തിരുവനന്തപുരം : മരട് ഫ്ളാറ്റിലെ താമസക്കാരുടെ പുനധരിവാസവും നഷ്ടപരിഹാരവും സംബന്ധിച്ചുള്ള നടപടികളിലേയ്ക്ക് കടക്കുമ്പോള് സര്ക്കാര് ഏറെ ജാഗ്രത പുലര്ത്തണമെന്ന് സിപിഎം നേതാവും ഭരണപരിഷ്കാര കമ്മിഷന് ചെയര്മാനുമായ വി.എസ് അച്യുതാനന്ദന്. സമാനമായ നിയമലംഘനങ്ങള് സര്ക്കാര് തന്നെ ചൂണ്ടിക്കാട്ടിയിട്ടുള്ള സാഹചര്യത്തില് പൊളിക്കലും പുനരധിവാസവും നഷ്ടപരിഹാരം നല്കലും ഒരു കീഴ്വഴക്കമായേക്കാമെന്നും വി.എസ് പറഞ്ഞു വയ്ക്കുന്നു.
മരടിലെ ഫ്ളാറ്റുകളില് പുനരധിവാസം ആവശ്യമായവരുടെ കൃത്യമായ ലിസ്റ്റാണ് ആദ്യം തയ്യാറാക്കേണ്ടത്. മറ്റ് പാര്പ്പിട സൗകര്യം ഉള്ളവര്ക്ക് പുനരധിവാസം നല്കേണ്ട ബാദ്ധ്യത സര്ക്കാരിനില്ല. എന്നു മാത്രമല്ല, അനേകം കാരണങ്ങളാല് പുനരധിവസിപ്പിക്കപ്പെടേണ്ട നിരവധി ആളുകളുടെ പട്ടിക സര്ക്കാരിനു മുമ്പിലുണ്ട്. അവരേക്കാള് മുന്ഗണനയോ, അവര്ക്ക് ലഭിക്കുന്ന സൗകര്യങ്ങളെക്കാള് മുന്തിയ സൗകര്യങ്ങളോ ഇടതുപക്ഷ സര്ക്കാര് ഫ്ളാറ്റുടമകള്ക്ക് നല്കുന്നത് തെറ്റായ സന്ദേശമാണ് നല്കുകയെന്നും വി.എസ് പറഞ്ഞു.
