ബംഗളുരു: കര്ണാടകയിലെ കോണ്ഗ്രസ്-ജെ.ഡി.എസ് സര്ക്കാരിനെ പാഠം പഠിപ്പിക്കുമെന്ന് വിമത എം.എല്.എമാര്. തങ്ങള് മുംബൈയില് എത്തിയത് മറ്റ് ലക്ഷ്യങ്ങള്ക്ക് വേണ്ടിയല്ലെന്ന് എം.എല്.എമാര് അവകാശപ്പെട്ടു. പണത്തിന് വേണ്ടിയുമല്ല മുംബൈയില് വന്നത്. കോണ്ഗ്രസ്-ജെ.ഡി.എസ് സര്ക്കാരിനെ ഒരു പാഠം പഠിപ്പിക്കുക എന്നത് മാത്രമാണ് ലക്ഷ്യം. പ്രശ്നങ്ങള് പരിഹിച്ച് കഴിഞ്ഞാല് ബംഗളുരുവിലേക്ക് മടങ്ങി പോകുമെന്നും എം.എം.എല്മാര് പറഞ്ഞു.
വാര്ത്താ ഏജന്സിയായ എ.എന്.ഐയോട് സംസാരിക്കുകയായിരുന്നു വിമത എം.എല്.എമാര്. നാളെ കര്ണാടക നിയമസഭയില് വിശ്വാസ വോട്ടെടുപ്പ് നടക്കാനിരിക്കെയാണ് വിമത എം.എല്.എമാരുടെ പ്രതികരണം. നാളെ സഭയില് സ്വീകരിക്കേണ്ട നിലപാട് ചര്ച്ച ചെയ്യാന് കോണ്ഗ്രസ് നിയമസഭാ കക്ഷി യോഗവും വിളിച്ചിട്ടുണ്ട്.
Rebel #Karnataka MLAs in #Mumbai: We haven't come here with other intention but to teach a lesson to this coalition (Congress-JDS) govt. We haven't come here for money or any other thing. We will go back to Bengaluru once everything is sorted out. pic.twitter.com/zVNXPnIKBI
— ANI (@ANI) July 21, 2019
അതിനിടെ കോണ്ഗ്രസ്-ജെ.ഡി.എസ് സഖ്യ സര്ക്കാരിന് വീണ്ടും തിരിച്ചടിയാകുന്ന നിലപാടുമായി ബി.എസ്.പി എം.എല്.എയും രംഗത്ത് വന്നു. വിശ്വാസ വോട്ടെടുപ്പില് പങ്കെടുക്കില്ലെന്ന് ബി.എസ്.പിയുടെ ഏക എം.എല്.എയായ എന് മഹേഷ് വ്യക്തമാക്കി. മായാവതിയുടെ നിര്ദ്ദേശപ്രകാരമാണ് സഭയില് നിന്ന് വിട്ടുനില്ക്കുന്നതെന്നും എം.എല്.എമ അറിയിച്ചു. കൊല്ലെഗല് എം.എല്.എയാണ് എന്. മഹേഷ്. കോണ്ഗ്രസിന്റെ 13 എം.എല്.എമാരും ജെ.ഡി.എസിന്റെ മൂന്ന് എം.എല്.എമാരുമാണ് ബി.ജെ.പി പാളയത്തിലേക്ക് കൂറുമാറിയിരിക്കുന്നത്.
എം.എല്.എമാരുടെ കൂറുമാറ്റത്തോടെ വിശ്വാസവോട്ടെടുപ്പില് സഖ്യസര്ക്കാര് പരാജയപ്പെടുമെന്ന് ഉറപ്പായിരിക്കുകയാണ്. നിലവില് ബി.ജെ.പി പക്ഷത്ത് 105 എം.എല്.എമാരുണ്ട്. എന്നാല് സഖ്യ സര്ക്കാര് വിജയിച്ചാല് എച്ച്.ഡി കുമാരസ്വാമിയെ മുഖ്യമന്ത്രി സ്ഥാനത്ത് നിന്ന് മാറ്റിയേക്കുമെന്ന് സൂചനകളുണ്ട്. ജെ.ഡി.എസില് നിന്ന് കോണ്ഗ്രസ് മുഖ്യമന്ത്രി സ്ഥാനം ഏറ്റെടുക്കുകയും ഡി.കെ ശിവകുമാറിനെ മുഖ്യമന്ത്രിയാക്കാനുമാണ് ആലോചന.
