വെല്ലിങ്ടണ്: ഏകദിന ലോകകപ്പ് ഫൈനല് കഴിഞ്ഞ് മാസങ്ങള് പിന്നിട്ടിട്ടും അപ്രതീക്ഷിത തോല്വിയുടെ ആഘാതം ന്യൂസിലാന്ഡ് ക്യാപ്റ്റന് കെയ്ന് വില്യംസനു വിട്ടുമാറിയിട്ടില്ല. ഇംഗ്ലണ്ടിനെതിരായ ഫൈനലില് സൂപ്പര് ഓവറിലും ടൈ ആയതോടെയാണ് ബൗണ്ടറികളുടെ എണ്ണത്തിന്റെ അടിസ്ഥാനത്തില് ലോകകപ്പ് വിജയികളെ പ്രഖ്യാപിച്ചത്. അവിശ്വസനീയമായി കപ്പ് ന്യൂസിലാന്ഡില് നിന്ന് വഴുതിപ്പോയതും.
ലോകകപ്പ് ഫൈനലില് ബൗണ്ടറികള് എണ്ണി വിജയിയെ തീരുമാനിച്ചത് ശരിയായില്ലെന്ന് വില്യംസന് ആവര്ത്തിച്ചു. അത് ശരിയായ ക്രിക്കറ്റല്ല, ഇങ്ങനെയൊരു കാര്യം നടക്കുമെന്ന് ആരും പ്രതീക്ഷിക്കില്ലെന്നും, ഇങ്ങനെയൊരു കാര്യം വീണ്ടും ആവര്ത്തിക്കരുതെന്നും അദേഹം വ്യക്തമാക്കി.
ലോകകപ്പ് ഫൈനലില് നടന്നത് ഭീതിയുണ്ടാക്കുന്ന കാര്യമാണ്. ഒരു മുറിയില് ഇരുന്ന് ആശയങ്ങള് ഉണ്ടാക്കുന്നത് പോലെയാണിതെന്ന് മാത്രമാണ് തനിക്ക് ചിന്തിക്കാന് കഴിയുന്നതെന്നും വില്യംസന് പറഞ്ഞു. ഫൈനലിലെ വിജയിച്ച പ്രഖ്യാപിച്ച നിയമം വിവാദമായതിനെ തുടര്ന്ന് കഴിഞ്ഞ ഒക്ടോബറില് ബൗണ്ടറി നിയമം ഐസിസി ഉപേക്ഷിച്ചിരുന്നു. പ്രാഥമികഘട്ടത്തില് സൂപ്പര് ഓവറും ടൈ ആണെങ്കില് മത്സരം ടൈ ആയി പ്രഖ്യാപിക്കുകയാണ് പതിവ്. എന്നാല് ലോകകപ്പ് ഫൈനലില് സൂപ്എപര് ഓവറും ടൈ യില് അവസാനിച്ചതോടെ നേടിയ ബൗണ്ടറികളുടെ എണ്ണമെടുത്ത് വിജയികളെ തീരുമാനിക്കുകയായിരുന്നു. ഫൈനല് പോരാട്ടത്തില് 26 ബൗണ്ടറികളാണ് ഇംഗ്ലണ്ട് നേടിയത്. കിവീസിന് 17 എണ്ണം മാത്രമാണ് നേടാനായത്. ഇതോടെ ഇംണ്ടിനെ ലോകകപ്പ് ചാമ്പ്യന്മാരായി പ്രഖ്യാപിക്കുകയായിരുന്നു.
