വാഷിങ്ടണ് : ഇന്ത്യയുടെ സ്വപ്ന പദ്ധതിയായ ചന്ദ്രയാന് 2 ന്റെ വിക്രം ലാന്ഡര് കണ്ടെത്താനുളള പ്രതീക്ഷകള് മങ്ങി. നാസയുടെ ഓര്ബിറ്ററിനും വിക്രം ലാന്ഡറിന്റെ സൂചന നല്കാന് സാധിക്കാത്ത സാഹചര്യത്തില് ഇന്ത്യയുടെ ചന്ദ്രയാന് 2 ദൗത്യത്തിന്റെ പ്രതീക്ഷ മങ്ങിയത്.
വിക്രം ലാന്ഡറെ കണ്ടെത്താനുളള അവസാന പ്രതീക്ഷയായിരുന്നു നാസയുടെ പേടകം. ചന്ദ്രനെ കുറിച്ചുളള കൂടുതല് ഗവേഷണങ്ങള്ക്കും ചാന്ദ്രദൗത്യങ്ങള്ക്കുമായി നാസ വിക്ഷേപിച്ച ലൂണാര് റീകോനസന്സ് ഓര്ബിറ്ററിന് വിക്രം ലാന്ഡറിനെക്കുറിച്ചുളള സൂചന ലഭിക്കാത്തതാണ് ഇന്ത്യന് പ്രതീക്ഷയ്ക്ക് മങ്ങലേല്പിച്ചത്.
'ബമ്മര്' എന്ന് പലരും വിശേഷിപ്പിക്കുന്ന, നിലവില് ചന്ദ്രനെ പരിക്രമണം ചെയ്യുന്ന നാസ പേടകം ദക്ഷിണധ്രുവ പ്രദേശത്തിനടുത്തുളള വിക്രം ലാന്ഡറിനെ കണ്ടെത്തുന്നതിനാല് പരാജപ്പെട്ടുവെന്നാണ് ദേശീയ മാധ്യമങ്ങള് റിപ്പോര്ട്ട് ചെയ്യുന്നത്. സെപ്റ്റംബര് 7 മുതല് ഭൂമിയുമായി സമ്പര്ക്കം നഷ്ടപ്പെട്ട ലാന്ഡര് ഇനി ഇരുട്ടിലേക്ക് മറയും
ഏവിയേഷന് വീക്കിന്റെ റിപ്പോര്ട്ട് അനുസരിച്ച് ലൂണാര് റീകോനസന്സ് ഓര്ബിറ്ററിന്റെ ക്യാമറ (എല് ആര് സി) ഉപയോഗിച്ച് ഇന്നലെ അസൂത്രണം ചെയ്തതുപോലെ ലാന്ഡറിന്റെ ലാന്ഡിംഗ് സൈറ്റ് ചിത്രീകരിച്ചു. എന്നാലും, സൂര്യപ്രകാശം താരതമ്യേന കുറവായ സമയത്ത് എല്ആര് ഓര്ബിറ്റര് ഈ ഭാഗത്ത് കൂടി കടന്നു പോയതിനാലാവും ലാന്ഡറിന്റെ സൂചന ലഭിക്കാത്തതെന്നും നാസ വ്യക്തമാക്കി.
2009 ല് വിക്ഷേപിച്ച ഈ ഓര്ബിറ്റര് ചൊവ്വാഴ്ച വിക്രം ലാന്ഡര് ഇടിച്ചിറങ്ങിയതായി കരുതുന്ന ചന്ദ്രോപരിതലഭാഗം കടന്നുപോയിരുന്നുവെങ്കിലും ലാന്ഡറെക്കുറിച്ച് സൂചന നല്കാന് സാധിക്കുന്ന ചിത്രങ്ങളോ സിഗ്നലുകളോ ഓര്ബിറ്ററിന് ശേഖരിക്കാന് സാധിച്ചില്ല എന്ന് നാസ പറഞ്ഞു.
ലാന്ഡറിന്റെ കൃത്യമായ സ്ഥാനം ഇതുവരെ നിര്ണയിക്കാനാവാത്തതിനാല് അത് സംബന്ധിച്ചുളള വിവരം ഓര്ബിറ്ററെ ധരിപ്പിക്കാന് സാധിക്കാത്തതും എല് ആര് ഒ ക്യാമറയ്ക്ക് ലാന്ഡറിന്റെ വിവരശേഖരണത്തിന് തടസമായതായി നാസയുടെ പ്ലാനെറ്ററി സയന്സ് ഡിവിഷന്റെ പബ്ളിക് അഫയേഴ്സ് ഓഫീസറായ ജോഷ്വ എ ഹന്ഡല് അറിയിച്ചു. ലാന്ഡറെ പ്രവര്ത്തനക്ഷമമാക്കാനുളള ഐഎസ്ആര്ഒയുടെ ശ്രമങ്ങള്ക്കൊപ്പം നാസയും പങ്കു ചേര്ന്നത് പ്രതീക്ഷ ഉയര്ത്തിയിരുന്നു.
എന്നാല് 12 ദിവസം കടന്നുപോകുമ്പോള് ലാന്ഡറില് നിന്ന് സിഗ്നലുകള് ലഭിക്കാനുളള സാധ്യത ഇല്ലാതാവുകയാണ്. സൂര്യപ്രകാശം കുറച്ച് ലഭിക്കുന്ന ഭാഗത്തായാണ് ലാന്ഡര് ഇറങ്ങിയത്. അതിനാല് തന്നെ സിഗ്നലുകള് അയയ്ക്കാനും സ്വീകരിക്കാനും കഴിയാത്ത സാഹചര്യത്തില് ലാന്ഡറിന്റെ സോളാര് പാനലുകള് റീചാര്ജ് ചെയ്യാനുളള സാധ്യതയും ഇല്ലാതാകും.
ലാന്ഡറിന്റെ ആയുസ്സ് ചന്ദ്രനിലെ ഒരു പകല് ദിനമാണ് (ഭൂമിയിലെ 14 ദിനം). വെളളിയാഴ്ച സമയപരിധി അവസാനിക്കും. അതിനാല് ലാന്ഡറുമായി ആശയവിനിമയ ബന്ധം പുനഃസ്ഥാപിക്കാനുളള സാധ്യത കുറവാണെന്നാണ് വിലയിരുത്തല്. എന്നാല് ചന്ദ്രന്റെ ഭ്രമണപഥത്തില് ചുറ്റുന്ന ഓര്ബിറ്റര് ഏഴ് വര്ഷം വരെ പ്രവര്ത്തിക്കും. ഓര്ബിറ്ററില് നിന്ന് ചന്ദ്രനെക്കുറിച്ച് കൂടുതല് വിവരം ലഭിക്കുമെന്ന പ്രതീക്ഷയിലാണ് ശാസ്ത്രജ്ഞര്.
വിക്രം ലാന്ഡറിന്റെ ചന്ദ്രനിലേക്കുളള ഇറങ്ങല് കൃത്യമായിരുന്നെങ്കില് ഇന്ത്യയുടെ ബഹിരാകാശ ഗവേഷണ ചരിത്രത്തിലെ അഭിമാന ഏടായി മാറുമായിരുന്നു ചന്ദ്രയാന് 2 ദൗത്യം. എന്നാല് ഉദ്ദേശിച്ച രീതിയില് നിന്ന് വ്യതിചലിച്ച് വിക്രം ലാന്ഡര് സ്പെ്റ്റംബര് ഏഴിന് ചന്ദ്രോപരിതലത്തില് ഇടിച്ചിറങ്ങുകയായിരുന്നു.
