2008 ഡിസംബറിലാണ് ജുമാന ഹദാദി എഡിറ്ററായി 'ജസാദ്' എന്ന ലൈംഗിക മാഗസിന് തുടങ്ങുന്നത്. ഒരു സ്ത്രീ എഡിറ്ററാവുന്ന ലോകത്തിലെ ആദ്യ ലൈംഗിക മാസികയായിരുന്നു ഇത്. ഇതോടെ അറബ് ലോകത്തെ ഏറ്റവും 'വെറുക്കപ്പെട്ട' എഴുത്തുകാരി എന്ന് ജുമാന ഹദാദിനെ വിശേഷിപ്പിച്ചു. എന്നാല് അറേബ്യന് ബിസിനസ് മാഗസിന് ആവര്ത്തിച്ച് നാല് വര്ഷം ശക്തയായ നൂറ് അറബ് വനിതകളില് ഒരാളായി തിരഞ്ഞെടുത്തത് ജുമാന ഹദാദിനെ ആയിരുന്നു.
ഒരു പ്രമുഖ മാഗസിന് നല്കിയ അഭിമുഖത്തില് തന്റെ എഴുത്തിനെ കുറിച്ചും ജീവിതത്തെ കുറിച്ചും ജുമാന തുറന്നു പറഞ്ഞിരുന്നു. '' എന്നെ വെറുക്കുന്ന ദേശത്താണ് എന്റെ ജീവിതം, എന്റെ ദേശത്തിന് ഏറ്റവും ദേഷ്യമുള്ളതും എന്നോടാണ്. എന്നോടുള്ള അസഹിഷ്ണുത കൂട്ടുന്നതിന് എന്നാല് കഴിയുന്നതെല്ലാം ഞാന് ചെയ്തുകൊണ്ടിരിക്കുന്നു. എന്താവണം എന്ന് കേട്ടല്ല എന്താവരുത് എന്ന് കേട്ടാണ് വിദ്യാഭ്യാസം ആരംഭിച്ചത്. സ്കൂള് കാലം മുതല് കണ്ടുശീലിച്ച കാപട്യമാണിത്, വളരുംന്തോറും അറബ് സ്വത്വത്തില് കണ്ടതും ഇതേ കാപട്യമാണ്.
ശരീരത്തെ കുറിച്ചുള്ള ഒരു സാംസ്കാരിക മാസികയാണ് ജസാദ്. ലൈംഗികത മാത്രമല്ല ജസാദിന്റെ ഉള്ളടക്കം. തത്വചിന്ത, മതം തുടങ്ങിയവയെല്ലാം ഇത് ചര്ച്ച ചെയ്യുന്നുണ്ട്. ഞാന് ഒരു സ്ത്രീയും അറബിയുമാണ്, അതുകൊണ്ട് എന്റെ മാഗസിന് ആണാനന്ദത്തിന് മാത്രമുള്ള ഒന്നല്ല. അറേബ്യ ഒരു ചതുപ്പാണ്. ചതുപ്പിന്റെ ശാന്തതയാണ് ആ ദേശത്തുള്ളത്. ആ ശാന്തത ഇല്ലാതാവുന്നത് അവര്ക്ക് താങ്ങാന് കഴിയുകയില്ല. അതുകൊണ്ട് അറബികള് ചോദ്യങ്ങളെ ഭയപ്പെടുന്നു. അവര് ലൈംഗികതയെ കുറിച്ച് ചിന്തിക്കും, പക്ഷെ അതിനെ കുറിച്ച് സംസാരിക്കാന് ധൈര്യപ്പെടാറില്ല. പവിത്രതയെ സംരക്ഷിക്കുന്ന ആളുകളെയാണ് അറേബ്യ അഭിമാനത്തോടെ സ്വദേശി എന്ന് വിളിക്കുന്നത്. ഞാന് കപട വിശ്വാസിയല്ല, അതുകൊണ്ട് എന്റെ നാട് എന്നെ അറബ് സ്ത്രീയായി പരിഗണിക്കുന്നുണ്ടോ എന്നുപോലും സംശയമാണ്.'' - ജുമാന പറയുന്നു.
