കോഴിക്കോട്: ദുരിതാശ്വാസ ക്യാമ്പുകളില് കഴിഞ്ഞവര്ക്ക് ഫീല്ഡ് പരിശോധന കുടാതെ അടിയന്തര സഹായമായ പതിനായിരം രൂപ സഹായം നല്കാന് സര്ക്കാര് നിര്ദ്ദേശം. ഓണത്തിന് മുമ്പ് എല്ലാ കുടുംബങ്ങള്ക്കും അടിയന്തര സഹായം നല്കാനാണ് തീരുമാനം. ആയിരം വില്ലേജുകളെ പ്രളയബാധിത വില്ലേജുകളായി പ്രഖ്യാപിക്കാനും സര്ക്കാര് നിര്ദ്ദേശിച്ചു. ഇത് സംബന്ധിച്ച ഉത്തരവ് റവന്യൂ വകുപ്പ് നാളെ പുറത്തിറക്കും.
സംസ്ഥാനത്ത് പ്രളയബാധിതരായ കുടുംബങ്ങള്ക്ക് പതിനായിരം രൂപ വീതം അടിയന്തര സഹായം നല്കാന് മന്ത്രിസഭാ യോഗം തീരുമാനിച്ചിരുന്നു. തുക അനുവദിക്കുന്നതിന് മുമ്പ് വില്ലേജ് ഓഫീസറും പഞ്ചായത്ത് സെക്രട്ടറിയും അടങ്ങുന്ന സംഘം ഫീല്ഡ് പരിശോധന നടത്തി അര്ഹത ഉറപ്പാക്കണമെന്നായിരുന്നു നിര്ദ്ദേശം. എന്നാല് ഇത് കാലതാമസമുണ്ടാക്കുന്നതിനാലാണ് ഇത്തവണ ഫീല്ഡ് പരിശോധന കൂടാതെ സഹായം നല്കാന് സര്ക്കാര് നിര്ദ്ദേശിച്ചിരിക്കുന്നത്.
സര്ക്കാര് നിയന്ത്രണത്തില് ഉണ്ടായിരുന്ന ക്യാംപുകളില് കഴിഞ്ഞ 1,11000 കുടുംബങ്ങള്ക്ക് ഉടനടി പതിനായിരം രൂപ വീതം സഹായം നല്കും. പ്രളയത്തെ തുടര്ന്ന് ക്യാംപുകളില് എത്താതെ ബന്ധുവീടുകളിലേക്ക് മാറുകയോ സര്ക്കാര് ക്യാംപില് എത്താതിരിക്കുകയോ ചെയ്തവര്ക്ക് ഫീല്ഡ് തല പരിശോധനയ്ക്ക് ശേഷമാകും സഹായം നല്കുക. 48 മണിക്കൂര് വീട്ടില് വെള്ളക്കെട്ട് ഉണ്ടായവര്ക്കും സര്ക്കാര് സഹായം ലഭിക്കും.
സൂക്ഷ്മ പരിശോധനയ്ക്ക് ശേഷം കരട് പട്ടിക തയ്യാറാക്കും. ശേഷം പരാതികള് കേള്ക്കും. ഇതിന് ശേഷം അന്തിമ പട്ടിക പ്രസിദ്ധീകരിച്ച് സഹായം വിതരണം ചെയ്യും. സെപ്റ്റംബര് ഏഴിനകം അര്ഹരായ എല്ലാവര്ക്കും സഹായം നല്കും.
