ഇസ്ലാമാബാദ്: മീടൂ ആരോപണത്തില് കുടുങ്ങി പാക്കിസ്താന് ക്രിക്കറ്റ് താരം ഇമാം ഉള് ഹഖ്. അടുത്തിടെ ഇംണ്ടില് നടന്ന ലോകകപ്പില് പാക്കിസ്താനുവേണ്ടി ഓപ്പണിങ് ചെയ്ത താരത്തിനെതിരെ ട്വിറ്ററിലൂടെയാണ് ആരോപണം ഉയര്ന്നിരിക്കുന്നത്. ഒരു ട്വിറ്റര് ഉപയോക്താവാണ് താരം വഞ്ചിച്ചെന്നും ഒരേ സമയം ഒന്നിലധികം സ്ത്രീകളുമായും ഇമാമിന് ബന്ധമുണ്ടെന്നും ആരോപണം ഉയര്ത്തിയിരിക്കുന്നത്.
നിരവധി സ്ത്രീകളുമായി ബന്ധം പുലര്ത്തുന്നുവെന്ന് ആരോപണം ഉയര്ത്തിയതിനൊപ്പം സ്ത്രീകളുമായുള്ള ഇമാമിന്റെ വാട്സ്ആപ്പ് ചാറ്റുകളും പുറത്തുവിട്ടിട്ടുണ്ട്. ഒരേസമയം ഒന്നിലധികം സ്ത്രീകളുമായി ബന്ധം പുലര്ത്തുന്നതിലൂടെ അവരെ ചൂഷണം ചെയ്യുകയാണെന്നും ആരോപണം ഉയര്ത്തിയ ട്വിറ്റര് ഉപയോക്താവ് ചൂണ്ടിക്കാട്ടുന്നു. ആരോപണം ഉയര്ന്നതിനു പിന്നാലെ സോഷ്യല്മീഡിയയില് ഒരു വിഭാഗം താരത്തിനെതിരെയും താരത്തെ അനുകൂലിച്ചും രംഗത്തെത്തി. താരം നടത്തിയ ചാറ്റുകളുടെ സ്ക്രീന്ഷോട്ടാണ് ട്വിറ്ററിലുടെ പുറത്തുവന്നിരിക്കുന്നത്.
ഒരേസമയം ഏഴു മുതല് എട്ട് സ്ത്രീകളുമായും ബന്ധം പുലര്ത്തുന്ന ഇമാം അവരെ മോശമായ രീതിയില് ഉപയോഗിക്കുകയാണെന്നും പറയുന്നു. എപ്പോഴും എങ്ങനെ ഒറ്റയ്ക്ക് കഴിയും എന്നാണ് ഇമാം എപ്പോഴും പറയുന്നതെന്നും ട്വിറ്റര് ആരോപണത്തില് പറയുന്നുണ്ട്. ഡേറ്റിങ്ങ് നടത്തുകയും വിവാഹം കഴിക്കാമെന്ന് വാഗ്ദാനം നല്കി അതില് നിന്ന് പിന്മാറുകയും ചെയ്യുകയാണെങ്കില് അത് മീടൂ വില് ഉള്പ്പെടും. എന്നാലിവിടെ ഇമാം ഉള് ഹഖ് നിരന്തരം ശല്യം ചെയ്യുകയോ ചിത്രങ്ങളോ മറ്റോ ആവശ്യപ്പെടുക പോലും ചെയ്തിട്ടില്ല, സമ്മതത്തോടെ ബന്ധം തുടരുന്നതിനിടെ മറ്റൊരാളെ ഇത്തരത്തില് അപകീര്ത്തിപ്പെടുന്നത് നിര്ത്തണമെന്നും സോഷ്യല് മീഡിയയില് വിമര്ശം ഉയര്ന്നു. ലോകകപ്പില് ബംഗ്ലാദേശിനെതിരെ നടന്ന പാക്കിസ്താന്റെ അവസാന മത്സരത്തില് ഇമാം സെഞ്ചുറി നേടിയിരുന്നു.
