ന്യൂഡല്ഹി: പാക് അധിനിവേശ കശ്മീര് ഇന്ത്യയുടേതെന്ന് വിദേശകാര്യ മന്ത്രി എസ്. ജയ്ശങ്കര്. പാക് അധിനിവേശ കശ്മീരിന്റെ അധികാരം ഒരു ദിവസം ഇന്ത്യയ്ക്ക് കൈവരുമെന്നും മന്ത്രി കൂട്ടിച്ചേര്ത്തു. പാക് അധിനിവേശ കശ്മീരിന്റെ കാര്യത്തില് മാത്രമേ പാക്കിസ്ഥാനുമായി ഇനി ചര്ച്ചയ്ക്കുള്ളൂ എന്നും മന്ത്രി വ്യക്തമാക്കി. പ്രതിരോധ മന്ത്രി രാജ്നാഥ് സിംഗും ഉപരാഷ്ട്രപതി എം. വെങ്കയ്യ നായിഡുവും നേരത്തെ ഇതേ നിലപാട് വ്യക്തമാക്കിയിരുന്നു.
കശ്മീര് വിഷയത്തില് ആളുകള് പലതും പറയും അതില് ഒരു പരിധിയില് കൂടുതല് ആശങ്ക വേണ്ടന്നും മന്ത്രി പറഞ്ഞു. വിദേശകാര്യ മന്ത്രിയായി അധികാരമേറ്റ ശേഷം ആദ്യമായി നടത്തിയ വാര്ത്താസമ്മേളനത്തില് സംസാരിക്കുകയായിരുന്നു ജയ്ശങ്കര്. രണ്ടാം മോഡി സര്ക്കാരിന്റെ ആദ്യ നൂറുദിനത്തില് മന്ത്രാലയം ചെയ്ത കാര്യങ്ങള് വിദേശകാര്യ മന്ത്രി വാര്ത്താസമ്മേളനത്തില് അവതരിപ്പിച്ചു.
രണ്ടാം മോഡി സര്ക്കാരിന്റെ കീഴില് ഇന്ത്യ ആഗോളതലത്തില് കൂടുതല് ശക്തരായെന്ന് ജയ്ശങ്കര് പറഞ്ഞു. അതിര്ത്തി കടന്നുള്ള തീവ്രവാദം, ആര്ട്ടിക്കിള് 370 റദ്ദാക്കല് തുടങ്ങിയ വിഷയങ്ങളില് ഇന്ത്യയ്ക്ക് ആഗോള പിന്തുണ ലഭിച്ചു. ഇന്ത്യയുടെ ശബ്ദം കൂടുതല് മെച്ചപ്പെട്ടുവെന്നും വിദേശകാര്യ മന്ത്രി പറഞ്ഞു. ഇന്ത്യ-അമേരിക്ക ബന്ധം മികച്ച നിലയിലാണ്. ഇരുരാജ്യങ്ങള് തമ്മിലുള്ള ബന്ധം 90 ശതമാനം പൂര്ണവും 10 ശതമാനം ഭാഗികവുമാണെന്നും കേന്ദ്രമന്ത്രി പറഞ്ഞു.
