യുണൈറ്റഡ് നേഷന്സ്: അസമിന് പിന്നാലെ മറ്റു സംസ്ഥാനങ്ങളിലേക്കും പൗരത്വ റജിസ്ട്രേഷന് നടപ്പാക്കി അനധികൃത കുടിയേറ്റക്കാരെ പുറത്താക്കാന് ഇന്ത്യ ശ്രമം നടത്തുമ്പോള് ലോകത്ത് വിദേശ രാജ്യങ്ങളില് കുടിയേറിയവരുടെ പട്ടികയില് മുന്നില് ഇന്ത്യക്കാര്. ലോകത്ത് ഏറ്റവും കൂടുതല് കുടിയേറ്റക്കാര് ഇന്ത്യയില് നിന്നുമാണെന്ന റിപ്പോര്ട്ട് പുറത്തുവിട്ടിരിക്കുന്നത് യു.എന് ആണ്. ലോകത്തെ 27.2 കോടി കുടിയേറ്റക്കാരില് ഇന്ത്യാക്കാരുടെ എണ്ണം 1.75 കോടി.
ലോകത്തുടനീളമുള്ള ഏതു രാജ്യങ്ങളിലും കുടിയേറാന് ഇന്ത്യാക്കാര് തയ്യാറായിരിക്കുമ്പോള് ഇന്ത്യയിലേക്ക് കുടിയേറിയിട്ടുള്ളവരുടെ എണ്ണം വെറും 2.07 പേര് മാത്രമാണെന്ന് യുഎന് പറയുന്നു. മൊത്തം രാജ്യങ്ങളിലെയും കുടിയേറ്റക്കാരുടെ കണക്കു പരിശോധിക്കുമ്പോള് ഇന്ത്യയിലേക്ക് കുടിയേറുന്നത് മൊത്തം കുടിയേറ്റക്കാരുടെ നാലു ശതമാനം മാത്രമേ വരൂ എന്നും പഠനത്തില് പറയുന്നു. പാക്കിസ്ഥാന്, ബംഗ്ലാദേശ്, നേപ്പാള് എന്നിവിടങ്ങളില് നിന്നുള്ളവരാണ് ഇന്ത്യയിലേക്ക് കുടിയേറുന്നവരില് കൂടുതല്.
കുടിയേറ്റക്കാരുടെ കാര്യത്തില് ഒന്നാംസ്ഥാനത്ത് ഇന്ത്യയാണെങ്കില് രണ്ടാംസ്ഥാനം അമേരിക്ക സ്വപ്നഭൂമികയായി വിലയിരുത്തപ്പെടുന്ന മെക്സിക്കോയ്ക്കാണ്. 1.18 കോടിപ്പേരാണ് മെക്സിക്കോയില് നിന്നു കുടിയേറിപ്പാര്ത്തത്. ചൈന 1.07 കോടി, റഷ്യ 1.05 കോടി, സിറിയ 82 ലക്ഷം, ബംാദേശ് 78 ലക്ഷം, പാക്കിസ്ഥാന് 63 ലക്ഷം, യുെ്രെകന് 59 ലക്ഷം, ഫിലിപ്പീന്സ് 54 ലക്ഷം, അഫ്ഗാനിസ്ഥാന് 51 ലക്ഷം എന്നിങ്ങനെയാണ് ബാക്കിയുള്ള കണക്ക്. അതേസമയം കുടിയേറ്റത്തിന് ഏറ്റവും ഇരയാകുന്ന രാജ്യം അമേരിക്കയാണ്. യു.എസില് കുടിയേറിയത് 5.1 കോടി പേരാണ്. അതായത് ആകെയുള്ളതിന്റെ 19 ശതമാനം.
ജര്മ്മനി (1.3 കോടി) രണ്ടാമതും സൗദി അറേബ്യ മൂന്നാമതും നില്ക്കുന്നു. റഷ്യ (1.2 കോടി), ബ്രിട്ടന് (1 കോടി), യു.എ.ഇ (90 ലക്ഷം), ഫ്രാന്സ്, കാനഡ, ഓസ്ട്രേലിയ (80 ലക്ഷം വീതം), ഇറ്റലി (60 ലക്ഷം) എന്നിങ്ങനെ മറ്റുള്ള രാജ്യങ്ങളിലെ കുടിയേറ്റം. വെറും 10 രാജ്യങ്ങളില് നിന്നുള്ള കുടിയേറ്റക്കാരുടെ എണ്ണം ആഗോളതലത്തിലെ കുടിയേറ്റക്കാരുടെ എണ്ണത്തിന്റെ മൂന്നിലൊന്നാണെന്നും റിപ്പോര്ട്ടില് പറയുന്നു. ഇന്റര് നാഷണല് മൈഗ്രന്റ് സ്റ്റോക്ക് 2019 എന്ന പേരില് പുറത്തു വന്നിട്ടുള്ള റിപ്പോര്ട്ടില് ദേശീയതലത്തില് നടത്തിയ സര്വേകളുടെ ഫലവും ജനസംഖ്യാ സെന്സസും അടിസ്ഥാനപ്പെടുത്തിയാണ് കണക്ക് തയ്യാറാക്കിയിട്ടുള്ളത്.
മേഖലാടിസ്ഥാനത്തില് യൂറോപ്പിലാണ് ഏറ്റവുമധികം കുടിയേറ്റക്കാരുള്ളത്, 8.2 കോടി. നോര്ത്ത് അമേരിക്കയില് 5.9 കോടിപ്പേരാണ്. നോര്ത്ത് ആഫ്രിക്കയിലും പശ്ചിമേഷ്യയിലും 4.9 കോടി പേരുമുണ്ട്. ഭൂപ്രകൃതി അടിസ്ഥാനത്തില് ഓസ്ട്രേലിയയും ന്യൂസിലന്ഡും അടങ്ങുന്ന ഓഷ്യാന( 21.2 ശതമാനം)യാണ് ഒന്നാമത്. നോര്ത്ത് അമേരിക്കയില് 16 ശതമാനം പേരാണുള്ളത്. ഏറ്റവും കുറവ് 1.8 ശതമാനം വീതമുള്ള ലാറ്റിന് അമേരിക്കയിലും കരീബിയയിലും ഒരു ശതമാനം വീതമുള്ള മധ്യ, ദക്ഷിണ ഏഷ്യകളിലുമാണ്.
