''തീപ്പെട്ടി ഉരച്ചിട്ടത് എന്റെ മുത്തച്ഛനും മുത്തശ്ശിയും ചേര്ന്നായിരുന്നു. അച്ഛന് അമ്മയുടെ അടിച്ചു കൊണ്ടിരിക്കുമ്പോഴാണ് മുത്തച്ഛന് അസീസുള്ളയും മുത്തശ്ശി ഹസീനയും ആന്റിമാരായ ഗുഡിയയും നദീറയും വന്നത്. അച്ഛന് അമ്മയെ മുടിയില് കുത്തിപ്പിടിച്ച് പിടിച്ചു നിര്ത്തിയപ്പോള് ഗുഡിയാ ആന്റിയും നദീറാ ആന്റിയൂം ചേര്ന്ന് മണ്ണെണ്ണയൊഴിച്ചു. മുത്തച്ഛന് അസീസുള്ളയും മുത്തശ്ശി ഹസീനയും ചേര്ന്ന് തീപ്പെട്ടി ഉരച്ച് അമ്മയുടെ ദേഹത്തേക്ക് ഇട്ടു.'' മുത്തലാക്കുമായി ബന്ധപ്പെട്ട് ഭര്ത്താവിന്റെ വീട്ടുകാര് ജീവനോടെ കത്തിച്ച സയീദയുടെ മരണം നേരില് കണ്ട അഞ്ചു വയസ്സുകാരി മകള് ഫാത്തിമ പോലീസിന് നല്കിയ മൊഴിയാണിത്.
കുട്ടിയുടെ പിതാവ് നഫീസ് ഫോണിലൂടെ മൊഴി ചൊല്ലിയത് ചോദ്യം ചെയ്തു പോലീസില് പരാതി നല്കിയതിനാണ് 22 കാരിയായ യുവതിയെ അച്ഛനും മുത്തച്ഛനും മുത്തശ്ശിയും പിതൃസഹോദരിമാരും ചേര്ന്ന് കുഞ്ഞിന്റെ മുന്നിലിട്ട് കത്തിച്ചത്. ഉത്തര്പ്രദേശിലെ ശ്രവസ്തി ജില്ലയിലെ ഗാദ്രാ ഗ്രാമത്തിലായിരുന്നു ഈ ഞെട്ടിക്കുന്ന സംഭവം നടന്നത്. മുംബൈയില് ജോലി ചെയ്യുന്ന 26 കാരന് നഫീസ് ഭാര്യ സയീദയെ ഫോണിലൂടെ തലാക്ക് ചൊല്ലിയതിനെ തുടര്ന്നുണ്ടായ സംഭവമാണ് സയീദയെ വീട്ടുകാര് ചേര്ന്ന് തീ കൊളുത്തുന്നതിലേക്ക് നയിച്ചത്. വെള്ളിയാഴ്ച നമസ്ക്കാരം കഴിഞ്ഞ് വീട്ടിലെത്തിയ ശേഷമായിരുന്നു നഫീസ് ഭാരയെ ക്രൂരതയ്ക്ക് ഇരയാക്കിയത്. സംഭവത്തിലെ പ്രധാന സാക്ഷി മകളാണ്.
മുംബൈയില് ജോലി ചെയ്യുന്ന നഫീസ് ആഗസ്റ്റ് 6 നാണ് ഭാരയെ ഫോണിലൂടെ തലാക്ക് ചൊല്ലിയത്. സയീദ ഇതിനെതിരേ പോലീസിന് പരാതി നല്കി. എന്നാല് കേസെടുക്കാന് കൂട്ടാക്കാതിരുന്ന പോലീസ് നഫീസ് മുംബൈയില് നിന്നും വരട്ടെ എന്ന നിലപാട് എടുത്തു. ആഗസ്റ്റ് 15 ന് നഫീസ് തിരിച്ചെത്തുകയും പോലീസ് ഇരുവരേയും വിളിച്ച് സംസാരിക്കുകയും സയീദയോട് ഭര്ത്താവിനൊപ്പം ജീവിക്കാന് ആവശ്യപ്പെടുകയും ചെയ്തു. തുടര്ന്ന് ഇരുവരും വീട്ടിലേക്ക് പോയി. വെള്ളിയാഴ്ച നമസ്ക്കാരം കഴിഞ്ഞ് തിരിച്ചെത്തിയ നഫീസ് ഭാര്യയുമായി വഴക്കുണ്ടാക്കി.
തലാക്ക് ചൊല്ലിയതാണെന്നും തന്റെ വീടുവിട്ടു പോകണമെന്നും സയീദയോട് പറഞ്ഞു. ഇക്കാര്യം പറഞ്ഞ് ഇരുവരും തമ്മില് തര്ക്കിക്കുകയും വഴക്കുണ്ടാക്കുകയും നഫീസ് സയിദയെ മര്ദ്ദിക്കുകയും ചെയ്തു. തുടര്ന്നായിരുന്നു കുടുംബത്തിലെ മറ്റംഗങ്ങളെല്ലാം എത്തി പിടച്ചു നിര്ത്തി മണ്ണെണ്ണ ഒഴിച്ചു കത്തിച്ചത്. സയീദയുടെ സഹോദരന് റഫീഖാണ് ഫാത്തിമയെ പോലീസ് സ്റ്റേഷനിലേക്ക് എത്തിച്ചത്. കുട്ടി പറഞ്ഞ കാര്യങ്ങള് കേട്ട് പോലീസും ഞെട്ടി. പോലീസ് എത്തി സയീദയുടെ മൃതമദഹം പോസ്റ്റുമാര്ട്ടത്തിനയിച്ചു. അതേസമയം സംഭവത്തില് ആരേയും അറസ്റ്റ് ചെയ്തിട്ടില്ല. എന്നാല് സ്ത്രീധന പീഡനം, കൊലപാതകം, എന്നീ വകുപ്പുകള് ചേര്ത്ത് കേസെടുത്തിട്ടുണ്ട്. മുത്തലാക്കിന് മകള് പരാതി നല്കിയിട്ടും കേസെടുക്കാതിരുന്ന പോലീസിനെതിരേ സയീദയുടെ പിതാവ് രംഗത്ത് വന്നിട്ടുണ്ട്.
