കൊച്ചി: പഞ്ചാബി ഹൗസ് എന്ന് കേള്ക്കുമ്പോള് മലയാളികളുടെ മനസ്സിലേക്ക് ഓടിയെത്തുന്നത് രമണനും ഹൈദ്രോസുമൊക്കെയായിരിക്കാം. എന്നാല് സിനിമ വേറെ ജീവിതം വേറെ എന്നത് പ്രളയമുഖത്ത് കാരുണ്യം നിറച്ച് മാതൃകാ പരമായി കാട്ടിത്തരികയാണ് കൊച്ചിയിലെ സിഖ് സമൂഹം. പ്രളയം നാശം വിതച്ച ദുരന്തമേഖലയിലെ വിശപ്പ് തിരിച്ചറിഞ്ഞ് വടക്കന് കേരളത്തിലെ ദുരിതാശ്വാസ ക്യാമ്പുകളില് ഭക്ഷണവുമായി എത്തിയിരിക്കുകയാണ് ഇവര്. കേരളത്തിലെ ദുരിതാശ്വാസ ക്യാമ്പുകളില് ഇവര് വിളമ്പിയ ഭക്ഷണം ആള്ക്കാര് രുചിച്ചുകഴിഞ്ഞു.
തേവര ഗുരുദ്വാര ശ്രീഗുരു സിംഗ് സഭയിലെ അഞ്ചു പേര് അടങ്ങുന്ന ടീം ദുരിതാശ്വാസ ക്യാമ്പുകളില് ഇഷ്ടഭക്ഷണം വിളമ്പാന് വയനാട്ടിലെത്തി. വടക്കന് കേരളത്തിലെ മേപ്പാടി ഗവണ്മെന്റ് ഹയര് സെക്കണ്ടറി സ്കൂളിലെ ദുരിതാശ്വാസ ക്യാമ്പില് ഇവര് അടുക്കള തുറന്നിരിക്കുകയാണ്. ചൂടേറിയ പഞ്ചാബി വിഭവങ്ങളുമായി 1200 പേരെയാണ് ക്യാമ്പില് ഇവര് തിങ്കളാഴ്ച ഊട്ടിയത്. ചൊവ്വാഴ്ച വയനാട്ടിലെ മറ്റൊരു ക്യാമ്പില് 1,500 പേര്ക്ക് ഭക്ഷണം നല്കാന് കൊച്ചിയില് നിന്നും മറ്റൊരു ടീമും പോയിരുന്നു. തേവരയിലെ ഗുരുദ്വാരയില് തയ്യാറാക്കിയ ഭക്ഷണം എറണാകുളത്തെ ദുരിതാശ്വാസ ക്യാമ്പില് നാലു ദിവസത്തോളം വിതരണം ചെയ്തിരുന്നു.
ദിവസങ്ങള്ക്ക് മുമ്പ് ഇവര് ഒരു ട്രക്ക് നിറയെ ആവശ്യ വസ്തുക്കളുമായി ട്രക്കില് വയനാടിന് പോയിരുന്നു. എന്നാല് വെള്ളപ്പൊക്കവും മണ്ണിടിച്ചിലും മൂലം പാതി വഴിയില് യാത്ര തടസ്സപ്പെട്ടു. ട്രക്കുമായി തിരിച്ചു പോയെങ്കിലും ബസിലേറി വയനാട്ടില് എത്തുകയും അധികൃതരുടെ സഹായത്തോടെ ഭക്ഷണം ഉണ്ടാക്കി നല്കുകയുമായിരുന്നു. ചോറും, പരിപ്പും, ചപ്പാത്തിയും പച്ചക്കറിയുമാണ് കൂടുതലും വിതരണം ചെയ്തത്. മൂന്ന് ദിവസം കൊണ്ട് എറണാകുളത്തും വയനാട്ടിലുമായി 3000 പേര്ക്കായിരുന്നു ഭക്ഷണം നല്കിയത്. ടീം അംഗങ്ങള് എല്ലാവരും തന്നെ ജോലി ചെയ്യുന്നവര് ആയിരുന്നു. തലേ ദിവസം തന്നെ വോളണ്ടിയര് മാരില് നിന്നും ക്യാമ്പ് ഓഫീസര്മാരില് നിന്നും നിര്ദേശങ്ങള് സ്വീകരിച്ചായിരുന്നു പിറ്റേ ദിവസത്തേക്ക് ഭക്ഷണം തയ്യാറാക്കിയത്. കഴിഞ്ഞ പ്രളയ കാലത്ത് കുട്ടനാട് ഉള്പ്പെടെ കേരളത്തില് അനേകം പ്രളയ ദുരിതാശ്വാസ പദ്ധതികളില് സഹായവുമായി എത്തിയ പാട്യാലയിലെ സിഖ് എന്ജിഒ ആയ ഖല്സാ ആയിരുന്നു ഇതിന് സഹായങ്ങളും പണവും നല്കിയത്.
പ്രകൃതിദൃരന്തത്തിനിരയായവരെ സഹായിക്കാന് എന്തെങ്കിലും ചെയ്യണമെന്ന മോഹമാണ് ഇവരെ ഇക്കാര്യത്തിന് പ്രേരിപ്പിച്ചതെന്ന് ടീം ലീഡര് അന്മോല് സിംഗ് പറയുന്നു. ദൗര്ഭാഗ്യത്തെ പങ്കുവെയ്ക്കാന് പന്തിഭോജനം ചെയ്യുക എന്ന ഗുരുനാനാക്കിന്റെ തത്വമാണ് തങ്ങള് അനുസരിച്ചതെന്നും വീടും സമ്പാദ്യവും നഷ്ടമായ അനേകര്ക്കൊപ്പം ഒരു കുടുംബത്തെ പോലെ ക്യാമ്പില് കഴിയാന് സാധിച്ചത് വലിയ കാര്യമായിട്ടാണ് സിഖ് സമൂഹം വിലയിരുത്തുന്നത്. ദുരിതാശ്വാസ ക്യാമ്പുകള് അടച്ചു കഴിഞ്ഞാല് വിവിധ ടീമായി ശുചീകരണ പ്രവര്ത്തനങ്ങളില് പങ്കാളികളാകാനും പദ്ധതിയുണ്ട്.
