അമരാവതി: രാജ്യത്തെ ഏറ്റവും പ്രശസ്തമായ ടെലിവിഷന് ക്വിസ് മെഗാഷോ "കോന് ബനേഗാ ക്രോര്പതി"യില് സര്ക്കാര് സ്കൂള് പാചകക്കാരിക്ക് ഒരുകോടി രൂപ സമ്മാനം. മഹാരാഷ്ട്രയിലെ അമരാവതിയിലുള്ള ഒരു സര്ക്കാര് സ്കൂളില് കേവലം 1500 രൂപ പ്രതിമാസശമ്പളം വാങ്ങുന്ന ബബിതാ ടാഡെയാണു "കോടീശ്വരി"യായത്. സ്വപ്നം കാണാന് കഴിയാത്ത തുക കൈയില് വന്നെങ്കിലും കോടീശ്വരിക്കു തല്ക്കാലം ഒരുമോഹം മാത്രം- ഒരു മൊബൈല് ഫോണ് വാങ്ങണം!.
സോണി എന്റര്ടെയ്ന്മെന്റ് ചാനലില് അമിതാഭ് ബച്ചന് അവതാരകനായ കോന് ബനേഗാ ക്രോര്പതിയുടെ 11-ാം എഡിഷനിലെ രണ്ടാമത്തെ കോടിപതിയാണു ബബിത. സ്കൂളില് 450-ലേറെ കുട്ടികള്ക്കു ഭക്ഷണമൊരുക്കുന്ന ബബിത, വേതനം തുച്ഛമാണെങ്കിലും പാചകജോലി ആസ്വദിക്കുകയും അതില് അഭിമാനിക്കുകയും ചെയ്യുന്നു. ഒരു ജോലിയും ചെറുതോ വലുതോ അല്ലെന്നാണു നിലപാട്.
ബബിത വിജയിയായ എപ്പിസോഡ് ഇനിയും സംപ്രേഷണം ചെയ്തിട്ടില്ലെങ്കിലും സാമൂഹികമാധ്യമങ്ങളില് അവരുടെ വിജയകഥ വൈറലായി. വരാനിരിക്കുന്ന എപ്പിസോഡിന്റെ പ്രമോ വീഡിയോ സോണി ചാനല് സംപ്രേഷണം ചെയ്തുതുടങ്ങി.
കോന് ബനേഗാ ക്രോര്പതിയുടെ 11-ാം സീസണില്, കഴിഞ്ഞയാഴ്ച ആദ്യവിജയിയായത് ഐ.എ.എസ്. മത്സരാര്ഥിയായ സനോജ് രാജാണ്. "ഏതു സുപ്രീം കോടതി ചീഫ് ജസ്റ്റിസിന്റെ പിതാവാണ് ഒരിക്കല് മുഖ്യമന്ത്രിയായിരുന്നത്?" എന്ന ചോദ്യമാണു സരോജിനെ ഒരുകോടി രൂപയുടെ സമ്മാനത്തിന് അര്ഹനാക്കിയത്.
നിലവിലെ ചീഫ് ജസ്റ്റിസ് രഞ്ജന് ഗോഗോയ് ആയിരുന്നു ശരിയുത്തരം. അദ്ദേഹത്തിന്റെ പിതാവ് കേശബ് ചന്ദ്ര ഗോഗോയ് അസമില് മുഖ്യമന്ത്രിയായിരുന്നു. എന്നാല്, ഏഴുകോടി രൂപയുടെ അവസാനചോദ്യം നേരിടാതെ, ഒരുകോടിയുടെ സമ്മാനംകൊണ്ടു തൃപ്തനാകുകയായിരുന്നു സനോജ് രാജ്.
