോനി സൈനിക സേവനത്തിനായി പോകും. ലഫ്നന്റ് കേണല് ബഹുമതി കിട്ടിയിട്ടുള്ള ധോനി അടുത്ത രണ്ടു മാസം ടെറിട്ടോറിയല് ആര്മിയിലെ പാരച്യൂട്ട് റെജിമെന്റിനൊപ്പം ചേരുമെന്നാണ് വിവരം. അര്ദ്ധ സൈനിക വിഭാഗത്തിനൊപ്പം ചേരുന്നതിനായി വിന്ഡീസ് പര്യടനത്തിനില്ല എന്ന് ധോനി തന്നെ പറഞ്ഞതായി ബിസിസിഐ വൃത്തങ്ങളാണ് വ്യക്തമാക്കിയിട്ടുള്ളത്. ഇക്കാര്യം നായകന് കോഹ്ലിയെയും മുഖ്യ സെലക്ടര് എംഎസ്കെ പ്രസാദിനെയും ധോനി അറിയിച്ചിട്ടുണ്ടെന്നാണ് റിപ്പോര്ട്ടുകള്.
ഞായറാഴ്ചയാണ് വിന്ഡീസ് പര്യടനത്തിനുള്ള ടീമിനെ തീരുമാനിക്കാന് ബിസിസിഐ യുടെ സെലക്ഷന് കമ്മറ്റി ചേരുന്നത്. അതേസമയം തന്നെ ധോനി ക്രിക്കറ്റില് നിന്നും വിരമിക്കുന്നില്ലെന്നും വ്യക്തമായി. ധോനി ക്രിക്കറ്റില് നിന്നും വിരമിക്കുന്നില്ല. രണ്ടുമാസം സൈന്യത്തിനൊപ്പം ചെലവഴിക്കാന് അദ്ദേഹം തീരുമാചിച്ചു. വെസ്റ്റിന്ഡീസ് പര്യടനത്തിനില്ല. എന്നിങ്ങനെ മൂന്ന് കാര്യങ്ങള് അറിയിക്കുകയാണെന്ന് ബിസിസിഐ വക്താവ് പറഞ്ഞതായിട്ടാണ് വിവരം.
ധോനി പര്യടനത്തില് നിന്നും പിന്മാറിയതോടെ യുവതാരം ഋഷഭ് പന്തിനെ മൂന്ന ഫോര്മാറ്റിലും വിക്കറ്റ് കീപ്പറായി നിയോഗിക്കാന് സാധ്യതയേറി. വൃദ്ധിമാന് സാഹയായിരിക്കും ടെസ്റ്റില് റിസര്വ്വ് കീപ്പറുടെ ഗ്ളൗസ് അണിയുക. ധോനിയെ വെസ്റ്റിന്ഡീസ് പര്യടനത്തിനുള്ള ടീമില് ഉള്പ്പെടുത്തില്ലെന്ന് നേരത്തേ തന്നെ റിപ്പോര്ട്ടുകളുണ്ടായിരുന്നു. അതുപോലെ ടീമില് കളിക്കാന് അനേകം യുവതാരങ്ങള് നില്ക്കുമ്പോള് ധോനി വിരമിക്കണമെന്ന മുറവിളിയും ശക്തമായിരുന്നു. ഗൗതം ഗംഭീര് അടക്കമുള്ള താരങ്ങള് ധോനിക്കെതിരേ ശക്തമായി രംഗത്ത് വന്നിരുന്നു.
