തിരുവനന്തപുരം: വിദേശത്ത് ചെക്ക് കേസില് കുടുങ്ങിയ ബിഡി ജെഎസ് സംസ്ഥാന പ്രസിഡന്റ് തുഷാര് വെള്ളാപ്പള്ളിക്കെതിരേ പുറത്തു വന്ന ശബ്ദരേഖ തന്റേത് തന്നെയെന്ന് നാസില് അബ്ദുല്ല. ശബ്ദരേഖ വളച്ചൊടിച്ചെന്നും പുറത്തുവന്ന സംഭാഷണം പൂര്ണ്ണമല്ലെന്നും വ്യക്തമാക്കി.
തുഷാറിന്റെ ബ്ളാങ്ക് ചെക്ക് ഒരു സുഹൃത്തില് നിന്നും അഞ്ചു ലക്ഷം നല്കി വാങ്ങി അതു വെച്ച് കുടുക്കാന് ശ്രമിച്ചു എന്ന് തോന്നിപ്പിക്കുന്ന രീതിയിലുള്ള ശബ്ദസന്ദേശമാണ് പുറത്തു വന്നത്. എന്നാല് കേസിന്റെ രേഖകള് താന് പണം കൊടുക്കാനുളള ഒരാളുടെ പക്കലായിരുന്നു എന്നും ഇത് പണം നല്കി തിരിച്ചെടുക്കുന്ന കാര്യമാണ് സംഭാഷണത്തിലുളളതെന്നുമാണ് നാസില് അബ്ദുള്ള വ്യക്തമാക്കുന്നത്. നാട്ടിലെ ഒരു സുഹൃത്തിനോട് സംസാരിക്കുന്ന ശബ്ദ സന്ദേശമായിരുന്നു ഇത്. നാട്ടുഭാഷാ രീതിയില് നടത്തിയ വര്ത്തമാനം തെറ്റിദ്ധരിപ്പിക്കുന്നതായിരിക്കാമെന്നു പറഞ്ഞു.
പേരു വെളിപ്പെടുത്താത്ത മറ്റൊരാള്ക്കു അഞ്ച് ലക്ഷം രൂപ നല്കിയാല് തുഷാറിന്റെ ഒപ്പുള്ള ബ്ലാങ്ക് ചെക്ക് തന്റെ കയ്യില് കിട്ടുമെന്നാണ് നാസില് സുഹൃത്തിനോടു പറയുന്നത്. തുഷാര് കുടുങ്ങിയാല് വെള്ളാപ്പള്ളി നടേശന് പണം തരുമെന്നും ഫോണ്സന്ദേശത്തില് നാസില് പറയുന്നു. യുഎഇയില് തുഷാര് വെള്ളപ്പാള്ളി പലരേയും വിശ്വാസത്തിലെടുത്തു ബ്ളാങ്ക് ചെക്കില് ഒപ്പിട്ടുകൊടുത്തിട്ടുണ്ടെന്നും പറയുന്നുണ്ട്. തുഷാര് ദുബായിലെത്തി അറസ്റ്റിലാകുന്നതിനു മുന്പാണ് നാസില് സുഹൃത്തിനോടു സംസാരിക്കുന്നതെന്നും വാക്കുകളില് വ്യക്തമാണ്.
