ലക്നൗ: ഉന്നാവോ പീഡനത്തിന്റെ പശ്ചാത്തലത്തില് ജയിലില് കിടക്കുന്നു എങ്കിലും ബിജെപി എംഎല്എ കുല്ദീപ് സിംഗ് അതികായന്. പാര്ട്ടിക്കുള്ളില് സെന്ഗാര് അറിയപ്പെടുന്നത് 'ബാഹുബലി' എന്ന്. 52 കാരനായ സെന്ഗാറിന് ഠാക്കൂര് സമുദായത്തിലുള്ള പിന്തുണയുടെ പശ്ചാത്തലമാണ് ഇതിന് കാരണം. പല തവണ കാലുമാറ്റി ചവിട്ടിയ സെന്ഗാര് കോണ്ഗ്രസ്, ബിഎസ്പി, എസ് പി തുടങ്ങി യുപിയിലെ മൂന്ന് പാര്ട്ടികളുടെ ഭാഗമായിട്ടാണ് ഒടുവില് ബിജെപിയില് ചേര്ന്നത്.
ബിജെപിയിലെ ഠാക്കൂര് ലോബിയുടെ വലിയ പിന്തുണയുള്ള ഇയാള് എസ്പി വിട്ടെത്തുമ്പോള് ബിജെപി പരിഗണിച്ചതും ഈ ജാതി മാഹാത്മ്യം തന്നെ. യുപിയില് സെന്ഗാറിന് പ്രതിരോധമന്ത്രി രാജ്നാഥ് സിംഗിന്റെയും യുപി മുഖ്യമന്ത്രി യോഗി ആദിത്യനാഥിന്റെയും ശക്തമായ പിന്തുണ കിട്ടിയിരുന്നതായി ബിജെപി വൃത്തങ്ങള് തന്നെ വ്യക്തമാക്കുന്നു.
2018 ല് പീഡനകേസില് സിബിഐ സെന്ഗാറിനെ അറസ്റ്റ് ചെയ്തതിന് പിന്നാലെ ഇപ്പോള് വരെ അദ്ദേഹം ജയിലിലാണ്. ജയിലില് കിടക്കുന്ന സെന്ഗാറിനെ കാണാന് ജൂണില് ഉന്നാവോയിലെ ബിജെപി എംപി സാക്ഷി മഹാരാജ് സിതാപൂര് ജയിലില് എത്തിയിരുന്നത് വാര്ത്തയായിരുന്നു. 2018 ല് ബലാത്സംഗ കേസില് പെട്ടപ്പോള് ഇയാള്ക്കെതിരേ ബിജെപി നേതാക്കള് നടപടി ആലോചിച്ചിരുന്നു എങ്കിലും പാര്ട്ടിക്ക് ചെറുവിരല് പോലും അനക്കാനായിട്ടില്ല. ബിജെപിയില് ജാതീയത ശക്തമാണെന്നും ആരോപണ വിധേയനായിട്ടും ഠാക്കൂര് ലോബി സെന്ഗാറിനെ ശക്തമായി പിന്തുണയ്ക്കുകയാണെന്നും എസ് പി നേതാക്കള് ആരോപിക്കുന്നു.
ഉന്നാവോയിലെ നാലു മണ്ഡലങ്ങളില് നിന്നും നാലു തവണ തെരഞ്ഞെടുക്കപ്പെട്ട സെന്ഗാര് കാലുമാറ്റ കാര്യത്തിലും പ്രസിദ്ധനാണ്. കോണ്ഗ്രസിലും ബിഎസ്പിയിലും സമാജ്വാദി പാര്ട്ടിയിലും ഭാഗ്യം പരീക്ഷിച്ച ശേഷമാണ് സെന്ഗാര് ബിജെപിയില് എത്തിയത്. വെറും 12 ാം ക്ളാസ്സ് വിദ്യാഭ്യാസം മാത്രമുള്ള സെന്ഗര് 1995 ല് കോണ്ഗ്രസിനൊപ്പമാണ് രാഷ്ട്രീയ ജീവിതം തുടങ്ങിയത്. 2002 ല് ബിഎസ്പിയിലേക്ക് മാറി ഉന്നാവോയിലെ സദര് സീറ്റില് നിന്നും ജയിച്ചു. 2007 ലെ തെരഞ്ഞെടുപ്പിന് തൊട്ടു മുമ്പ് അച്ചടക്ക നടപടിയുടെ ഭാഗമായി മായാവതി ബിഎസ്പിയില് നിന്നും പുറത്താക്കി. എന്നാല് സെന്ഗാറിനെ എസ്പി ഏറ്റെടുത്തു. ട ബംഗര് മൗവിലെ സ്ഥാനാര്ത്ഥിയായി ജയം. 2012 ല് ഭഗവന്ത് നഗറില് നിന്നും തെരഞ്ഞെടുക്കപ്പെട്ടു. പിന്നീട് എസ്പി യ്ക്കൊപ്പം രണ്ടു തവണ കൂടി ജയിച്ചു. എസ്പി യില് ശിവപാല് യാദവിന്റെ പക്ഷക്കാരനായിരുന്നു. 2017 ല് എസ്പിയില് ശിവപാലിനും അഖിലേഷ് യാദവിനും ഇടയില് പ്രശ്നം തുടങ്ങിയതോടെ സെന്ഗാര് ബിജെപിയിലേക്ക് ചേക്കേറി ബംഗാര്മൗ വിജയം ആവര്ത്തിച്ചു.
2019 ലെ ലോക്സഭാ തെരഞ്ഞെടുപ്പിലും സെന്ഗാറിന് മത്സരിക്കാന് ആയിരുന്നു ബിജെപിയുടെ പദ്ധതി. എന്നാല് ബലാത്സംഗക്കേസ് രാജ്യം മുഴുവന് വാര്ത്തയായതോടെ ഒഴിവാക്കി. വീട്ടില് സെന്ഗാറിന് പുറമേ ഭാര്യയും സഹോദരനും ജനപ്രതിനിധികളാണ്. ഉന്നാവോ ജില്ലാ പഞ്ചായത്ത് പ്രസിഡന്റാണ് ഭാര്യ. സഹോദരന് ബ്ളോക്ക് പ്രമുഖും. രാഷ്ട്രീയക്കാരനായ ശേഷം സെന്ഗാര് വന്തോതില് സമ്പത്തും നേടിയെടുത്തു. 2007 ല് പേരില് 36,23,144 രൂപയുടെ മൂല്യത്തിലുള്ള വസ്തു മാത്രം കൈവശമുണ്ടായിരുന്ന സെന്ഗാറിന്റെ വസ്തു മൂല്യം 2012 ല് 1,27, 26,000 രൂപയായി ഉയര്ന്നു. 2017 ല് അദ്ദേഹത്തിന്റെ വസ്തുമൂല്യം 2,90,44,307 രൂപയിലായി.
